Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺DIt heb ick v ghesproken om dat ghy niet ghescandalizeert en soudt worden,

+ A

2

wt die Sinagogen sullen sij v stellen, maer die vre naket dat al die ghene die v doodet sal meynen dat hy Gode dienst doet,

3

ende dit sullen sij v doen om dat sij den vader niet en kennen, noch mi,

4

Maer dit heb ic v gheseyt op dat ghy (als hen vre sal ghecomen sijn) deser ghedachtich soudt wesen dat ict v lieden gheseyt hebbe,

5

Maer dese dinghen en heb ic v van tbeghinsel niet gheseyt, om dat ick met v lieden was.

* + Ende nv gae ic tot hem die mi ghesonden heeft ende niemant van v lieden en vraecht my. Waer gaet ghy?

6

Maer om dat ick v dit gheseyt hebbe, soo heeft die droefheyt v herte veruult,

7

Maer ick segghe v die waerheyt, tis v orbaerlijck dat ick gae, want eest dat ick niet en gae, soo en sal die trooster tot v niet comen, maer eest dat ick wech gae, soo sal ick hem tot v lieden senden,

8

Ende als die sal ghecomen sijn, soo sal hi die werelt straffen van die sonde, ⁺ende van die rechtuerdicheyt, ende van dat ordeel,

+ B

9

Van die sonde voorwaer om dat sij in my niet en gheloouen,

10

maer vander rechuerdicheyt, want ick totten vader gae, ende ghy en sult my

[p. *828]

nv niet meer sien,

11

ende van dat ordeel, want die prince van deser werelt nv gheordeelt is,

12

Ick heb v noch veel dinghen te segghen, maer ghy en moecht dat nv niet draghen,

13

Maer als dien gheest der waerheyt comen sal, die sal v alle die waerheyt leeren, want hi en sal van sij seluen niet spreken, maer al dat hy hooren sal dat sal hy spreken, ende die toecomende dinghen sal hy v vercondighen,

14

Die sal my verclaren, want hy sal vanden mijnen nemen, ende v heden vercondighen,

15

Alle dat die vader heeft is mijne, Daerom heb ic gheseyt. Dat hijt vanden mijnen nemen sal, ende v lieden vercondighen.

* + 16

Een luttel tijts ende ghy en sult my nv niet sien, ende wederom een luttel tijts ende ghy sult my sien, want ick gae totten vader?

17

⁺Hierom hebbender sommighe van sijnen discipelen gheseydt tot malcanderen. Wat is dit dat hy ons seyt. Een luttel tijts ende ghy en sult my niet sien, ende wederom een luttel tijts ende ghi sult mi sien, ende want ic gae totten vader

+ C

18

Aldus seyden sij. Wat is dit dat hy seydt. Een luttel tijts? wij en weten niet wat hy seyt,

19

Ende Iesus heeft bekent dat sij hem wilden vraghen, ende hy heeft hen gheseydt. Ghy vraecht hier af onder malcanderen dat ick gheseyt hebbe. Een luttel tijts ende ghy en sult my sien, ende wederom een luttel tijts ende ghy sult my sien,

20

Voorwaer voorwaer ic segghe v, dat ghy sult screyen ende weenen, maer die werelt sal blijde sijn, maer ghilieden sult bedroeft sijn, maer v droefheyt sal in blijscap verandert worden,

21

Een vrouwe als sij baert, soo heeft sij droefheyt, om dat haer vre ghecomen is, maer als sij een kint ghebaert heeft, soo en ghedenct sij der banghicheyt niet, om die blijscap want daer een mensch gheboren is in die werelt,

22

Aldus soo hebt ghy nv ooc droefheyt, maer ick sal v wederom sien, ende dan sal v herte blijde sijn ende v blijscap en sal niemant van v lieden nemen.

* 23

En op dien dach en suldi mi niet bidden. + Voorwaer voorwaer ick segghe v, eest dat ghy iet vanden vader begheert in mijnen naem, dat sal hy v gheuen,

24

⁺Tot nv toe hebdi niet begheert in mijnen naem, Begheert ende ghi sullet ontfanghen, op dat v blijscap mach vol sijn,

+ D

25

Dit heb ick v in parabelen ghesproken, Die vre coemt dat ick nv tot v lieden door parabelen niet spreken en sal, Maer ic sal v openbaerlijck vanden vader vercondighen,

26

in dien dach suldy in mijnen naem begheren, ende ick en seg v niet dat ick den vader van v sal bidden,

27

want die vader selue v lieden lief heeft om dat ghy my hebt lief ghehadt, ende hebt ghelooft dat ick van Godt wtghegaen ben,

28

Ick ben vanden vader wtghegaen, ende ghecomen in die werelt, wederom verlate ick die werelt ende gae totten vader,

29

Sijn discipelen segghen hem. Siet ghy spreect nv openbaerlijck, ende ghy en segt gheen parabel,

30

nv weten wij dat ghi alle dinghen weet, ende ten is v van gheenen noode dat v yemandt vraghe, daer door gheloouen wij dat ghi van Godt wtghehaen sijt

31

Iesus heeft gheantwoort. Nv gheloofdi,

32

Siet die vre coemt, ende sij is nv comen, dat ghi sult verstroeyt worden een ieghelijck int sijne, ende dat ghi my alleen sult verlaten, ende ick en ben alleen niet, want die vader is met my,

33

Dit heb ick v ghesproken op dat ghy in my moecht vrede hebben, In die werelt sult ghi verdructheyt hebben, maer betrout, ick heb die werelt verwonnen.