Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺MAer een man ghenaemt Ananias met Sapphira sijn huysvrouwe, heeft eenen acker vercocht,

+ A

2

ende hy heeft met bedroch onthouden van den prijs des ackers, met weten van sijnder huysvrouwen, ende brenghende een deel heeft hy dat gheleyt voer der Apostelen voeten.

3

Ende Petrus heeft gheseyt, Anania. Waer om heeft sathanas v herte ghetempteert te lieghen den heyleghen gheest, ende te ontrecken van den prijs des ackers?

4

En soude dien niet bliuende v ghebleuen hebben? ende vercocht sijnde en was den prijs niet in v macht? Waer om hebdi dit dinck in v herte ghestelt? Ghi en hebt den menschen niet ghelooghen, maer Gode,

5

ende Ananias dese woerden hoorende is gheuallen ende heeft sijnen gheest ghegheuen. Ende daer is een groote vreese ghecomen op alle die ghene diet ghehoort hebben.

6

Ende die ionghelinghen opstaende hebben hem wech ghedaen, ende wtdraghende hebben sij hem begrauen.

7

⁺Ende tes gheweest omtrent den tijt van drij vren, dat sijn huysvrouwe, niet wetende wat daer ghesciet was, ooc binnen ghecomen is.

+ B

8

Ende Petrus heeft haer gheantwoort, Segt my vrouwe hebdi den acker soe veel vercocht? Ende sij heeft gheseyt, Iae wy, al soe veel.

9

Ende Petrus tot haer. Waer toe hebdi waerlijck ouer een ghedraghen den gheest Godts te tempteren? Siet die voeten vanden gheenen die uwen man begrauen hebben, sijn aen die doore, ende sij sullen v wtdraghen.

10

Terstont is sij gheuallen voer sijn voeten, ende heeft haren gheest ghegheuen. Ende die ionghelinghen incomende hebben haer doot gheuonden, ende hebbense wtghedraghen ende begrauen by haren man.

11

Ende daer is een groote vreese ghecomen in alle die vergaderinghe der gheloouigher, ende ouer alle die dese woerden ghehoort hebben.

+ 12

⁺Maer doer die handen der Apostelen worden ghedaen veel teekenen ende wonderlijcke wercken onder tvolck. Ende sij waren alle eendrachtelijck in Salomons portael.

+ C

13

Maer van dander en dorste niemant hem versamen met haerlieden, maer het volck achte hem groot.

14

Ende die menichte der mannen ende vrouwen die inden Heere gheloofden worde te meer vermeerdert,

15

alsoe dat sij op die straten wtleyden die siecken, ende stelden die in beddekens ende bedsteden, op dat (als Petrus quam) te minsten sijn scaduwe iemant van dien soude bescemen, ende dat sij alle souden verlost worden van haren siecten.

16

Ende daer vergaderde oock een menichte van die bijligghende steden te Ierusalem, brenghende siecken, ende die ghequelt waren van onsuyueren gheesten, die welcke alle ghenesen worden.

* 17

Ende die prince der priesteren opstaende, ende alle die met hem waren welck is die secte der Saduceen, werden veruult met nijdicheyt,

18

ende sij hebben die handen aen die Apostelen ghesteken, ende sij hebbense ghestelt in die ghemeyn gheuanghenisse.

19

⁺Maer een enghel des heeren snachts die dooren des kerkers opendoende, ende hen wtleydende, heeft gheseyt,

+ D

20

Gaet henen, ende staende spreect inden tempel den volcke alle die woerden van desen leuen.

21

Als sij dit ghehoort hebben, soe sijn sij smorghens vroech ghegaen inden tempel ende sij leerden daer. Ende die prince der priesters daer comende ende die met hem waren, hebben tsamen gheroepen den raet, ende alle die ouders der kinderen van Israel ende sij hebben totten kerker ghesonden datmense tot hen brenghen soude.

