Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

+ 1

⁺ENde opden seluen tijt heeft Herodes die coninc die handen aengheslaghen dat hy pijneghen soude sommighe vander kercken.

+ A

2

Ende hi heeft ghedoot Iacobum Iohannis broeder metten sweerde.

3

Maer siende dattet den Ioden wel behaechde, soe heeft hy daer toe ghedaen dat hy ooc Petrum soude vanghen. Ende het waren die daghen der ongheheefder brooden.

4

Den welcken als hy gheuanghen hadde, soe heeft hy dien inden kercker ghesteken, leuerende hem vier quaertieren ruyters om te bewaren. Willende nae Paesschen hem voer tvolck wt brenghen.

5

Ende Petrus worde bewaert inden kerker. Maer tghebedt ghesciede, sonder ophouden vander kerken tot Godt, voer hem.

6

Ende doen hem Herodes soude wtbrenghen, opden seluen nacht was Petrus slapende tusschen twee ruyters ghebonden met twee ketenen, ende die bewaerders voer die doore bewaerden den kerker.

7

Ende siet die enghel des Heeren heeft by hem ghestaen, ende een licht heeft ghescenen in die woonstede, ende slaende Petrus sijde heeft hy hem ghewect segghende. Staet op raschelijck. Ende die ketenen vielen van sijnen handen.

8

Ende die enghel heeft tot hem gheseyt, Gort v omme, ⁺ende doet v cousen aen. Ende hy heeft alsoe ghedaen. Ende hy heeft hem gheseyt, Doet v cleedt om v, ende volcht my.

+ B

9

Ende wtgaende volchde hy hem. Ende hy en wist niet dattet waer was datter ghedaen worde doer den enghel, maer hy meynde dat hy een visioen sach.

10

Ende gaende doer dierste ende die tweede bewaernisse, sijn sij ghecomen tot die yseren poorte die ter stadt waerts leydt, die welcke is voer hen van selfs openghegaen. Ende wt gaende sijn sij een strate voerts ghegaen, ende ter stont is die enghel van hem ghesceyden.

11

Ende Petrus tot sij seluen ghecomen sijnde, heeft gheseyt, Nu weet ick warachtelijck dat die Heere sijnen enghel ghesonden heeft, ende heeft my verlost wt Herodes handt, ende van alle tverwachten des Ioetsche volcs.

* 12

Ende dit bedinckende is hy ghecomen tot dat huys van Maria Iohannis moeder, die toeghenaemt is Marcus, daer der veel vergadert waren ende biddende.

13

Ende doen hy aen die doore des ingancs clopte, soe isser een ionghe dochter voert ghegaen om te siene ghenaemt Rhode.

14

⁺Ende als sij Petrus stemme ghekent heeft van blijscappen en heeft sij die doore niet open ghedaen, maer innewaerts loopende heeft sij ghebootscapt dat Petrus voer die doore stont.

+ C

15

Maer sij seyden tot haer, Ghy raest, Maer sij seyde vast voer waer dattet alsoo was. Maer sij seyden, Tis sijnen enghel.

16

Maer Petrus bleef ghestadelijck cloppende. Ende als sij open ghedaen hadden, soe hebben sy hem ghesien, ende worden verbaest.

17

Ende hy een teeken gheuende metter hant dat sij swijghen souden, heeft hen vertelt, hoe dat hem die Heere wten kercker gheleyt hadde. Ende hy heeft gheseyt, Bootscapt Iacobo ende den broeders dese dinghen. Ende wtgaende is hy wechghegaen in een ander plaetse.

18

Ende alst dach gheworden was, soe isser een groote beroerte gheweest onder die ruyters, wat van Petro ghesciet was.

19

Maer doen Herodes hem hadde doen soecken ende niet gheuonden en hadde, nae dat hy ondersoeck ghedaen hadden vanden wachters, ⁺soe heeft hy die doen opleyden, ende nederwaerts gaende van Iudeen in Cesarien is hy daer ghebleuen.

+ D

20

Ende hi was gram op die Tyeriers ende Sidoniters. Maer sij sijn eendrachtelijck tot hem ghecomen ende hebbende toeghemaect Blastum die des concincs camerlinc was, begheerden sij paeys, om dat hen landen van hem ghespijst worden.

21

Ende op eenen ghesetten dach heeft Herodes ghecleedt met coninclijcken habijte gheseten op den rechter stoel, ende hy hadde een langhe reden tot hen lieden.

22

Ende tvolck riep hem toe. Dit sijn Godts stemmen ende gheens menschen.

23

Maer ter stont heeft hem die enghel Godts gheslaghen, om dat hy Gode die eere niet ghegheuen en hadde, ende verteert sijnde vanden wormen is hy ghestoruen.

24

Ende het woert des Heeren wies,

[p. *841]

ende worde vermenichfuldicht.

25

Maer Barnabas ende Saulus sijn wederghekeert van Ierusalem hebbende den dienst voldaen, hebbende met hen ghenomen Iohannem die toeghenaemt wordt Marcus.