Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde Petrus ende Iohannes ghinghen opwaerts ten tempel ter neghenster vre der bedinghen,

+ A

2

Ende daer worde een man ghebracht die cruepel was van sijns moeders lichaem, den welcken sij daghelijcks stelden aen die poorte des tempels die ghenoemt wort die schoone, dat hi aelmissen bidden soude vanden ghenen die inden tempel ghinghen,

3

Als dese ghesien hadde Petrum ende Iohannem beghinnende inden tempel te gaen, soo badt hy om een aelmisse te ontfanghen,

4

Ende Petrus hem aensiende met Iohannes heeft gheseydt. Siet ons aen,

5

Ende hy sach hen aen hopende dat hy iet van henlieden ontfanghen soude,

6

Ende Petrus heeft gheseyt. Gout en siluer en heb ick niet, Maer dat ick hebbe dat gheue ick u, Inden naem Iesu Christi van Nazareth staet op ende wandelt,

7

Ende grijpende sijn rechte hant heeft hy hem op ghehauen, ende ter stont

[p. *833]

sijn zijn beenen ende voeten vast gheworden,

8

Ende opspringhende heeft hy ghestaen, ende hy wandelde, ende hi is met hen inden tempel ghegaen, wandelende ende opspringhende, ⁺ende Godt louende,

+ B

9

Ende alle tvolck heeft hem ghesien wandelende ende God louende,

10

Ende sij kenden hem dat hijt was die daer sadt ter aelmissen aen die schoon poorte des tempels, ende sij sijn veruult met verwonderinghe ende verbaestheyt, van tghene dat hem ghebuert was,

11

Ende als hy Petrum ende Iohannem hiel, soo is alle tvolc tot hen gheloopen aen tportael dwelck ghenoemt wort Salomons portael, verwonderende henlieden seere,

12

Ende Petrus dit siende heeft gheantwoort totten volcke. Ghi Israhelijtsche mannen wat verwonderde ghi v hier in, oft waerom siet ghy ons aen, als oft wij door onse cracht oft Godsdiensticheyt desen hadden doen wandelen?

+ 13

Die Godt van Abraham, die Godt van Isaac, die Godt van Iacob, Die Godt onser vaderen heeft gheglorificeert sijnen sone Iesum, den welcken ghi voorwaer gheleuert hebt, ende verloochent voor Pilatus aensicht doen hy vonniste datmen soude vrij laten gaen,

14

⁺Maer ghilieden hebt den heylighen ende rechtuerdighen gheloochent, ende hebt begheert datmen v den man die een dootslagher was, gheuen soude,

+ C

15

Maer den schepper des leuens hebt ghy ghedoot, den welcken God vanden dooden verwect heeft, waer af wij ghetuyghen sijn,

16

Ende int ghelooue van sijnen naem heeft hy desen die ghi siet ende kent, sijnen naem gheuesticht, ende tghelooue dat door hem is heeft dese ganssche gesontheyt ghegheuen voor daenschijn van v allen,

17

Ende nv ghi broders. Ic weet wel, dat ghijt door onwetenheyt ghedaen hebt, ghelijck ooc v princen,

18

Maer Godt die te voren vercondicht heeft door den mont van alle die propheten dat sijnen Christus lijden soude, heeft dat aldus volbracht,

19

Hierom doet penitencie, ende bekeert v, op dat v sonden wtghewischt moghen worden.

* 20

Op dat wanneert die tijden der vercoelinghen comen sullen van des Heeren aensicht, ende dat hy sal ghesonden hebben Iesum Christum, die v lieden ghepreect is gheweest,

21

die welcke moet waerlijcs den hemel ontfanghen, tot die tijden dat alle dinghen sullen weder in staet ghestelt worden, ⁺Van die welcke Godt ghesproken heeft door den mont van sijnen heylighen propheten die van tbeghinsel der werelt gheweest sijn.

+ D

22

Moyses heeft emmer geseydt. Want die Heere v Godt sal v eenen propheet verwecken wt uwen broederen mijns ghelijc, desen suldi hooren nae alle dat hy v segghen sal,

23

Ende tsal sijn, dat alle ziele die desen propheet niet hooren en wilt sal vernielt worden wt den volcke,

24

Ende alle die propheten van Samuel ende die daer nae ghesproken hebben, die hebben vercondicht dese daghen,

25

Ghy sijt die kinderen der propheten, ende des testaments het welc Godt bestelt hadde tot onsen vaderen segghende tot Abraham, Ende in v saet sullen ghebenedijt worden alle die familien van aertrijc,

26

V lieden heeft Godt ierstmael sijnen sone verweckende dien ghesonden v ghebenediende, om dat hem een ieghelijc bekeeren soude van sijn quaetheyt.