22

Maer doen die dienaers daer ghecomen waren, ende sij den kerker open ghedaen hebbende die niet en hadden gheuonden, soe sijn sij werderom ghekeert, ende hebben hen wederom ghebootscapt

23

segghende, Den kerker hebben wy voerwaer ghesloten vonden met alder neersticheyt, ende die bewaerders staende voer die dooren. ⁺Maer opendoende en hebben wi niemant daer binnen gheuonden.

+ E

24

Als dan die ouerste des tempels, ende die princen der priesteren dese woorden ghehoort hebben, twijfelden sij van hen, wat dat worden soude.

25

Ende een daer comende heeft hen lieden ghebootscapt. Siet dese mannen, die ghy inden kerker ghestelt hebt, sijn in den tempel staende ende leerende tvolck.

26

Doen sijn die ouerste des tempels ghegaen metten dienaers, ende sij hebbense ghebracht sonder ghewelt. Want sij vreesden tvolck dat sij souden ghesteent worden.

27

Ende als sij die aen ghebracht hadden, soe hebben sij die in den raet ghestelt. Ende die prince der priesteren heeft hen ghevraecht

28

segghende, Ghebiedende hebben wy v lieden gheboden dat ghy niet en leeren en soudt in desen naem, ende siet ghy hebt Ierusalem vol ghemaect met uwer leeringhen, ende ghy wilt op ons brenghen het bloet van desen mensch.

29

⁺Maer Petrus ende die Apostelen antwoerdende hebben gheseyt, Men moet Gode meer onderdanich sijn dan den menschen.

+ F

30

Onser vaderen Godt heeft Iesum verwect, den welcken ghy ghedoot hebt hanghende aen thout.

31

Desen prince ende salichmaker heeft Godt verheuen doer sijn rechte hant, om Israel penitencie te gheuen, ende vergiffenisse van sonden,

32

ende wy sijn ghetuyghen van desen woerden. Ende den heylighen gheest, den welcken Godt ghegheuen heeft alle den ghenen die hem ghehoorsaem sijn.

33

Als sij dit ghehoort hadden, soe doorsneet hen dat, ende sij dachten die te dooden.

34

Ende een Phariseus inden raet opstaende Gamaliel ghenoemt, een leeraer der wet, eerwerdich voer tgheheel volck, heeft gheboden

[p. *835]

dat die mannen een luttel souden buyten ghedaen worden,

35

ende hi heeft tot hen lieden gheseyt, Ghi Israelijtsche mannen, siet wel voer v van desen menschen wat ghy doen sult.

36

⁺Want voer dese daghen heeft gheweest eenen Theodas segghende dat hy wat was, den welcken heeft aenghehanghen een ghetal van mannen omtrent vierhondert, die welcke is ghedoot, ende alle die hem gheloofden sijn verstroyt, ende ghebracht te niete.

+ G

37

Nae desen is gheweest Iudas een Galileussch man, in die daghen der belijdinghen, ende hy heeft het volck afghekeert na hem, ende hy is vergaen, ende alle die hem aenghehanghen hebben, sijn verstroyt.

38

Aldus seg ic v nu oock. Sceyt wech van desen menschen, ende laetse gheworden, want is desen raet oft dit werck wt die menschen, soe sal dat verdwijnen,

39

maer eest van Godt, soe en suldi die niet connen sceyden, dat ghi bij auontueren niet beuonden en wort Gode te wederstaen. Ende sij hebben met hem gheuallen. Ende roepende die Apostelen te samen, als sij die gheslaghen hadden, soe hebben sij hen gheboden dat sij niet spreken en souden inden naem Iesu, ende sij hebbense laten gaen.

41

Ende sij ghinghen voerwaer blijdelijck van daenschijn des raets om dat sij weerdich waren gheacht, voer den naem Iesu versmaetheyt te lijden.

42

Ende tallen daghen en hielden sij niet op inden tempel ende van huyse te huyse leerende, ende vercondighende doert Euangelie Chrstum Iesum.