Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺HIerom heeft Pilatus Iesum doen ghenomen ende ghegheesselt,

+ A

2

Ende die ruyters vlechtende een croone van doorne hebbense op sijn hooft ghestelt ende een purpuren cleet hebben sij hem aenghehanghen

3

Ende sij quamen tot hem ende seyden. Weest ghegroet coninc der Ioden, ende sij gauen hem kinnebacslaghen,

4

Pilatus is wederom buyten wtghegaen ende hi seyt hen. Siet ick brenghe hem tot v lieden buyten, op dat ghi kennen soudt dat ick gheen sake in hem en vinde,

5

Aldus is Iesus wtghegaen draghende een doorne croone, ende een purpuren cleedt, Ende hy seydt hen. Siet den mensch,

6

Als dan die ouerste priesters ende dienaers ghesien hadden, soo riepen sij segghende. Cruyst cruyst hem, Pilatus seyt tot hen. Neemt hem ghi ende cruysten, want ick en vinde in hem gheen sake,

7

Die Ioden hebben hem gheantwoort. Wi hebben een wet ende nae die wet moet hy steruen, ⁺want hy heeft si seluen Gods sone ghemaect,

+ B

8

Hierom als Pilatus dit woort ghehoort hadde, heeft hy meer ghevreest,

9

Ende hi is wederom int rechterhuys ghegaen ende seyt tot Iesum. Van waer sijt ghy? Maer Iesus en heeft hem gheen ant-

[p. *829]

woorde ghegheuen,

10

Aldus seyt Pilatus tot hem. En spreeckt ghy tot my niet? En weet ghy niet dat ick macht hebbe v te cruycen, ende macht hebbe v vrij te laten gaen?

11

Iesus heeft gheantwoort. Ghy en soudt gheen macht teghen my hebben, ten ware dat v van boven ghegheuen waer, Daerom die my v gheleuert heeft, die heeft meerder sonde,

12

Van doen heeft Pilatus ghesocht hem te ontslaen, Maer die Ioden riepen segghende. Eest dat ghy desen vrij laet, soo en sijdi des keysers vrint niet, Alle die hem seluen coninc maect, die seyt teghen den keyser,

13

⁺Als Pilatus dese woorden ghehoort heeft, soo heeft hy Iesum buyten ghebracht ende is gheseten opden rechterstoel in een plaetse die ghenoemt is Lithostrotos ende int hebreusch Gabbatha,

+ C

14

Ende het was den bereytsels dach van paesschen omtrent die seste vre, ende hy seyt tot die Ioden, Siet uwen concinck,

15

Maer sij riepen. Doet wech, Doet wech, cruyst hem, Pilatus seyt tot henlieden. Sal ick uwen coninck cruycen? Die ouerste priesters hebben gheseyt. Wij en hebben gheenen coninck dan den keyser,

16

Hierom heeft hy hen doen Iesum gheleuert, dat hy soude ghecruyst worden, Ende sij hebben Iesum ghenomen ende wtgheleyt,

17

Ende sij seluen een cruys draghende, is hy wtghegaen tot die plaetse die genoemt wort Caluarien, int hebreusch Golgatha

18

daer si hem ghecruyst hebben ende met hem twee andere, aen deen ende dander sijde ende int midden Iesum,

19

Ende Pilatus heeft oock eenen titel ghescreuen, ende dien opt cruys ghestelt, ⁺Ende daer was ghescreuen Iezus van Nazareth die coninck der Ioden,

+ D

20

Aldus hebben desen tytel veel vanden Ioden ghelesen, want die plaetse was by die stadt, daer Iesus gecruyst was, Ende het was ghescreuen int hebreeusch griex ende latijn.

