Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .ix. Capittel.

+ 1

⁺ENde Saulus noch blasende dreyghementen ende dootslaghen teghen des Heeren discipelen is ghegaen totten prince der priesteren,

+ A

2

ende heeft van hen brieuen begheert nae Damascum aen die synagogen. Op dat hy (waert sake dat hy eenighe van desen weghe vonde mans ende vrouwen) die soude moghen gheuanghen brenghen in Ierusalem.

3

Ende doen hy reysde ouer wech, soe eest ghesciedt dat hy by Damascum quam, ende ouersienlijck soe heeft hem omscenen een licht wten hemel.

4

Ende vallende op die eerde, heeft hy een stemme ghehoort segghende tot hem Saule Saule waerom veruolchdi my?

5

Die welcke heeft gheseyt, Wie sijdi Heere? Ende hy seyde, Ick ben Iesus den welcken ghi veruolcht, het is v hart teghen steeck yser metten voeten te stooten.

6

Ende hy beuende ende verbaest sijnde heeft gheseyt, Heere wat wildi dat ic doe?

7

Ende die Heere seyde tot hem, Staet op, ende gaet in die stadt, ende v sal gheseyt worden wat ghy doen moet. ⁺Ende die mannen die met hem reysden stonden verbaest, hoorende wel die stemme maer niemant siende.

+ B

8

Ende Saulus is vander eerden opghestaen, ende met openen ooghen en sach hy niet. Ende sij hebben hem byder hant treckende gheleyt in Damasco.

9

Ende hy was drij daghen niet siende, ende hy en heeft niet gheten noch ghedroncken.

10

Ende daer was een discipel in Damasco Ananias ghenaemt. Ende tot dien heeft die Heere in een visioen gheseyt, Anania. Ende die heeft gheseyt, Siet hier ben ick Heere.

11

Ende die Heere tot hem, Staet op ende gaet in die strate, die ghenoemt wort die rechte, ende soect Iudas huys

[p. *838]

eenen ghenaemt Saulus van Tharsen, want siet hy bidt.

12

(Ende hy heeft ghesien eenen man Ananias ghenoemt incomende ende de handen op hem legghende, op dat hy tghesichte wederom ontfanghen soude)

13

Maer Ananias heeft gheantwoert, Heere ic heb van veel luyden ghehoort van desen man. Hoe veel quaets dat hy uwen heyleghen ghedaen heeft in Ierusalem,

14

⁺ende dese heeft macht van die princen der priesteren te binden alle die ghene die uwen naem aenroepen.

+ C

15

Maer die Heere heeft tot hem gheseyt, Gaet henen, want dese is my een wtuercoren vat om te draghen mijnen naem voer die heydenen, ende coninghen, ende die kinderen van Israel.

16

Want ick sal hem toonen hoe veel dat hy sal moeten om mijnen naem lijden.

17

Ende Ananias is wech ghegaen, ende is ghecomen int huys, ende leggende op hem die handen heeft hy gheseyt, Saule broeder, die Heere Iesus heeft my ghesonden die v gheopenbaert heeft op den wech daer ghy quaemt, op dat ghi sien soudt, ende vervult worden metten heyleghen gheest.

18

Ende ter stont sijn van sijnen ooghen gheuallen als scellen, ende hy heeft tghesicht weder ontfanghen, ende opstaende werde hi ghedoopt.

19

⁺Ende als hi spijse ghenomen hadde, is hi versterct gheweest. Ende hi heeft gheweest by die discipelen die te Damasco waren sommighe dagen.

+ D

20

Ende ter stont gaende in die synagogen preecte hi Iesum dat dese die sone Gods is.

21

Ende sij verwonderden hen seer alle diet hoorden, ende sij seyden. En is dit niet die ghene die te Ierusalem veruolchde alle die desen naem aenriepen, ende is daer om hier ghecomen dat hy die ghebonden soude leyden tot die princen der priesteren?

