Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

+ 1

⁺ENde het is ghesciet doen Apollo te Corinthen was, dat Paulus hebbende door reyst alle die ouerste landen quam tot Ephesen, ende vant sommighe discipelen,

+ A

2

ende hi heeft tot hen gheseyt. Hebdi den heylighen gheest ontfanghen gheloouende, Maer sij hebben tot hem gheseyt. Wij en hebben noch niet ghehoort ofter eenen heylighen gheest is,

3

Maer hy heeft gheseyt. Waer in sijt ghi dan ghedoopt? Die welcke hebben gheseyt. In Iohannis doopsel,

4

Ende Paulus heeft gheseydt. Iohannis heeft met dat doopsel der penitencien het volck ghedoopt, segghende dat sij gheloouen souden inden ghenen die nae hem comen soude, dat is in Iesum,

5

Dit ghehoort hebbende werden sij ghedoopt inden naem des Heeren Iesu,

6

Ende doen hen Paulus die handen opgheleydt hadde soo is die heylighe gheest op hen ghecomen, ende sij spraken met tonghen, ende sij propheteerden,

7

⁺Ende sij waren alle gader omtrent twaelf mannen,

+ B

8

Ende in die Sinagoge gaende sprack hy met betrouwen drij maenden lanck disputerende ende hen onderwijsende van dat rijck Godts.

* 9

Maer doender sommighe verhert waren ende niet en gheloofden, vermalendijdende den wech des Heeren voor die menichte, soo heeft hy van hen sceydende, die discipelen afghesceyden, daghelijcs disputerende in die scole van een die Tirannus hiet,

10

Ende dit ghesciede twee iaren lanck, also dat alle die ghene die in Asien woonden hoorden het woort des Heeren, soo wel die Ioden als die Heydenen,

11

Ende Godt dede crachtighe wercken die niet ghemeyn en waren door Paulus hant,

12

alsoo dat oock op die siecken ghedraghen worden van sijnen lichaem die sweetdoecken oft voorcleeden, ende die siecten sceydden van henlieden, ende die boose gheesten ghingen wt,

13

Ende sommighe vanden ommegaende Ioden die besweerders waren hebben ooc geproeft ouer die ghene die boose gheesten binnen hadden, ⁺den naem Iesu aen te roepen segghende. Ic besweere v door Iesum den welcken Paulus vercondicht,

+ C

14

Ende het waren seuen eens Ioden sonen Sceua ghenaemt eens prince der priesteren die dit deden,

15

Maer die boose gheest antwoordende heeft tot hen gheseyt Iesum ken ick, ende Paulum weet ic, maer wie sijt ghilieden?

16

Ende die mensche daer den alderquaetsten gheest in was op hen springhende, ende gheweldich wordende ouer beyde, heeft macht ghebruyct teghen henlieden, alsoo dat sij naect ende ghewont ontliepen wt dat huys,

17

Ende dit is kenlijck gheworden alle den Ioden ende Heydenen, die te Ephesen woonden, ende daer is een vreese op alle die gheuallen, ende den naem des Heeren Iesu worde grootelijck ghepresen,

18

Ende veel vanden ghenen die gheloofden quaemen belijdende, ende vercondighende hen wercken,

19

⁺Ende vele van henlieden die quade curioesheden gheuolcht hadden hebben die boecken tsamen ghebrocht, ende die verbrant voor allen menschen, ende doen sij die prijsen van die gherekent hadden, soo hebben sij gheuonden tghelt van vijftich duysent penninghen,

+ D

20

Also sterckelijc wies dat woort Gods ende worde versterct,

21

Als dese dinghen volbrocht waren, so heeft Paulus inden gheest voorghenomen dat hy Macedonien ende Achaien doorghereyst hebbende soude gaen nae Ierusalem seggende. Nae dat ic daer sal gheweest hebben, soo moet ick oock roome sien,

22

Ende sendende in Macedonien (twee vanden ghenen die hen dienden Timotheum ende Erastum, is hy selue een luttel tijts ghebleuen in Asien,

23

Ende op dien tijt is gheschiet een beroeringhe, die niet cleyn was) van den wech des Heeren,

24

Want een Demetrius ghenoemt een siluersmit makende silueren cassen voor Diana gaf den constighen werckluyden den gheen cleyn ghewin

25

die welcke hy te tsamen roepende met die ghene die van den seluen hantwerck waren heeft gheseyt. ⁺Ghi mannen weet wel dat wij van deser hanteringhen ghewin hebben,

+ E

26

ende siet ende hoort, hoe dat desen Paulus heeft niet alleen van Ephesen, maer oock by nae van gheheel Asien een groote scare onderwijsende afghekeert segghende. Dattet gheen goden en sijn die metten handen ghemaect worden,

27

Ende niet alleen en sal ons dit deel in perikel comen van verworpen te worden, maer oock sal den tempel vander grooter Dianen voor niet gheacht worden, Ende haer maiesteyt salmen ooc beghinnen te verderuen, die welcke gheheel Asien ende die werelt eert,

28

Dese woorden ghehoort hebbende sijn si vol gramscap worden, ende hebben gheroepen seggende. Groot is Diana der Ephesianen,

29

Ende alle die stadt is vol werringhen gheworden, ende sij hebben eenen oploop ghemaect eendrachtelijc tot op die ghemeyn speelplaetse, hebbende gegrepen Gaium ende Aristarchum die Macedonianen Paulus ghesellen,

30

⁺Ende doen Paulus wilde int volc gaen so en hebbent die discipelen niet toeghelaten,

+ F

31

Maer oock sommighe van die princen van Asien die sijn vrienden waren hebben tot hem ghesonden, biddende dat hy in die speelplaetse niet comen en soude,

32

ende die ander riepen wat anders, want het was een verwerde vergaderinghe, ende den meesten deel en wisten niet wt wat sake dat sij verghadert waren,

33

Maer sij hebben Alexandrum wter scaren ghetrocken, den Ioden hem voortstierende, Ende Alexander metter hant stillicheyt begheert hebbende, wilde den volcke reden segghen.

34

Den welcken (als sij ghekent hadden een Iode te sijn, soo isser een groot ghecrijsch ghesciet van hen allen omtrent twee vren lanck roepende, Die groote Diana der Ephesianen,

35

Ende doen die scrijuer die scaren ghestilt hadde, soo heeft hy gheseyt. Ghy mannen van Ephesen, wat mensch isser die niet en weet dat die stadt van Ephesen dienende is der grooter Dianen ende Iupiters kint?

36

⁺Daerom want men hier teghen niet en mach segghen, soo behoorde ghilieden ghestilt te wesen, ende niet onbedachtelijck te doen,

+ G

37

Want ghy hebt ons dese mans aenghebracht, die noch tempelsceynders noch blasphemeerders en sijn van uwer goddinnen,

38

Maer eest dat Demetrius ende die constighe wercluyden die met hem sijn, eenighe sake teghen iemanden hebben, Men houdt ghemeynen raet van saken, ende daer sijn wethouders, laetse malcanderen voor recht aenspreken,

39

Maer eest dat ghy iet anders begheert te weten, dat machmen in die wettelijcke vergaderinghe beslichten,

40

Want wij sijn int perikel van beclaecht te worden vanden oploop van heden hoewel datter niemant sculdich en is, vanden welcken wij ons mochten verantwoorden van desen oploop, Ende doen hy dit gheseyt hadde, soo heeft hy die vergaderinghe laten gaen.