Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺DAer nae wt Athenen ghegaen sijnde, is hy ghecomen te Corinthen,

+ A

2

ende vindende daer eenen Iode Aquila ghenoemt, wt Ponten gheboren, die nu corts wt Italien ghecomen was, ende Priscillam sijn huysvrouwe (om dat Claudius gheboden hadde dat alle die Ioden wt Roome wech gaen souden) soe is hy tot hen ghegaen,

3

ende om dat sij vander seluer consten waren, soe bleef hy by hen, ende wracht (Want sij waren van die conste van tenten te maken)

4

Ende hy disputeerde in die synagoge alle sabbothen ondertusschen inbrenghende den naem des Heeren Iesu, ende hy maectet wijs den Ioden ende den Griecken.

5

Maer doen van Macedonien ghecomen waren Silas ende Timotheus, soe was Paulus naerstich tot dat woert betuyghende den Ioden dat Iesus was Christus.

6

Maer doen sij daer teghen seyden ende blasphemeerden, ⁺soe heeft hy sijn cleederen wtscuddende tot hen gheseyt, V bloet sij op v lieder hooft. Ick sal van nu voerts suyuer tot die heydenen gaen.

+ B

7

Ende van daer vertreckende is hy ghegaen int huys van eenen ghenaemt Titus die rechtuerdighe, die Godt dienende was, wiens huys was neffens aen die synagoge.

8

Ende Crispus die ouerste der synagogen heeft den Heere ghelooft met alle sijnen huyse, ende veel vanden Corinthianen hoorende hebben ghelooft, ende werden ghedoopt.

9

⁺Ende die Heere heeft des nachts doer een visioen tot Paulum gheseyt, En wilt niet vreesen, maer spreect ende en swijcht niet.

+ C

10

Want ick ben met v, ende niemant en sal toeghelaten worden om v te hinderen. Want ick heb veel volcs in dese stadt.

11

Ende hy is daer stille gheweest een iaer ende ses maenden leerende by hen dwoert Gods.

12

Maer doen Gallio stadthouder van Achaien was, soe sijn die Ioden eendrachtelijck op ghestaen teghen Paulum ende sij hebben hem ghebracht voer den rechterstoel

13

segghende, Dese raet teghen die wet den menschen Gode te dienen.

14

⁺Maer doen Paulus begonste sijnen mont open te doen, soe heeft Gallio gheseyt tot die Ioden. Waert sake dattet iet onrechts waer, oft een seer quade daet O ghy Ioetsche mannen, soe mocht ick v nae recht verdraghen,

+ D

15

Maer sijnt vraghen van woerden oft namen, oft van uwer wet. Daer af siet ghy toe. Ick en wil van desen gheen richter sijn.

16

Ende hy heeftse ghedreuen van den rechter stoel.

17

Ende sij alle grijpende Sosthenem eenen Prince der synagogen sloeghen hem voer den rechter stoel. Maer Gallio en track hem gheen van desen dinghen aen.

18

⁺Maer doen Paulus noch veel daghen ghebeydt hadde, soe is hy (die broeders Gode beuelende) te scepe gheuaren naer Syrien (ende met hem Priscilla ende Aquila) Die welcke hadde in Cenchris sijn hooft ghescoren want hy hadde een ghelofte.

+ E

19

Ende hy is ghecomen te Ephesen, ende daer heeft hijse ghelaten. Maer hy in die sijnagoge gaende disputeerde metten Ioden.

20

Ende doen sij hem baden dat hy daer noch langher tijt soude blijuen, soe en heeft hy dat niet gheconsenteert,

21

maer hen te Gode beuelende, ende segghende, Ick sal wederom tot v lieden keeren (by alsoe dat Godt wilt) soe is hy ghereyst van Ephesen.

22

Ende nederwaerts gaende in Cesarien, ⁺is hy opgheclommen ende heeft die kercke ghegroet, ende is nederwaerts ghereyst nae Antiochien.

+ F

23

Ende als hy daer een luttel tijts gheweest hadde, soe is hy voerts ghereyst, doer wandelende veruolghens dat lantscap van Galatien ende Phrygien versterckende alle die discipelen.

24

Ende een Iode Apollo ghenaemt van Alexandrien gheboren een welsprekende man is ghecomen tot Ephesen, machtich in die scriftueren.

25

Dese was gheleert inden wech des Heeren, ⁺ende wesende vierich van gheeste sprack hy, ende leerde naerstelijck tghene dat Iesu aengaet. Wetende alleen het doopsel van Iohannes.

+ G

26

Aldus heeft dese begonnen vrijelijck te doen in die synagoge. Den welcken als Priscilla ende Aquila ghehoort hadden, soe hebben sij hem tot hen ghenomen, ende hebben hem neerstelicker verclaert den wech des Heeren.

27

Ende doen hy wilde gaen in Achaien, soe hebben sij die broeders vernaent, ende ghescreuen den discipelen dat sij hem ontfanghen souden.

[p. *846]

Die welcke als hy comen was heeft veel behelps ghedaen den ghenen die ghelooft hadden,

28

Want seer sterckelijck vermant hy die Ioden int openbaer, toonende door die scriftueren dat Iesus is Christus.