Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde in der kercken die te Antiochien was waren Propheten ende leeraers onder die welcke was Barnabas ende Simon die ghenoemt worde die swerte, ende Lucius van Cyrenen, ende Manahen mede voesterlinck van Herodes een vanden vier vorsten ende Saulus.

+ A

2

Ende als sij den Heere dienden ende vasten, soe heeft die heylighe gheest gheseyt, Sceyt my Saulum ende Barnabam wt, tot den wercke daer icse toe aenghenomen hebbe.

3

Doen hebben sij vastende ende biddende, ende hen die haden oplegghende die laten gaen.

4

Ende sij waerlijck ghesonden vanden heylighen gheest, sijn wech ghereyst na Seleuciam, ende van daer sijn sij te scepe gheuaren tot Cypers.

5

Ende doen sij ghecomen waren tot Salaminen, soe preecten sij dwoert Gods in die synagogen der Ioden. Sy hadden ooc Iohannem in den dienst.

6

Ende doen sij alle dat eylant doergaen hadden tot Paphum toe, hebben sij eenen man gheuonden die een toouenaer was eenen valschen propheet, een Iode, wiens naem was Bariesu,

7

die welcke was metten stadthouder Sergio Paulo eenen verstandighen man. ⁺Dese gheroepen hebbende Saulum ende Barnabam heeft begheert te hooren dwoert Gods.

+ B

8

Maer Elimas die toouenaer (want alsoe wort sijnen naem beduyt) heeft hen wederstaen, begherende den stadthoudere af te keeren vann tghelooue.

9

Maer Saulus die ooc Paulus hiet, veruult metten heylighen gheest siende hem aen,

10

heeft gheseyt, O ghi vol van alle bedroch ende alle scalcheyt des duyuels kint, viant van alle rechtuerdicheyt, ghy en houdt niet op van te verkeeren die rechte weghen des Heeren.

11

Ende nu siet die hant Gods op v, ende ghy sult blent sijn die sonne niet siende een wijle tijts. Ende ter stont heeft hem oueruallen een donckerheyt ende duysternisse. Ende rontsomme gaende socht hi iemant die hem die hant gheuen soude.

12

Doen die stadthoudere dit werck ghesien hadde, soe heeft hy ghelooft, verwonderende hen van die leeringhe des Heeren.

13

Ende als van Papho ghesceept waren Paulus ende die met hem waren, ⁺soe sijn sij ghecomen te Pergen van Pamphilien. Maer Iohannes van hen sceydende, is wederom ghekeert in Ierusalem.

+ C

14

Maer sij gaende doer Pergen sijn ghecomen in antiochien van Pisidien. Ende ghegaen sijnde in die synagoge op den sabbothsdach, hebben sij gheseten.

15

Ende nae die lesse der wet ende der Propheten, soe hebben die princen der synagogen tot hen ghesonden segghende, Ghi mannen broeders eest sake dat in v lieden eenich woert der vermaninghen is totten volcke segt dat.

16

Ende Paulus op staende, ende metter handt stillicheyt ghebiedende, heeft gheseyt, Ghi Israhelijtsche mannen ende soe wie Godt vreeset. Hoort,

17

Des volcs van Israels Godt heeft onse vaderen vercoren, ende ons volck verheuen doen sij vreemdelinghen waren int lant van Egypten, ende doer eenen hooghen arm heeft hy die daer wt gheleyt,

18

ende tot den tijt van veertich iaren heeft hy hen manieren verdraghen in die woestijne.

19

⁺Ende verderuende seuen na tien van volcke int lant van Chanaan, heeft hy hen metten lote hen lant ghedeylt,

+ D

20

omtrent nae vierhondert ende vijftich iaren, ende daer na heeft hy hen rechters ghegheuen tot Samuel den propheet.

21

Ende daer na hebben sij eenen coninck begheert, ende hy heeft hen ghegheuen Saul Cis sone, eenen man van Beniamins gheslachte veertich iaren.

22

Ende doen hy dien wechghedaen hadde, soe heeft hy hen lieden verwect Dauid den coninck, den welcken hy ghetuyghenis gheuende heeft gheseyt, Ic heb gheuonden Dauid den sone van Iesse, eenen man nae mijn herte, die alle mijnen wille doen sal.

23

Wt den sade van desen heeft Godt, na sijn belofte Israel voerts ghebracht eenen salichmaker Iesum,

24

⁺als Iohannes preecte voer daenschijn van sijnder toecoemst het doopsel der penitencien alle den volck van Israel.

