Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xiiij. Capittel.

+ 1

⁺EN laet v herte niet ontstelt sijn, Gheloofdi in Godt soo ghelooft oock in my,

+ A

2

In mijns vaders huys sijn veel wooninghen, Waert anders ick soudt v gheseyt hebben, Want ick gae om v lieden plaetse te bereyden,

3

Ende eest dat ick wech ghae ende v plaetse sal bereyt hebben, soo coem ick wederom ende sal v nemen tot my seluen, op dat ghy moecht sijn daer ick ben,

4

Ende ghy weet wel waer henen dat ic gae ende ghy weet oock den wech,

5

Thomas seyt tot hem Heere wij en weten niet waer henen dat ghy gaet, ende hoe moghen wij den wech weten?

6

Iesus seyt tot hem Ick ben den wech, ende die waerheyt, ende dleuen, Niemant en coemt totten vader dan door my,

7

Waert sake dat ghy my ghekent hadt, soo soudt ghi voorwaer oock mijnen vader ghekent hebben, ende van nv voorts suldi hem kennen, ende ghy hebt hem ghesien

8

Philippus seyt tot hem. Heere thoont ons den vader, ende tis ons ghenoech,

9

Iesus seyt tot hem. So langhen tijt ben ick met v lieden, ende en hebdi mi niet ghekent? Philippe die my siet die siet den vader, hoe segt ghi. Thoont ons den vader?

10

En gheloofdi niet dat ick inden vader ben, ende dat die vader in my is? Die woorden die ick v spreke, die en spreec ick van my seluen niet, ⁺Maer die vader in my woonende die doet die wercken,

+ B

11

En gheloofdi niet dat ick inden vader ben, ende dat die vader in mi is?

12

Oft anders soo gheloouet om die selue wercken, Voorwaer voorwaer ick segghe v lieden, so wie in my ghelooft, die wercken die ick doe die sal hy ooc doen, ende meerder dan dese sal hy doen,

13

want ic gae totten vader, Ende wat ghy begheert in mynen naem dat sal ick doen, op dat die vader mach gheglorificeert worden inden sone,

14

Eest dat ghy iet begheert van my in mijnen naem, dat sal ick doen.

* + 15

Eest dat ghi my lief hebt soo onderhoudt mijn gheboden,

16

Ende ick sal den vader bidden ende hy sal v eenen anderen troo-

[p. *827]

ster gheuen, op dat die met v lieden blijue inder eewicheyt,

17

Den gheest der waerheyt, den welcken die werelt niet en mach ontfangen, want si en siet hem niet, noch si en kent hem niet, maer ghi kent hem, want hi sal by v lieden blijuen, ⁺ende in v wesen,

+ C

18

Ic en sal v gheen weesen laten, ic sal tot v comen,

19

Noch een luttelken ende die werelt en siet my nv voorts niet meer, Maer ghy siet my dat ick leue, ende ghy sult leuen,

20

In dien dach suldi bekennen dat ick in mijnen vader ben, ende ghilieden in my, ende ick in v lieden,

21

Soo wie mijn gheboden heeft ende die bewaert, dese eest die my lief heeft, ende die my lief heeft die sal bemint worden van mijnen vader, ende ick sal hem lief hebben, ende sal hem my seluen openbaren.

* 22

Iudas seyt tot hem niet die Iscarioter. Heere wat isser gesciet, dat ghi v seluen ons sult verthoonen, ende niet der werelt?

23

Iesus heeft gheantwoort ende hem gheseyt. + Eest dat iemant my lief heeeft die sal mijn woorden bewaren, ende mijn vader sal hem lief hebben, ende wij sullen tot hem comen, ende wooninghe by hem maken,

24

wie my niet lief en heeft, die en bewaert mijn woorden niet, Ende dwoort dat ghy ghehoort hebt en is mijne niet, maer des gheens die my ghesonden heeft des vaders.

25

Dit heb ic tot v lieden ghesproken by v blijuende,

26

⁺Maer die troostere die heylige Gheest den welcken die vader senden sal in mijnen naem, die salt v al leeren ende hy salt v al ingheuen dat ick gheseyt hebbe,

+ D

27

Vrede laet ick v, mijnen vrede gheef ick v, Ick en gheefs v niet, ghelijc die werelt dien gheeft. En laet v herte niet ontstelt worden oft vreesen,

28

Ghy hebt ghehoort dat ick v lieden gheseyt hebbe. Ick gae ende come tot v lieden, waert sake dat ghy my liefhadt, soo soudt ghi v voorwaer verblijden, dat ick totten vader gaen, want die vader is meerder dan ick,

29

Ende nv heb ict v gheseyt eer dat gheschiede, op dat ghy (alst gheschiet is) moecht gheloouen,

30

Nv voortaen en sal ick niet veel met v spreken, want die prince deser werelt coemt, ende in my en heeft hy niet,

31

Maer op dat die werelt kenne dat ick den vader lief hebbe, ende ghelijck my die vader gheboden heeft alsoo doe ick, * staet op, laet ons van hier gaen.