21

Aldus seyden die ouerste priesters der Ioden Pilato. En wilt niet scrijuen coninc der Ioden, Maer dat hy geseyt heeft. Ic ben die coninc der Ioden

22

Pilatus heeft geantwoort. Dat ic gescreuen hebbe, dat heb ic ghescreuen,

23

Ende die ruyters (doen sij hem ghecruyst hadden) hebben sijn cleederen ghenomen (ende sij hebben vier deelen ghemaect, elcken ruyter een deel) ende den roc, maer den rock was sonder naet, van bouen ghebreydt ouer al,

24

Hierom hebben sij tot malcanderen gheseyt. En laet ons dien niet snijden, maer laet ons daerom het lot werpen wiens dat hy sijn sal, Op dat die scriftuere soude volbracht worden, segghende. Sij hebben mijn cleederen onder hen ghedeelt, ende op mijn cleedt hebben sij dlot gheworpen, Ende die ruyters hebben dit ghedaen,

25

Ende by Iesus cruys stonden sijn moeder, ende sijns moeders suster Maria Cleophe, ende Maria Magdalene,

26

⁺Aldus doen Iesus ghesien hadde de moeder ende den discipel staende den welcken hy lief hadde, soo seydt hy sijnder moeder Vrouwe siet daer uwen sone,

+ E

27

Daer nae seydt hy den discipel. Siet daer v moeder, Ende van dier vren heeftse die discipel ghenomen tot hem,

28

Daernae Iesus wetende dat nv al voldaen was, op dat die scriftuere soude volbracht worden, soo seyt hy. Ick heb dorst,

29

Aldus was daer een vat ghestelt vol edicks, Ende een spongie vol edicks rontomme met hysope belegghende, hebben sij ghesteken tot aen sijnen mont,

30

Aldus doen Iesus den edick ghenomen hadde, soo heeft hy gheseyt. Het is volbracht, Ende met gheneychden hoofde heeft hy sijnen gheest ghegheuen,

31

Hierom die Ioden (om dat des bereytsels dach was) om dat die lichamen niet en souden aent cruys blijuen opden sabboth (want het was eenen grooten dach) dien sabbothdach soo hebben sij Pilatum ghebeden datmen hen beenen breken soude, ⁺en datmense af name,

+ F

32

Hierom sijn die ruyters ghecomen, ende sij hebben die beenen vanden iersten ghebroken, ende vanden anderen die met hem ghecruyst was,

33

Maer doen sij tot Iesum comen waren, ende saghen dat hy nv doodt was, en hebben sij sijn beenen niet ghebroken,

34

Maer een vanden ruyters heeft met een lancie sijn sijde open ghedaen, ende ter stont is daer wtghecomen bloet ende water,

35

Ende diet ghesien heeft, die heeft daer ghetuyghenis af ghegheuen, ende sijn ghetuyghenis is warachtich, Ende hy weet dat hy waer seydt, op dat ghijt oock gheloouen soudt,

36

Ende dese dinghen sijn gheschiet om dat die scriftuere soude volbracht worden. Gheen been en suldy van hem breken,

37

Ende wederom seyt een ander scriftuere. Sij sullen sien inden welcken sij door ghesteken hebben,

38

⁺Maer hier nae heeft Ioseph van Arimathia Pilatum ghebeden (om dat hy een discipel Iesu was, maer verborghen om die vreese der Ioden) dat hy soude moghen wech nemen Iesus lichaem, Ende Pilatus heuet toeghelaten, Aldus is hi ghecomen ende heeft Iesus lichaem wech ghenomen,

+ G

39

Ende Nicodemus is daer oock ghecomen die ierstmael des nachts tot Iesum comen was, brenghende een mincsel van myrrhe ende aloes omtrent hondert pont,

40

Aldus hebben sij Iesus lichaem ghenomen, ende hebben dat verbonden met lijnen doecken, met specerien ghelijck der Ioden ghewoonte is te begrauen,

41

Ende in die plaetse daer hy was ghecruyst, was eenen hof, ende inden hof een nieu graf daer noch niemant in gheleydt en was,

42

Hierom hebben sij (om der Ioden bereytsels dach want het graf by was) Iesum daer gheleydt.