Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺MAer doen sij totten volcke spraken, soo sijn daer ouer ghecomen die priesters ende die meesters des tempels, ende die Sadduceen

+ A

2

droeuich sijnde dat sij het volck leerden ende vercondichden door Iesum die verrijsenisse wt die dooden,

3

ende sij hebben die handen aen hen gheslaghen, ende sij hebbense in die gheuanghenisse ghestelt tot tsanderdaechs toe, Want het was doen auont,

4

Ende veel vanden ghenen diet woort ghehoort hadden hebben ghelooft, ende tghetal der mannen is gheworden vijf duysent,

5

Ende tis ghesciet des anderen daechs dat hen princen vergaderden ende die ouders ende Scriben in Ierusalem,

6

ende Annas die prince der priesteren, ende Cayphas, ende Iohannes, ende Alexander, ende alle die daer waren van dat priesterlijck gheslachte,

7

Ende stellende hen int midden vraechden sij Door wat cracht oft in wat naem hebt ghi dit ghedaen?

8

⁺Doen heeft Petrus veruult sijnde vanden heyleghen gheest tot hen gheseyt. Ghi princen des volcs ende ouders.

+ B

9

Eest sake dat wij heden ondersocht worden om die weldaet aen den crancken mensch bewesen, waer door dat dese ghesont is ghemaect,

10

soo sij v allen kenlijck, ende alle den volcke van Israel, dat dit is ghesciet door den naem Iesu Christi van Nazareth dien ghi ghecruyst hebt, den welcken Godt verwect heeft van die dooden, hier door staet dese mensch voor v lieden ghesont,

11

Dit is den steen die verworpen is gheweest van v timmerende die gheworden is tot een hooft des hoecs

12

ende daer en is in gheenen anderen salicheyt, Want daer en is gheenen anderen naem onder den hemel den menschen ghegheuen, door den welcken wij moeten salich worden,

13

Ende sij siende die volstandicheyt van Petrus ende Iohannes, ⁺beuindende dattet ongheleerde menschen waren ende slechte leecke luyden verwonderden sij hen, ende sij kendense dat sij met Iesu gheweest hadden,

+ C

14

ende oock siende den mensch staen met hen, die ghesont ghemaect was, soo en mochten sij daer niet teghen segghen,

15

Maer sij hebben hen gheboden dat sij buyten wt den raet souden besijden gaen, ende sij spraken tot malcanderen segghende.

16

Wat sullen wij desen menschen doen? Want daer is voorwaer een kenlijck teeken door hen ghedaen, het is allen den ghenen die te Ierusalem woonen openbaer, ende wij en connen dat niet loochenen,

17

Maer op dat niet voorder verbreyt en worde onder tvolck, soo laet hen dreyghende verbieden, dat sij voortaen in desen naem gheenen mensche meer en spreken,

18

Ende hen roepende hebben sij gheboden dat sij gheensins en souden noch spreken noch leeren inden naem Iesu,

19

⁺Maer Petrus ende Iohannes antwoordende hebben tot hen gheseyt Oft recht is voor Gods aensicht, v lieden meer te hooren dan Godt, ordeelt ghy dat,

+ D

20

Want wij en moghen tghene dat wij ghesien ende ghehoort hebben niet swijghen,

21

Maer sij hebbense al dreyghende laten vrij gaen, niet vindende hoe dat sijse pijnighen souden, om des volcs wille, want si presen alle grootelijc datter gedaen was, in tghene datter ghesciet was,

22

Want die man was meer dan veertich iaren out daer dit teeken der ghesontheyt aen ghedaen was,

23

Ende als si vrij ghelaten waren, sijn sij ghecomen tot die hare, ende hebben hen vercondicht al dat hen die princen der priesteren ende die ouders gheseyt hadden,

24

Die welcke (als sijt ghehoort hadden) hebben eendrachtelijck hen stemme opghehauen tot Godt, ende gheseydt. Heere ghi die ghemaect hebt hemel ende eerde, die zee, ende alle datter in is,

25

die door den heylighen gheest door den mont ons vaders ws dienaers Dauid gheseydt hebt. ⁺Waerom hebben die Heydenen ghegrimt, ende die luyden ydelheden ghedacht?

+ E

26

Die Coninghen der aerden hebben by een ghestaen, ende die princen sijn versaemt ouer een, teghen den Heere ende teghen sijnen Christum?

27

Want hier sijn waerlijck tsamen verghadert in dese stadt tseghen uwen heylighen sone Iesum, den welcken ghy ghesalft hebt, Herodes ende

[p. *834]

Pontius Pilatus metten heydenen ende met die luyden van Israel,

28

om te doen tghene dat v hant ende uwen raet gheordineert heeft te ghescieden.

29

Ende nu Heere siet aen hen dreyghementen, ⁺ende gheeft uwen dienaeren met allen betrouwen te spreken v woert,

+ F

30

op dat ghy v hant daer toe wtreyct, datter ghesontheyden ende teekenen ende wonderlijcke wercken moghen ghedaen worden, doer den naem van uwen heyleghen sone Iesum.

31

Ende als sij ghebeden hadden, soe is die plaetse beroert gheweest daer sij in vergadert waren. Ende sij sijn alle veruult gheweest vanden heylighen gheest, ende spraken het woert Gods met betrouwen.

+ 32

Ende die menichte der gheender die gheloofden hadde een herte ende een ziele, ende niemant en seyde iet sijne te wesen van tghene dat hy besadt, ⁺Maer alle dinghen waren hen ghemeyn.

+ G

33

Ende met grooter cracht gauen die Apostelen ghetuyghenisse van die verrisenisse Iesu Christi ons heeren, ende groote gratie was in hen allen.

34

Want daer en was niemant ghebreck lydende onder henlieden. Want al die daer waren besitters van ackerlanden oft huysen die vercochtense ende brachten tghelt van tghene dat sij vercocht hadden,

35

ende leyden dat voer die voeten der Apostelen. Ende men deeldet elcken besonder na dat eenen ieghelijcken van noode was.

* 36

Ende Ioseph die ghenoemt was vanden Apostelen Barnabas, (dwelck te segghen is een sone der vertroostinghen) een Leuijt wt Cypren gheboren,

37

doen hy eenen acker hadde heeft dien vercocht ende den prijs ghebrocht, ende gheleyt voer der Apostelen voeten.