Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺MAer doen dese beroerte op hielt, soo heeft Paulus die discipelen gheroepen, ende hen vermanende, Gode beuolen, ende is wechghereyst om te gaen in Macedonien,

+ A

2

Ende doen hy die landen doorwandelt hadde, ende hen hadde met veel redenen vermaent, soo is hy ghecomen in griecken lant,

[p. *847]

3

ende als hi daer gheweest hadde drij maenden, soo sijn hem laghen gheleyt vanden Ioden teghen dat hi soude te scepe varen nae Syrien, Ende hy heeft raet ghehadt dat hy wederom keeren soude door Macedonien

4

Ende met hem sijn ghegaen Sosipater van Pirriberoen, ⁺maer van die Thessalonianen Aristarchus, ende Secundus, ende Gaius van Derben, ende Timotheus, maer vanden Asianen Tythicus, ende Trophimus,

+ B

5

Dese (doen sij voor ons ghegaen waren) hebben ons verbeyt te Troaden,

6

Ende wij sceepten nae die daghen der ongheheefder brooden van Philippen, ende sijn tot hen ghecomen te Troaden binnen vijf daghen, daer wij ghebleuen sijn seuen daghen,

7

Maer op eenen vanden sabbothen als wij te samen comen waren om tbroot te breken, soo heeft Paulus hen ghepreect willende des anderen daechs reysen, ende hi heuet sermoon ghetrocken tot der middernacht toe,

8

Ende daer waren seer veel lampen in die eetcamer daer wij vergadert waren

9

Maer een ionghelinck Euthicus ghenaemt sittende op een venster doen hy in eenen swaren slaep gheuallen was (als Paulus langhe preecte) verwonnen sijnde vanden slaep is vanden derden solder gheuallen nederwaerts ende hy is doot opghehauen,

10

⁺Totten welcken als Paulus neder ghecomen was, soo heeft hy op hem gheleghen ende hem omuanghende heeft hy gheseydt. En wilt niet ontstelt sijn, want sijn ziele is in hem,

+ C

11

Ende opgaende ende broot brekende ende ontbijtende, doen hy hen ghenoech aenghesproken hadde totten dach is hy wechghereyst,

12

Ende sij hebben den ionghelinc leuende ghebracht, ende sij sijn ghetroost gheweest niet weynich,

13

Maer wi in een scip climmende sijn gheuaren in Asson, dat wij van daer Paulum ontfanghen souden, want alsoo hadde hijt bescict willende selue te lande die reyse doen,

14

Ende doen hy ons vonden hadde in Asson, soo sijn wij, hem mede nemende, ghecomen tot Mytelenen,

15

Ende van daer scepende sijn wi tsanderdaechs ghecomen teghen Chium, ⁺ende des anderdaechs sijn wij aencomen te Samum, ende den dach daer nae sijn wij ghecomen te Mileten,

+ D

16

want Paulus hadde voor hem ghenomen voorby Ephesen te scepen, om dat hy gheen verlet en soude hebben in Asien, Want hy haestede hem dat hy (waert hem moghelijck) den Sinxendach soude te Ierusalem houden,

17

Maer van Mileten sendende tot Ephesen heeft hy gheroepen die ouders vander kercken,

18

Die welcke (als sij tot hem ghecomen waren) ende te samen waren, soo heeft hy hen gheseydt. Ghy weet wel vanden iersten dach dat ick in Asien ghecomen ben, hoe dat ick met v lieden binnen alle dien tijt gheweest hebbe,

19

dienende den Heere met alle ootmoedicheyt, ende tranen, ende temptacien die my ghebuert sijn wt die laghen der Ioden,

20

Hoe dat ick v niet orberlijcs ontrocken en hebbe ick en hebt v lieden vercondicht, ende v gheleert openbaerlijck, ⁺ende van huyse te huyse,

+ E

21

betuyghende den Ioden ende den Heydenen die penitencie in Gode, ende tghelooue in onsen Heere Iesum Christum,

22

Ende nv siet ick ghebonden inden gheest reyse nae Ierusalem, niet wetende wat my daer toecomende is,

23

dan dat die heylighe gheest my tot allen steden openbaerlick ghetuycht segghende dat mijn banden ende tribulatien te Ierusalem toecomende sijn,

24

Maer ic en ontsie gheen deser dinghen, noch ick en achte mijn ziele niet costelijcker dan my seluen behoudelijc dat ic mijnen loop mach volbrenghen, ende den dienst den welcken ick ontfanghen hebbe vanden Heere Iesu om te betuyghen dat euangelie der gratien Godts,

25

Ende nv siet ick weet wel, dat ghy voorts mijn aensicht niet meer sien en sult, ⁺ghi allegader door die welcke ic ghegaen hebbe prekende het rijck Godts,

+ F

26

Waerom soo betuyghe ick v lieden opden dach van heden, dat ick suyuer ben van vwer alder bloet,

27

Want ick en heb mi niet ghespaert dat ick v niet en soude vercondighen alle den raet Godts.

28

Siet wel voor v ende voor allen den cudde in dwelcke v die heylighe gheest ghestelt heeft bisscoppen om te regeren die kercke Godts, die welcke hy ghecreghen heeft met sijnen bloede.

29

Ick weet wel datter nae mijn wechsceydinghe sullen grijpende woluen incomen onder v lieden den cudde niet sparende,

30

Ende wt v seluen sullen mannen opstaen sprekende verkeerde leeringhen, om die discipelen nae hen wech te leyden,

31

Waerom soo waect in v ghedenckenisse onthoudende hoe dat ick drij iaren lanc nacht ende dach niet en hebbe opghehouden, met tranen vermanende eenen ieghelijcken van v lieden,

32

Ende nv beuele ick v Gode, ende den woorde van sijnder gratien, ⁺die machtich is te stichten, ende te gheuen die erffenisse in allen die gheheylichde,

+ G

33

Niemants siluer ende gout oft cleedt en heb ick begheert.

34

Ghy weet dat selue wel, hoe dat dese handen ghedient hebben van het ghene dat my van noode was, ende den ghenen die met my sijn,

35

Ick hebt v al ghetoont, datmen alsoo arbeydende moet ontfanghen die crancke, ende ghedencken des woorts des Heeren Iesu (want hy heeft gheseyt) Tis saligher gheuen dan ontfanghen,

36

Ende doen hy dit gheseyt hadde, soo heeft hy met gheboochden knien ghebeden met hen allen,

37

Ende daer is een groot ghescrey opghestaen van hen allen, ende vallende op Paulus hals custen sij hem,

38

aldermeest bedroeft sijnde int woort dat hi gheseyt hadde, dat sij sijn aensicht niet meer sien en souden, Ende sij gheleyden hem ten scepe.