Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde hy is voerts ghecomen tot Derben ende Lystren. Ende siet daer was een discipel ghenaemt Timotheus, eender gheloouender weduwen sone van eenen heydenschen vader.

+ A

2

Desen gauen goet ghetuyghe die broeders die te Lystren ende te Iconien waren.

3

Desen heeft Paulus ghewilt dat hy met hem reysen soude. Ende hem aennemende heeft hy hem besneden om der Ioden wille die in die plaetsen waren. Want sij wisten alle dat sijn vader een heydensch man was.

4

Ende als sij doer die steden ghinghen, soe leerden sij hen dat sij onderhouden souden die leeringhen die gheordineert waren van die Apostelen ende ouderen die te Ierusalem waren.

5

Ende die kercken worden beuesticht int ghelooue, ende sij worden daghelijcs oueruloedigher van ghetale.

6

Ende gaende doer Phrigien ende dlant van Galatien, werde hen verboden vanden heyleghen gheest dat woert te spreken in Asien.

7

⁺Maer doen sij ghecomen waren in Mysien, soe proefden sij te gane tot Bithynien ende Iesus gheest en heeft hen dat niet toeghelaten.

+ B

8

Maer doen sij Mysien doer ghegaen waren, soe sijn sij nederwaerts ghegaen te Troaden,

9

ende Paulo is inder nacht een visioen vertoont. Een man van Macedonien was daer staende, ende hem seer biddende, ende segghende, Doergaende tot Macedonien helpt ons.

10

Ende doen hy dat visioen ghesien hadde, soe hebben wy ter stont ghesocht te reysen in Macedonien versekert sijnde dat ons Godt gheroepen hadde om hen lieden het euangelie te vercondighen.

11

Ende te scepe varende van Troade, sijn wy met eenen rechten loop ghecomen in Samothracien ende des anderen daechs te Neapolen,

12

⁺ende van daer te Philippen, welck is die hooftstadt van dlandt van Macedonien, een stadt der vreemder wtlanders. Ende wy waren in dese stadt een deel daghen blijuende.

+ C

13

Maer op der sabbathen dach soe sijn wi wtghegaen buyten die poorte omtrent den vloet daer tscheen datmen plach te bidden, ende sittende spraken wi tot die vrouwen die daer vergadert waren.

14

Ende een vrouwe Lydia ghenaemt een purpur vercoopersse der stadt van Thiateren Godt dienende heuet ghehoort. Wiens herte die Heere gheopent heeft om ter herten te nemen tghene datter geseyt worde van Paulo.

15

Ende doen sij ghedoopt was ende haer huys, soe heeft sij seer ghebeden segghende,

[p. *844]

Eest sake dat ghi my hebt gheacht gheloouich te sijne den Heere, soe coemt in mijn huys ende herberghter. Ende sij heeft ons ghedwonghen.

16

Ende tis ghesciedt als wy ter bedinghen ghinghen, datter een ionghe dochter, hebbende eenen waersegghende gheest binnen, ons ontmoette, die welcke haren Heeren groot ghewin dede met waersegghen.

17

Dese Paulum ende ons gheuolcht sijnde riep segghende, Dese menschen sijn dienaers vanden hooghen Godt, die v vercondighen den wech der salicheyt.

18

Ende dit dede sij menighen dach. Maer Paulus wee daer af hebbende ende hem omkeerende heeft gheseyt totten gheest. Ick ghebiede v inden naem Iesu Christi dat ghy van haer wtgaet. Ende hi is wtghegaen op die selue vre.

19

⁺Ende haer Heeren siende dat die hope van hen winninghe wech gheuaren was, soe hebben sij Paulum ende Silam vanghende ghebracht op die merct tot die princen,

+ D

20

ende brenghende die voer die wethouderen hebben sij gheseyt, Dese menschen beroeren onse stadt, want sij Ioden sijn,

21

ende vercondighen een maniere die ons niet gheorlooft en is aen te nemen, noch te doen, aenghesien dat wy Romeynen sijn.

22

Ende tvolck is teghen henlieden tsamen gheloopen, ende die wethouders hen cleederen scoorende hebben gheboden datmense soude met roeden slaen.

23

Ende als sij hen veel slaghen ghegeuen hadden, soe hebben sijse in den kerker ghesteken, ghebiedende den bewaerder, dat hijse naerstelijck bewaren soude.

24

Die welcke als hy sulck ghebodt ontfanghen hadde, heeftse ghedaen in den binnensten kerker, ende hen voeten heeft hy ghesloten in den stock.

25

Maer ter middernacht loofden Paulus ende Silas Godt, biddende, Ende sij hoordense die in die gheuanghenisse waren.

26

Maer onuersienlijck isser een groote eertbeuinghe ghesciet, alsoe dat die fundamenten des kerkers gheruert worden. ⁺Ende ter stont ghinghen alle die dooren open, ende die banden van hen allen worden ontbonden.

+ E

27

Ende die bewaerder des kerkers ontspronghen sijnde, ende siende die dooren des kerkers open, wilde hem seluen met een wtghetrocken sweert dooden, meynende dat die gheuanghen wech gheuloden waren.

28

Maer Paulus heeft met luyder stemmen gheroepen, seggende, En doet v seluen gheen quaet. Want wi sijn allegader hier.

29

Ende als hi licht gheeyscht hadde, soe is hy daer binnen ghegaen. Ende verscrict sijnde is hi Paulo ende Sile te voete gheuallen,

30

ende hen buyten wtleydende heeft hy gheseyt. O ghy heeren wat moet ick doen dat ick salich mach worden?

31

Ende sij hebben gheseyt, Ghelooft inden Heere Iesum ende soe suldi salich wesen ghi ende v huysghesin.

32

Ende sij hebben hem het woert des Heeren ghesproken met allen den ghenen die in sijn huys waren.

33

Ende hy hen nemende in die vre des nachts, heeft hen wonden ghewasschen, ende hy werde ghedoopt ende alle sijn huys ter stont.

34

Ende als hijse gheleydt hadde tot in sijn huys, soe heeft hy hen die tafel voerghestelt, ⁺ende hy heeft vrolijck gheweest met alle sijnen huyse gheloouende Gode.

+ F

35

Ende alst dach gheworden was, soe hebben die wethouders die stadt dienaers ghesonden segghende, Laet die menschen vrij gaen.

36

Ende die bewaerder des kerkers heeft dese woerden Paulo ghebootscapt. Dat die wethouders ghesonden hadden datmen v lieden soude vrij laten gaen. Hier om nu wtgaende gaet wech in vreden.

37

Maer Paulus heeft tot hen gheseyt, Sy hebben ons roomsche menschen openbaerlijck gheslaghen sonder sake inden kerker gheslooten, ende drijuen sij ons nu heymelijck wech? Alsoe niet, maer laetse selue comen

38

ende ons wtleyden. Ende die dienaers der stadt hebben den wethouders ghebootscapt dese woerden. Ende sij sijn veruaert gheweest, ghehoort hebbende dat sij Romeynen waren.

39

Ende comende hebben sij hem ghesmeect, ende wtleydende hebben sij hen ghebeden dat sij wter stadt gaen souden.

40

Ende wten kerker gaende, sijn sij tot Lidiam inghegaen, ende siende die broeders, hebben sij die ghetroost ende sijn wech ghereyst.