Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde die sommighe weder comende wt Iudeen leerden die broeders. Ten sij dat ghi besneden wort nae Moyses wijse, soe en moechdi niet salich worden.

+ A

2

Alser dan een groote oproeringhe ghesciet was van Paulus ende Barnabas teghen die, soe hebben sij ghesloten dat Paulus ende Barnabas ende sommighe andere van die andere, souden opwaerts reysen tot die Apostelen ende ouders in Ierusalem, om deser vraghen wille.

3

Hier om dese vander kercken wtgheleyt sijnde, sijn ghegaen doer Phenicen ende Samarien, vertellende die bekeeringhe der heydenen, ende sij maecten groote blijscap alle den broeders.

4

Maer doen sij te Ierusalem ghecomen waren, soe sijn sij ontfanghen gheweest van die kercke ende van die Apostelen ende ouders, vercondighende hoe groote dinghen dat Godt met hen ghedaen hadde.

5

⁺Ende daer sijn opghestaen sommighe van die secte der Pharizeen die gheloouich waren gheworden segghende. Dat sij moesten besneden worden ende oock hen ghebieden te houden die wet van Moyses.

+ G

6

Ende die Apostelen ende die ouders sijn vergadert. om te bemercken van deser reden,

7

ende doender een groote disputacie ghesciedde, soe heeft Petrus opstaende tot hen gheseyt, Ghi mannen broeders ghi weet hoe dat Godt van die oude daghen onder ons vercoren heeft dat doer mijnen mont die heydenen hooren souden het woert van dat euangelie, ende gheloouen.

8

Ende Godt die de herten kent, heeft ghetuyghenis ghegheuen, gheuende hen den heyleghen gheest, ghelijck ons

[p. *843]

9

ende hy en heeft gheen ondersceyt ghemaect tusschen ons, ende hen doort ghelooue hen herten suyuerende.

10

Nu dan waer om tempteerdi Godt, met een iock te legghen op die halsen der discipelen, dwelck noch onse vaderen noch wy niet en hebben connen ghedraghen?

11

Maer wy gheloouen dat wy salich worden doer die gratie ons Heeren Iesu Christi, ⁺ghelijck sij.

+ C

12

Ende alle die menichte heeft ghesweghen, ende sij hebben ghehoort Barnabam ende Paulum vertellende, hoe groote teekenen ende wonderen dat Godt ghedaen hadde onder die heydenen doer henlieden.

13

Ende nae dat sij ghesweghen hadden, soe heeft Iacobus gheantwoert segghende. Ghy mannen, broeders hoort my,

14

Simon heeft vertelt hoe dat Godt ierstmael besocht heeft te nemen wten heydenen een volck sijnen naem.

15

Ende met desen accorderen die woerden der propheten, alsoe daer ghescreuen is.

16

Daer nae sal ick wederkeeren, ende wederom optimmeren Dauids tabernakel dat veruallen is, ende sijn veruallinghen sal ic weder om timmeren, ende ic sal oprichten,

17

op dat die ander menschen versoecken moghen den Heere, ende alle die heydenen op die welcke mijnen naem aengheroepen is, ⁺seyt die Heere dese dinghen doende.

+ D

18

Van tbeghin der werelt is Gode bekent sijn werck.

19

Waer om soe ordeele ick datmense niet ongherust en make die wt die heydenen bekeert worden tot Godt,

20

maer datmen tot hen scrijue, dat sij hen wachten van die besmettinghen des afgods beelden, ende van oncuyscheyt, ende versmachte dieren, ende van bloedt.

21

Want Moyses heeft van die oude tijden in elcke steden die ghene die hem vercondighen in die synagogen. Daer hy tot elcke sabbothen ghelesen wort.

22

Doen heuet den Apostelen ende den ouders behaecht met alle die vergaderinghe der gheloouigher, datmen soude kiesen mannen wt henlieden, ende senden tot Antiochien met Paulo ende Barnaba Iudam die toeghenaemt worde Barsabas, ende Silam van die principaelste mannen onder die broeders,

23

⁺scrijuende doer die hant van hen. Die Apostelen ende die ouders ende broeders wenschen den broederen wt den heydenen die in Antiochien ende in Syrien ende Cilicien sijn, salicheyt

+ E

24

Aenghesien dat wy ghehoort hebben datter sommighe wt ons gaende v lieden ontstelt hebben met woerden v zielen omme keerende, den welcken wy gheen beuel en hebben ghegheuen,

25

soe heuet ons tsamen ouer een vergadert sijnde behaecht te kiesen mannen, ende die te senden tot v lieden, met onse alderliefste Barnaba ende Paulo,

26

menschen die hen zielen ouer ghegheuen hebben voer den naem ons Heeren Iesu Christi.

27

Hier om hebben wy ghesonden Iudam ende Silam die welcke sullen selue v oock metten woerden tselue segghen.

28

Want het heeft den heyleghen gheest ende ons goet ghedocht, v lieden anders niet meer lasts op te legghen, dan dese nootelijcke dinghen,

29

⁺dat ghy v onthoudt van tghene dat den afgods beelden gheoffert is, ende van bloet, ende versmachte dieren ende van oncuyscheyt. Van die welcke ghi v seluen bewarende sult wel doen, blijft ghesont.

+ F

30

Dese aldus wech ghesonden sijn ghecomen te Antiochien, ende als die menichte vergadert was, soe hebben sij den brief ouergheleuert.

31

Den welcken als sij ghelesen hadden, soe waren sij verblijdt vanden troost.

32

Maer Iudas ende Silas want sij ooc propheten waren, hebben met veel woerden die broeders vertroost, ende versterct.

33

Ende als sij daer gheweest hadden eenen tijt, soe sijn sij wederghesonden met vreden van die broeders, tot die ghene diese ghesonden hadden.

34

Maer het heeft Sile goet ghedocht daer te blijuen. Ende Iudas is alleen wechghegaen.

35

Maer Paulus ende Barnabas woonden te Antiochien, leerende ende prekende, met veel meer andere het woert Gods.

36

⁺Ende nae een deel daghen soe heeft Paulus tot Barnabam gheseyt, Laet ons wederom gaende die broeders besoecken, doer alle die steden, in die welcke wy dwoert des Heeren ghepreect hebben. Hoe dat sij hen hebben.

+ G

37

Maer Barnabas wilde oock met hem nemen Iohannem die toeghenaemt werde Marcus,

38

Maer Paulo dochte datmen hem niet en behoorde tontfanghen om dat hi van hem ghesceyden was wt Pamphilien, ende met hem niet ghegaen en was int werck.

39

Ende daer is een tweesceydicheyt opgheresen, also dat sij van malcanderen sceydden, ende Barnabas met hem nemende Marcum is ghesceept nae Cypren.

40

Maer Paulus verkiesende Silam is ghereyst, beuolen der gratien Gods vanden broeders.

41

Ende hy doerwandelende Syrien ende Cilicien versterckende die kercken. Ghebiedende te onderhouden die gheboden der Apostelen, ende der ouders.