+ E

25

Maer doen Iohannes sijnen loop volbracht, soe seyde hy. Ic en ben die niet den welcken ghi my meynt te sijne, maer siet hi coemt na my. Van wiens voeten ick niet weerdich en ben die scoenen te ontbinden.

+ 26

Ghy mannen ghi broeders, kinderen des gheslachts van Abraham, ende die onder v lieden Godt vreesen v lieden is dwoert van deser salicheyt ghesonden.

27

Want die te Ierusalem woonden ende haer princen, desen niet kennende ende die stemmen der propheten die tot allen sabbathen ghelesen worden, hebben die ordeelende volbrocht,

28

ende gheen sake der doot in de hem vindende, hebben sij van Pilato begheert dat sij hem dooden souden.

29

Ende als sijt al volbracht hadden dat van hem ghescreuen was, soe hebben sij hem vanden houte doende in een graf gheleyt.

30

Maer Godt heeft hem van der doot verwect opden derden dach,

31

die welcke is ghesien gheweest tot veel daghen den ghenen die met hem op ghegaen waren van Galileen in Ierusalem, ⁺die tot nu toe sijn ghetuyghen sijn totten volcke.

+ F

32

Ende wy vercondighen v die beloftenisse die tot onsen vaderen ghedaen is. Want dese heeft Godt volbracht onsen kinderen verweckende Iesum.

* 33

Ghelijck oock inden tweeden Psalm ghescreuen is. Mijn sone sijdi, ick heb v heden voerts ghebracht.

34

Maer dat hi hem heeft verwect vander doot die niet wederkeeren en sal in die verderffenisse heeft hi alsoe gheseyt. Want ic sal v die heylighe beloften van Dauids ghetrouwe gheuen.

35

Ende daerom seyt hy noch elders, Ghy en sult uwen heylighen niet gheuen te sien die verderffenisse.

36

Want als Dauid in sijn gheslachte ghedient hadde den wille Gods, soe is hy ontslapen, ende versaemt tot sijnen vaderen, ende hy heeft verderffenisse ghesien.

37

Maer den welcken Godt verwect heeft, die en heeft gheen verderffenisse ghesien.

38

Hier om sij v kenlijck ghi mannen ghi broeders, dat v lieden doer desen die vergiffenisse der sonden vercondicht wort, van alle tghene waer af ghy in die wet Moysi niet en hebt moghen gherechtuerdicht worden.

39

⁺In desen wort gherechtuerdicht alle die daer in ghelooft.

+ G

40

Daer om siet toe, dat v niet ouer en come tghene datter ghescreuen is in die propheten,

41

Siet aen die versmaders, ende verwondert v, ende verswijnt. Want een werck, wercke ic in v daghen, een werck dat ghy niet gheloouen en sult, eest dat v iemant vertelt.

42

Ende als sij wtghinghen soe baden sij dat sij ten naestcomende sabboth hen dese woerden spreken wilden.

43

Ende als die synagoge ghesceyden was, soe sijnder veel vanden Ioden ende vanden Godts dienstighen wtlanders Paulum ende Barnabam gheuolcht, die welcke sprekende raedden hen, dat sij blijuen souden in die gratie Gods.

+ 44

Maer opden naesten sabboth soe is by nae die gheheel stadt vergadert om te hooren dat woort Godts.

45

Ende die Ioden siende die scaren sijn vol nijdicheyt gheworden, ende sij seyden teghen die dinghen die van Paulo gheseyt worden, blasphemerende.

46

Doen hebben

[p. *842]

Paulus ende Barnabas volstandelijck gheseyt, V lieden moest ierstmael ghesproken worden het woert Godts, maer want ghy dat van v stoot, ende v seluen onweerdich ordeelt des eewichs leuens, siet soe worden wy ghekeert tot die heydenen,

47

want alsoe heeft ons die Heere gheboden. Ick heb v ghestelt tot een licht der heydenen dat ghy moecht wesen tot een salicheyt tot dat wterste van eertrijck.

48

Ende die heydenen dit hoorende hebben hen verblijdt, ende sij glorificeerden het woert des Heeren, ende sij hebben ghelooft alle die te voren gheordineert waren totten eewighen leuen.

49

Ende dwoert des Heeren worde breedt ghesaeyt ouer alle dlantscap.

50

Maer die Ioden hebben opgheruct Godtsdienstighe ende eerlijcke vrouwen ende douerste vander stadt, ende sij hebben een veruolghinghe verwect teghen Paulum ende Barnabam, ende sij hebbense verdreuen van haren palen.

51

Maer sij scuddende dat stof haerder voeten op henlieden sijn ghecomen te Iconien.

52

Ende die discipelen werden oock veruult met blijscap ende metten heylighen gheest.