22

Maer Saulus worde noch veel meer versterct ende hy bescaemde die Ioden die te Damasco woonden vast betuyghende dat dese Christus is.

* 23

Maer alser veel daghen ouerleden waren, soe hebben die Ioden eenen raet ghesloten dat sij hem dooden souden.

24

Maer hen laghen sijn Saulo ter kennissen ghecomen. ⁺Ende sij bewaerden oock die poorten sdaechs ende snachts, om dat sij hem dooden souden.

+ E

25

Ende die discipelen hem des nachts nemende, hebben hem ouer den muer af ghelaten, nederlatende in een mande.

26

Ende doen hy ghecomen was in Ierusalem, soe poochde hi hem te versamen met die discipelen, ende sij ontsaghen hem allegader niet gheloouende dat hy een discipel was.

27

Maer Barnabas hem nemende heeften gheleydt by die Apostelen, ende hy heeft hen vertelt, hoe dat hy opden wech ghesien hadde den Heere, ende dat hy hem ghesproken hadde, ende hoe dat hy in Damasco betrouwelijck ghedaen hadde in den naem Iesu.

28

Ende hi was met hen ingaende ende wtgaende in Ierusalem, ende betrouwelijck doende inden naem des Heeren.

29

Hy sprack oock tot die heydenen, ende hy disputeerde metten Griecken, maer sij begheerden hem te dooden.

30

Dwelck als die broeders vernomen hadden, soe hebben sij hem voerts gheleyt tot Cesarien, ende laten gaen nae Tarsen.

31

Aldus hadde die kercke ouer geheel Iudeen ende Galileen ende Samarien vrede, ⁺ende sij worde ghesticht wandelende in die vreese Gods, ende met den troost des heylighen gheest worde sij veruult.

+ F

32

Ende het is ghesciet dat Petrus (doen hy alomme doer ghinck) quam tot die heylighen die te Lidde woonden.

33

Ende hy heeft daer eenen man gheuonden Eneas ghenaemt, acht iaren ligghende te bedde die welcke was ghichtich.

34

Ende Petrus seyde tot hem, Enea die Heere Iesus Christus maect v ghesont, staet op ende maect v bedde selue. Ende ter stont is hi opghestaen.

35

Ende sij hebben alle hem ghesien die te Lidden woonden, ende te Saronen, die welcke sijn bekeert totten Heere.

36

Ende in Ioppe was een discipulinne Tabitha ghenaemt, dwelck te segghen is Dorcas. Dese was vol goeder wercken, ende almissen die sij dede,

37

ende tis ghesciet in dien daghen dat sij sieck sijnde starf. Die welck (als sijse ghewasschen hadden) hebben haer op den solder gheleyt.

38

Ende want Ioppe by Lidda was, soe hebben die discipelen (hoorende dat Petrus daer binnen was) twee mannen ghesonden tot hem biddende. En wilt v niet laten verdrieten tot ons te comen.

39

Ende Petrus opstaende is met hen comen. ⁺Ende doen hy daer comen was, soe hebben sij hem op den solder gheleyt, ende alle die weduwen hebben rontsomme hem ghestaen al weenende, ende toonende hem die onderrocken ende ouer cleederen die hen Dorcas maecte.

+ G

40

Ende als sij alle daer wtgheworpen waren, soe heeft Petrus sijn knien buyghende ghebeden, ende totten lichaem ghekeert sijnde heeft hy gheseyt, Tabitha staet op. Ende sij heeft haer ooghen open ghedaen ende Petrum ghesien hebbende, is sij recht op gheseten.

41

Ende gheuende haer die hant heeft haer opghericht. Ende als hy die heylighen ende weduwen gheroepen hadde, soe heeft hy die leuende ouerghegheuen.

42

Ende dit is kenlijck gheworden ouer gheheel Ioppen, ende daer heefter vele inden Heere ghelooft,

43

Ende tis ghebuert dat hy veel daghen bleeft te Ioppe by eenen Simon eenen leertouwere.