Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺MAer in die daghen als tghetal der discipelen meerder worde, soe is daer een murmuratie opgheresen der Griecken teghen die Hebreussche, om dat in den daghelijcschen dienst hen weduwen versmaet worden.

+ A

2

Ende die twaelue tsamen roepende die menichte der discipelen, hebben gheseyt, Ten is niet recht dat wy souden verlaten het woert Gods, ende dienen ter tafelen.

3

Daerom broeders besiet wt v lieden seuen mannen van goeder ghetuyghenis, vol vanden heyleghen gheest, ende wijsheyt, die wij moghen stellen ouer dit werck.

4

Maer wy sullen ons neerstelijck becommeren met bedinghe, ⁺ende metten dienst des woerts.

+ B

5

Ende die redene behaechde voer alle die menichte. Ende sij hebben ghecoren Stephanum eenen man vol van ghelooue, ende vanden heyleghen gheest, ende Philippum ende Prochorum, ende Nicanorem, ende Timonem, ende Parmenam ende Nicolaum den vremdelinck van Antiochien.

6

Dese hebben sij ghestelt voer daenschijn der Apostelen, ende biddende hebben sij die handen op hen gheleyt,

7

Ende dwoert Gods wies, ende tghetal der discipelen werde seer vermenichfuldicht in Ierusalem. ⁺Want een groote scare der priesteren was onderdanich den ghelooue.

+ C

+ 8

Maer Stephanus vol gratien ende stercheyt dede groote wonderen, ende teekenen onder tvolck.

9

Maer daer isser sommighe op ghestaen vander synagogen die ghenoemt wort der Libertinen ende van die van Cyrenen, ende van Alexandrien ende der gheender die van Cilicien ende Asien waren disputerende met Stephanus,

10

ende sij en conden niet wederstaen der wijsheyt ende den gheest die daer sprack.

11

Doen hebben sij mannen toeghemaect, die segghen souden dat sij hem hadden hooren segghen woerden van blasphemie teghen Moysen ende teghen Godt.

12

⁺Aldus hebben sij, ende die ouders ende die Scriben beroert, ende ouer een loopende hebben sij hem ghegrepen, ende ghebracht inden raet,

+ D

13

ende sij hebben valsche ghetuyghen ghestelt die segghen souden. Dese mensch en houdt niet op van te spreken woerden teghen die heyleghe plaetse, ende die wet.

14

Want wy hebben hem hooren segghen, dat desen Iesus Nazarenus verderuen sal dese plaetse, ende veranderen sal die insettinghen die Moyses ons ghegheuen heeft.

15

Ende alle die inden raet saten, hem aensiende, hebben sijn aensicht ghesien, als daensicht van eenen enghel.