Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xiiij. Capittel.

1

⁺ENde tis ghesciet te Iconien dat sij tsamen in die synagoge der Ioden ghinghen ende spraken, alsoe datter een seer groote menichte van Ioden ende Griecken gheloofde.

+ A

2

Maer die Ioden die ongheloouich waren hebben opgheruct ende tot gramscappen verweckt die zielen der heydenen, teghen die broeders.

3

Hier om hebben sij daer veel tijts ghebleuen betrouwelijck doende in den Heere, die ghetuyghenis gheuende was den woerde sijnder gratien, gheuende oock datter teekenen ende wonderen ghedaen worden doer hen handen.

4

Maer die menichte der stadt is twistich gheworden, ende die sommighe waren met die Ioden maer die sommighe met die Apostelen.

5

Ende doender eenen op loop ghesciet was van die heydenen ende Ioden met haren princen, dat sij hen scande aendoen souden ende steenen,

6

dit verstaende, sijn sij gheuloden tot die steden van Licaonien, Listren ende Derben, ⁺ende in alle dlantscap rontsomme, ende daer waren sij deuangelie prekende.

+ B

7

Ende een man sadt te Listren cranck in die voeten, cruepel van sijns moeders lichaem, die noyt ghewandelt en hadde.

8

Dese heeft Paulum ghehoort sprekende. Die welck hem aensiende ende siende dat hy tghelooue hadde om salich te worden,

9

soe heeft hy gheseyt met luyder stemmen, Staet recht op v voeten. Ende hy is opghespronghen ende heeft ghewandelt.

10

Ende als die scaren ghesien hadden dat Paulus ghedaen hadde, hebben sij haer stemme opghehauen in die Licaonische sprake segghende, Die goden den menschen ghelijck gheworden sijn nederghedaelt tot ons.

11

Ende sij noemden Barnabam Iouem, maer Paulum Mercurium, want hy was die voerder des woerts.

12

Ende Iupiters priesters die voer die stadt was brenghende stieren ende croonen voer die dooren, wilde metten volcke sacrificie doen.

13

Dwelck als die Apostelen ghehoort hebben Barnabas ende Paulus, ⁺soe sijn sij met haren ghescoerden cleederen wtghespronghen onder die scaren roepende

+ C

14

ende segghende, Ghy mannen waer om doedi dese dinghen? Wy sijn ooc ws ghelijck sterffelijcke menschen, vercondighende v lieden, dat ghy v bekeeren soudt van dese ydelheden totten leuenden Godt, die ghemaect heeft den hemel, ende die eerde ende die zee, ende alle datter in is,

15

die welcke in die voerleden gheboerten alle die heydenen heeft laten wandelen hen weghen.

16

Ende hy en heeft sij seluen voerwaer sonder ghetuyghenisse niet ghelaten, wel doende van den hemel, gheuende reghenen, ende vruchtbarighe tijden, veruullende met spijse ende blijscap onse herten.

17

Ende dit segghende hebben sij nauwelijcs die scaren connen gheswichten, dat sij hen niet en souden sacrificie doen.

18

Maer daer sijn sommighe Ioden ouerghecomen van Antiochien ende van Iconien, die welcke (nae dat sij die scaren omghekeert hadden) hebben Paulum ghesteent ende ghetrocken wter stadt, meynende dat hy doot was.

19

Maer als hem die discipelen omringhelden, soe is hy opstaende in die stadt ghegaen, ende des anderen daechs is hy met Barnabas ghereyst tot in Derben.

20

Ende als sij dier stadt het euangelie ghepreect hadden, ende vele menschen gheleert hadden, soe sijn sij wederom ghecomen te Lystren, ⁺ende Iconien, ende Antiochien,

+ D

21

versterckende die zielen der discipelen, ende vermanende dat sij blijuen souden int ghelooue, ende dat wi moeten doer veel tribulacien comen int rijck Gods.

22

Ende als sij hen lieden priesters ghestelt hadden tot elcker kercken, ende ghebeden hadden met vastenen, soe hebben sij hen den Heere beuolen inden welcken sij ghelooft hadden.

23

Ende voerts doergaende doer Pisidien, sijn sij ghecomen in Pamphilien,

24

ende sprekende het woert des Heeren in Pergen, sijn si nederwaerts ghegaen in Attalien,

25

ende van daer sijn sij te scepe gheuaren na Antiochien, Van waer sij ouerghegheuen waren der gratien Godts, tot dat werck dwelck sij volbrocht hebben.

26

Maer doen sij ghecomen waren ende vergadert hadden die kercke, soe hebben sij vertelt hoe groote dinghen dat Godt met hen ghedaen hadde, ende dat hy den heydenen gheopent hadde die doore des gheloofs,

27

ende sij hebben daer eenen langhen tijt ghewoont by die discipelen.