Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde daer was een man in Cesarien Cornelius ghenoemt een honderste man, van die bende die ghenoemt wort die Italiaensche,

+ A

2

Godt vruchtich, ende Godt vreesende met alle sijnen huyse, veel almissen doende den volcke. Ende altijt Godt biddende,

3

dese heeft in een visioen ghesien openbaerlijck, omtrent die neghende vre des daechs, eenen enghel Gods tot hem incomende ende hem segghende, Cornelis.

4

Ende hy hem aensiende met vreesen beuanghen heeft gheseyt, Wie sijdi Heere? Ende hy heeft tot hem gheseyt, V ghebeden ende almissen sijn in ghedenckenissen opgheclommen voer Godts aensicht.

5

Ende nu siendt mannen in Ioppen ende doet halen eenen Simon die toeghenaemt wort Petrus,

6

dese is gheherbercht by eenen Simon den leertouwere, wiens huys is by die zee, dese sal v segghen wat ghy doen moet.

7

Ende doen die enghel wech ghegaen was die hem toespraeck, soe heeft hy twee van sijnen huysghenooten gheroepen, ⁺ende eenen chrijschman die den Heere vreesde, van die ghene die hem onderdanich waren.

+ B

8

Den welcken als hijt al vertelt hadde, heeft hy die ghesonden in Ioppen.

9

Maer tsanderdaechs doen sij ouer wech reysden, ende bijder stadt quamen, soe is Petrus gheclommen opt opperste des huys, om te bidden omtrent die seste vre.

10

Ende doen hy hongher creech, soe heeft hy willen ontbijten. Ende die wijle dat sij teten bereydden, soe is hem ouercomen een optrecken des gheests,

11

ende hy heeft ghesien den hemel open ende datter een vat nederdalende ghelijck een groot lijnen cleedt met vier eynden worde nederghelaten vanden hemel tot op die eerde.

12

Waer in dat waren alderhande vieruoetighe beesten, ende cruypende dieren der eerden, ende voghelen des hemels.

13

Ende daer is een stemme tot hem ghesciet, Staet op Peeter, slaet doot, ende eet.

[p. *839]

14

Ende Petrus seyde, Verre sij dat Heere. Want ick en heb noyt iet ghemeyns oft onreyns gheten.

15

Ende die stemme seyde wederom ten tweeden mael tot hem. Tghene dat Godt ghereynicht heeft, en noemt ghi dat niet onreyn.

16

Ende dat is ghesciet tot drij reysen. Ende ter stont is dat vat wederom ghenomen inden hemel.

17

Ende doen Petrus in sij seluen twijfelde wat dit visioen was, ⁺dat hy ghesien hadde. Siet soe hebben die mannen die van Cornelius ghesonden waren vraghende nae Simons huys, voer die doore ghestaen.

+ C

18

Ende als sij gheroepen hadden, soe vraechden sij oft Simon die Petrus toeghenaemt wort daer herberghe hadde.

19

Ende toen Petrus van dat visioen dachte, soe heeft den gheest tot hem gheseyt, Siet drij mannen soecken v.

20

Hier om staet op, ende gaet nederwaerts, ende gaet met hen lieden niet twijfelende, want ick hebse ghesonden.

21

Ende Petrus nederwaerts gaende tot die mannen heeft gheseyt. Siet, ick bent die ghi soect, wat is die sake daerom dat ghi ghecomen sijt?

22

Die welcke hebben gheseyt, Cornelius die honderste man een rechtuerdich man, ende Godt vreesende, ende ghetuyghenis hebbende van alle dat volck der Ioden, heeft een antwoerde ontfanghen van den heyleghen enghel, dat hy v soude doen halen in sijn huys, ende woerden van v hooren.

23

⁺Hier om heeft hijse binnen leydende ter herberghen ontfanghen. Maer tsanderdaechs opstaende is hy ghegaen met hen, ende sommighe van den broeders van Ioppe hebben hem gheselscap ghehouden.

+ D

24

Ende des anderen daechs is hy ghecomen in Cesarien. Ende Cornelius verwachte hen lieden, hebbende tsamen gheroepen sijn maghen ende naeste vrienden.

