Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xvij. Capittel.

+ 1

⁺DEse woorden heeft Iesus ghesproken, ende met opghehauen ooghen ten hemel heeft hi gheseydt. Vader die vre is comen, verclaert uwen sone op dat v sone v verclare,

+ A

2

Ghelijc ghi hem hebt ghegheuen macht ouer alle vleesch, op dat hi alle dat ghi hem ghegheuen hebt, het eewich leuen gheue,

3

Ende dit is het eewich leuen dat sij v bekennen den eenighen warachtighen God, ende den ghenen die ghi ghesonden hebt Iesum Christum,

4

Ic heb v verclaert op die werelt, Ick heb het werc volbracht dat ghi mi ghegheuen hebt dat ick doen soude,

5

ende nv verclaert my ghi vader by v seluen met die claerheyt die ic ghehadt hebbe eer die werelt by v was,

6

Ic heb uwen naem gheopenbaert den menschen die ghy my ghegheuen hebt vander werelt, ⁺Sij waren uwe ende ghy hebtse my ghegheuen, ende sij hebben v woort ghehouden,

+ B

7

Nv hebben sij ghekent dat alle tghene dat ghi mi ghegheuen hebt van v is,

8

Want die woorden die ghi mi ghegheuen hebt die heb ick hen ghegheuen, ende sij hebbense ontfanghen, ende hebben ghekent warachtelijck dat ick van v wtghegaen ben, ende sij hebben ghelooft dat ghy my ghesonden hebt,

9

Ick bidde voor hen, Ic en bidde voor die werelt niet, maer voor dese die ghy my ghegheuen hebt, want sij sijn uwe,

10

Ende alle dat mijne is uwe, ende dat uwe is mijne, ende ic ben verclaert in henlieden,

11

Ende nv en ben ic in die werelt niet, ende dese sijn in die werelt, ende ick come tot v.

* + Heylighe vader bewaertse in uwen naem, die ghi my ghegheuen hebt, op dat sij moghen een sijn, ghelijck wij oock sijn,

12

Doen ick met hen was soo bewaerde ick henlieden in uwen naem, Die ghi mi ghegheuen hebt, die heb ick bewaert, ⁺ende daer en is niemant van hen verloren ghegaen, dan die sone des verlies, om dat die scriftuere volbracht worde,

+ C

13

Maer nv come ick tot v, ende ick spreke dese dinghen in die werelt, op dat sij mijn blijscap souden hebben veruult in hen seluen,

14

Ick heb hen v woort ghegheuen, ende die werelt heeftse ghehaet, want sij en sijn vander werelt niet, ghelijck ick oock niet en ben vander werelt,

15

Ick en bidde niet dat ghi die vander werelt neemt, maer dat ghi die behoedt van quade,

16

Sij en sijn vander werelt niet, ghelijck ick oock vander werelt niet en ben,

17

Maectse heylich inder waerheyt, v woort is die waerheyt,

18

Ghelijck ghi my hebt ghesonden in die werelt soo heb ickse ooc ghesonden in die werelt,

19

Ende voor hen maeck ick my seluen heylich, op dat sij oock moghen gheheylicht sijn inder waerheyt,

20

Ende ick en bidde voor hen alleen niet, maer oock voor die ghene die door hen woort in my gheloouen sullen,

21

op dat sij alle een moghen sijn, ghelijc ghi vader in my, ⁺ende ick in v, dat sij ooc in ons moghen een sijn, op dat die werelt ghelooue dat ghi my ghesonden hebt,

+ D

22

Ende ic heb die claerheyt die ghi my ghegheuen hebt, henlieden ghegheuen, op dat sij een sijn souden, ghelijc wij ooc een sijn,

23

Ick in hen, ende ghi in my, op dat sij volcomen sijn in een, op dat die werelt kenne dat ghi mi ghesonden hebt, ende dat ghi hen hebt lief ghehadt, ghelijck ghi my ooc lief hebt ghehadt,

24

Vader die ghi my ghegheuen hebt, ick wille dat (waer ick ben) die ooc met my moghen sijn, op dat sij sien moghen mijn claerheyt die ghi my ghegheuen hebt, want ghy hebt my bemint voor dat maecksele der werelt,

25

Rechtuerdighe vader, die werelt en heeft v niet ghekent, maer ic heb v ghekent, ende dese hebbent ghekent dat ghi mi ghesonden hebt,

26

Ende ick heb hen kenlijck ghemaect uwen naem, ende ick sal hen dien kenlijck maken, op dat die liefde daer ghy my mede bemint hebt, in hen mach wesen, ende ick in hen.