Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xi. Capittel.

1

⁺ENde die Apostelen ende broeders die in Iudeen waren hebben ghehoort, dat die heydenen oock het woert Godts ontfanghen hadden.

+ A

2

Ende doen Petrus opwaerts comen was te Ierusalem, soe hebben teghen hem ghescil ghehadt die wter besnijdenissen waren,

3

segghende, Waer om sijdi inghegaen tot die onbesneden mannen, ende hebt met hen lieden gheten?

4

Maer Petrus beghinnende heeft hen wtgheleyt dat veruolghen segghende,

5

Ick was in die stadt van Ioppe biddende, ende heb ghesien in die opghehauenheyt mijns gheests een visioen, datter nederdalende een vat als een groot lijnen cleedt met vier eynden nederghelaten worde vanden hemel, ende is ghecomen tot by my.

6

Int welcke ick siende, bemercte ende sach viervoetighe dieren der eerden ende beesten, ende cruypende ghedierte, ende voghelen des hemels.

7

Ende ick heb oock ghehoort een stemme tot my segghende, Staet op Peeter, slaet doot, ende etet.

8

Maer ick seyde, gheensins Heere, ⁺want iet ghemeyns oft onreyns en is noyt in mijnen mont gegaen.

+ B

9

Endedie stemme heeft gheantwoert ten tweeden mael vanden hemel. Wat Godt ghesuyuert heeft, en noemt dat ghy niet ghemeyn.

10

Ende dit ghesciede drijmael, die dinghen sijn alle weder om opghenomen inden hemel.

11

Ende siet drij mannen hebben ter stont ghestaen int huys daer ick in was, ghesonden van Cesarien aen my.

12

Ende den gheest heeft my gheseyt, dat ick met henlieden gaen soude, niet twijfelende. Ende met mij sijn oock ghecomen dese ses broeders ende wy sijn ghegaen in des mans huys.

13

Ende hy heeft ons

[p. *840]

vertelt hoe dat hy ghesien hadde eenen enghel in sijn huys staende ende tot hem segghende, Sendt tot Ioppen, ende doet halen Simon die toeghenaemt wort Petrus,

14

die sal v woerden spreken doer die welcke ghy sult salich sijn, ende v gheheel huysghesin.

15

Ende doen ick hadde begonst te spreken, soe is den heylighen gheest op hen gheuallen, ghelijck hy oock op ons viel int beghinsel.

16

Ende ick worde ghedachtich des woerts des Heeren als hy seyde, Iohannes heeft voerwaer ghedoopt metten water, maer ghy sult ghedoopt worden metten heylighen gheest.

17

Hier om eest dat hen Godt die selue gratie ghegheuen heeft, ghelijck ons ooc die ghelooft hebben inden Heere Iesum Christum. Wie was ick dat ick Godt soude hebben moghen verbieden?

18

Dese dinghen ghehoort hebbende, hebben sij ghesweghen, ⁺ende Godt gheglorificeert segghende, Soe heeft Godt dan den heydenen oock penitencie ghegheuen tot dat leuen.

+ C

19

Ende die ghene die verstroyt waren van die tribulacie die ghesciet was ten tijden van Stephanus sijn voerwaer doerghereyst tot Phenicen ende Cypers ende Antiochien, niemanden dwoert sprekende dan alleen den Ioden.

20

Ende daer warender sommighe van hen lieden mannen van Cypers ende Cyrenen, die welcke als sij in Antiochien comen waren spraken tot die Griecken, vercondighende den Heere Iesum.

21

Ende die hant des Heeren was met hen, ende daer is een groot ghetal van gheloouigher totten Heere bekeert.

22

Ende dit woert is gecomen tot die ooren der kercken die te Ierusalem was, van dese dinghen, ende sij hebben ghesonden Barnabam tot Antiochien.

23

Die welcke als hy daer ghecomen was, ende ghesien hadde die gratie Gods, soe heeft hy hem verblijdt, ende hy vermaendese alle met een opset des herten te blijuen inden Heere,

24

want hi was een goet man ende vol vanden heylighen gheest ende van tghelooue. ⁺Ende daer is een groote scare totten Heere toegheuoecht.

+ D

25

Ende hy is ghereyst nae Tharsen om Saulum te soecken, den welcken als hy vonden hadde, heeft hy gheleydt tot Antiochien.

26

Ende sij hebben daer een heel iaer verkeert in die kercke, ende sij hebben een groote scare gheleert. Alsoe dat die discipelen ierstmael in Antiochien Christenen ghenaemt worden.

27

Ende in dese daghen sijnder propheten ouer comen van Ierusalem in Antiochien,

28

ende opstaende een van hen lieden Agabus ghenoemt, heeft te kennen ghegheuen doer den gheest datter eenen grooten dieren tijt comen soude ouer den gheheelen omganck der aerden. Welck is gheweest onder Claudius.

29

Maer die discipelen (na dat sij elck hadden) hebben voer hen ghenomen elck wat ten behoeue te senden den broeders die te Ierusalem woonden,

30

dwelck sij oock ghedaen hebben, seyndende tot die ouders, doer die handen van Barnabas ende Paulus.