25

Ende tes ghesciet doen Petrus inghecomen was dat hem Cornelius te ghemoete is comen, ende vallende hem te voete heeft hy aenbeden.

26

Maer Petrus heeft hem opghehauen segghende, Staet op. Ic ben selue ooc een mensch.

27

Ende sprekende met hem is hy binnen ghegaen, ende heefter vele gheuonden, die daer vergadert waren,

28

ende hy heeft tot hen lieden gheseyt, Ghy weet wel hoe dat een afgrijselijck dinck is eenen Ioetschen man versaemt te worden, oft te gaen tot eenen vreemdelic, maer Godt heeft mij ghetoont dat ic gheenen mensch ghemeyn oft onreyn en soude heeten.

29

⁺Waer om ick sonder eenich vertoeuen ghecomen ben, als ick gheroepen was. Hier om vraghe ick, om wat sake dat ghy my hebt doen halen?

+ E

30

Ende Cornelius heeft gheseyt, Van den vierden dach voer desen tot deser vren toe, was ick biddende ter neghenster vren in mijn huys, ende siet een man stont voer my in een wit cleedt ende seyde,

31

Corneli v ghebedt is verhoort ende v almissen sijn ter ghedenckenisse comen voer Gods aenschijn.

32

Daerom seyndt in Ioppen ende doet halen Simonen die Petrus toe ghenaemt wort, Dese is gheherbercht in Simons des leetouwers huys, by die zee.

33

Aldus heb ick haestelijck tot v ghesonden, ende ghy hebt wel ghedaen comende. Hier om sijn wij nu allegader teghenwoerdich in v aenschijn, om te hooren alle dat v vanden Heere gheboden is.

+ 34

Ende Petrus sijnen mont opendoende, heeft gheseyt. Ick heb inder waerheyt beuonden, dat Godt gheen wtnemer der personen en is.

35

Maer in alderley volck, soe wie Godt vreest, ende rechtuerdicheyt doet, ⁺die is hem ghenaem.

+ F

36

Godt heeft het woert ghesonden den kinderen van Israel vercondighende vrede doer Iesum Christum (Want dese is die Heere van allen)

37

Ghy weet het woert datter ghesciet is ouer gheheel Iudeen, want beghinnende van Galileen (nae tdoopsel dat Iohannes ghepreect heeft)

38

hoe dat Godt Iesum van Nazareth, ghesalft heeft metten heylighen gheest, ende met die cracht, die welcke is doerghegaen weldoende, ende ghenesende alle die verdruct waren vanden duyuel. Want Godt was met hem.

39

Ende wy sijn ghetuyghen van al dat hy ghedaen heeft in dlantscap der Ioden ende in Ierusalem, dien sij ghedoot hebben hanghende hem aen een hout.

40

Desen heeft Godt verwect opden derden dach, ende hy heeft hem verleent gheopenbaert te worden,

41

niet alle den volcke, maer den ghetuyghen te vooren van Godt gheordineert, ons die met hem gheten ende ghedroncken hebben, nae dat hy van die dooden verresen is gheweest.

42

⁺Ende hy heeft ons gheboden den volcke te preken ende te ghetuyghen, dat hi is van Godt ghestelt een richter der leuender ende der dooder.

+ G

43

Desen gheuen alle die Propheten ghetuyghenis, dat sij verghiffenisse van sonden ontfanghen souden doer sijnen naem, alle die in hem gheloouen.

44

Doen Petrus noch dese woerden sprack, soe is den heyleghen gheest gheuallen op alle die ghene diet woert hoorden.

45

Ende die gheloouighe wter besnijdenissen, die met Petro ghecomen waren hebben hen seer verwondert, om dat die gratie des heylichs gheests op die heydenen wtghestort was.

46

Want sij hoordense spreken met tonghen ende Godt grootelijk louende.

47

Doen heeft Petrus gheantwoert. Mach oock iemant dwater keeren dat dese niet en souden ghedoopt woorden die den heyleghen gheest ontfanghen hebben ghelijck wy?

48

Ende hy heeft gheboden datmense doopen soude inden naem des Heeren Iesu Christi. * Doen hebben sij hem ghebeden, dat hy by hen blijuen soude een deel daghen.