Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

+ 1

⁺ICk ben eenen warachtighen wijnstruyck, ende mijn vader is een ackerman,

+ A

2

Alle rancken in my gheen vrucht draghende sal hy afnemen, ende alle die vrucht voorts brengt, dien sal hy suyveren, dat hy meer vrucht voorts brenghe,

3

Ghy sijt nv suyuer om dat woort het welck ick v lieden ghesproken hebbe,

4

Blijft in my ende ick in v lieden, Ghelijck een rancke niet en mach vrucht voorts brenghen van haer seluen, ten sij dat sij blijue inden wijnstruyck, also noch ghy oock ten sij dat ghy in my blijft,

5

Ick ben den wijnstruyck, ghy sijt die rancken, Soo wie in my blijft en ick in hem, dese brengt veel vruchten voorts, want sonder my en moecht ghy niet doen,

6

Eest dat iemant in my niet en blijft, die sal wtgheworpen worden, als een rancke, ende hy sal verdorren, ende sij sullen hem vergaderen, ende int vier worpen, ende hy wort verbrant.

* 7

+ Eest dat ghy in my blijft, ende dat mijn woorden in v blijuen, al wat ghy wilt dat suldi begheren, ende tsal v ghescieden,

8

⁺Daer in is mijn vader verclaert, dat ghi seer veel vruchten voorts brenghet, ende wordet mijn discipelen,

+ B

9

Ghelijck my die vader lief heeft ghehadt, alsoo heb ick v lieden ooc lief ghehadt, Blijft in mijn liefde,

10

Eest dat ghy mijn gheboden bewaert, soo suldi in mijn liefde blijuen, ghelijck dat ick oock mijns vaders gheboden heb ghehouden, ende blijue in sijn liefde,

11

Dit heb ick v ghesproken op dat mijn blijscap in v lieden sijn soude, ende dat v blijscap soude volcomen worden.

* 12

Dit is mijn ghebodt, dat ghy malcanderen lief hebt, ghelijc ic v lieden heb lief ghehadt,

13

Niemant en heeft meerder liefde dan dese dat iemant sijn ziele stelle voor sijn vrienden,

14

Ghy sijt mijn vrienden eest dat ghy doet dat ick v lieden ghebiede,

15

⁺Ic en noeme v nv voortaen niet meer knechten, want een knecht en weet niet wat sijn heere doet, Maer ick heb v vrienden ghenoemt, want alle die dinghen die ic van mijnen vader ghehoort hebbe, die heb ick v lieden kenlijc ghemaect,

+ C

16

Ghy en hebt my niet vercoren, maer ick heb v wtuercoren, ende v ghestelt dat ghy gaen soudt ende vruchten voorts brenghen, ende dat v vrucht blijuen mach op dat alle tghene dat ghy den vader bidden sult in mijnen name, hy v gheue.

+ 17

Dit ghebiede ick v, dat ghy malcanderen liefhebt,

18

Eest dat die werelt v hatet, weet dat sij my voor v lieden ghehaet heeft,

19

Waert sake dat ghy vander werelt hadt gheweest, soo soude die werelt dat hare was lief hebben, maer want ghy vander werelt niet en sijt, maer ic v vander werelt vercoren hebbe daerom haet v die werelt,

20

Ghedenct mijns woorts dat ick v gheseydt hebbe, Daer en is gheen knecht meerder dan sijn heere, eest dat sij mi veruolcht hebben, soo sullen sij v oock veruolghen, eest dat sij mijn woort bewaert hebben, so sullen sij het uwe ooc bewaren,

21

⁺Maer alle dese dinghen sullen sij v doen om mijnen naem, want sij hem niet en kennen die mi ghesonden heeft,

+ D

22

En waer ick niet ghecomen, ende en hadde ick hen niet ghesproken, soo en souden sij gheen sonde hebben, Maer nv en hebben sij gheen onscult van hen sonde,

23

Soo wie my haet, die haet ooc mijnen vader,

24

En hadde ic die wercken onder hen niet ghedaen die niemant anders ghedaen en heeft, soo en souden si gheen sonde hebben, maer nv hebben sij ghesien ende ghehaet my ende mijnen vader,

25

Maer om dat volbracht soude worden het woort dat in hen wet ghescreuen is, Sij hebben my ghehaet sonder sake.

* 26

+ Maer als die trooster sal ghecomen sijn, den welcken ick v senden sal vanden vader, den gheest der waerheyt die vanden vader voorts coemt, die sal ghetuyghenis gheuen van my,

27

ende ghy sult ghetuyghenis gheuen want ghy vanden beghinne met my sijt.