Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *826]

* Dat .xiij. Capittel.

+ 1

⁺ENde voor den feestdach van paesschen Iesus wetende dat sijn vre ghecomen was, dat hy ouer reysen soude wt deser werelt totten vader als hy die sijne lief hadde gehadt die in die werelt waren, soo heeft hy die totten eynde toe lief ghehadt,

+ A

2

Ende als den auontmael ghedaen was, doen die duyuel nv int herte van Iudas simons sone den Iscarioter ghegheuen hadde, dat hy hem verraden soude,

3

wetende dat die vader hem alle dinghen in die handen ghegheuen hadde, ende dat hy van Gode wtgheghaen was ende tot Gode ghinck,

4

soo staet hy op vanden auontmael, ende leydt sijn cleederen af, ende als hi een lijnen cleedt ghenomen hadde, soo heeft hi hem seluen vore ghescort,

5

Daer nae heeft hy water in tbecken ghegoten, ende heeft begonst te wasschen die voeten van sijnen discipelen ende die te drooghen metten lijnen cleede daer mede hy vore ghescorst was,

6

Aldus is hi gecomen tot Simon Petrus, Ende Petrus seyt tot hem. Heere wascht ghi mijn voeten?

7

Iesus heeft gheantwoort ende tot hem gheseyt. Dat ic doe dat en weet ghi nv niet, maer ghi sult dat namaels weten,

8

Petrus seyt tot hem. Ghi en sult mi die voeten niet wasschen inder eewicheyt, Iesus heeft hem gheseyt. Eest dat ic v niet en wassche, soo en suldi gheen deel met mi hebben,

9

Simon Petrus seyt hem Heere niet alleen mijn voeten, maer oock mijn handen ende hooft,

10

Iesus seyt hem. Wie ghewasschen is die en behoeft niet dan dat hi sijn voeten wassche, maer hi is heel suyuer, ⁺Ende ghi sijt suyuer maer niet allegader,

+ B

11

want hi wist wel wie dat was die hem verraden soude, daerom heeft hi gheseyt. Ghy en sijt allegader niet suyuer,

12

Aldus doen hy hen voeten ghewasschen hadde, ende sijn cleederen ghenomen nae dat hy gheseten was ter tafelen, heeft hy hen wederom gheseyt. Weet ghy wel wat ick v ghedaen hebbe?

13

Ghi noemt my meester ende Heere, ende ghy segt wel, want ic bent,

14

Daerom eest dat ick Heere ende meester v voeten ghewasschen hebbe, soo moet ghy ooc deen danders voeten wasschen,

15

want ick heb v een exempel ghegheuen, op dat ghy oock soo doen soudt ghelijck ick v lieden ghedaen hebbe.

* 16

Voorwaer voorwaer ic segghe v, gheen knecht en is meerder dan sijn heere, noch gheen bode en is meerder dan die ghene die hem ghesonden heeft,

17

Eest dat ghy dese dinghen weet, soo suldy salich wesen eest dat ghy die doet,

18

Ick en segt van v allen niet, ick weet wien ick ghecosen hebbe, Maer om dat die scriftuere volbrocht soude worden. Die met my broot etet sal sijn versene teghen my opheffen,

19

van nv seg ickt v eer dat ghesciet, op dat ghy (alst ghesciet sal sijn) moecht gheloouen dat ict ben,

20

⁺Voorwaer voorwaer ick segghe v lieden, soo wie ontfanct den welcken ick sende, die ontfanct my, ende soo wie my ontfanct, die ontfanct hem die my ghesonden heeft.

+ C

21

Als Iesus dit gheseydt hadde soo worde hy in sijnen gheest ontstelt ende hy heeft openbaerlijck ghetuycht ende gheseyt. Voorwaer voorwaer ick segghe v datter een van v lieden my verraden sal,

22

Hierom saghen die discipelen op malcanderen, twijfelende van wien dat hy sprac

23

Aldus was daer een van sijnen discipelen rustende in Iesus schoodt, den welcken Iesus lief hadde,

24

Hierom heeft Simon Petrus dien ghewenct ende hem gheseydt. Wie eest daer hy af seyt?

25

Aldus doen dese rustede op Iesus borst, soo seyt hy tot hem. Heere wie eest?

26

Iesus antwoorde. Die eest dien ick dat ghedopt broot gheuen sal. Ende als hy tbroot ghedopt hadde soo heeft hy dat ghegheuen Iude Simons sone den Iscarioter,

27

Ende nae die brocke doen is die duyuel in hem gheuaren, Ende Iesus seyt hem. Dat ghi doet, doet dat haestelijck,

28

Maer niemant vanden ghenen die ter tafelen saten en wisten dit niet waer toe dat hy hen dat gheseyt hadde,

29

Want die sommighe hebben ghemeynt om dat Iudas die borse hadde, dat hem Iesus gheseyt hadde. Coopt dat ons van noode is totten feestdach, oft dat hy den armen iet gheuen soude,

30

⁺Aldus doen hy die brocke ontfanghen hadde, is hi ter stont wtghegaen Ende het was nacht,

+ D

31

Hierom doen hy wtghegaen was, soo heeft Iesus gheseyt. Nv is die sone des menschen verclaert ende God is in hem verclaert,

32

Eest dat God in hem verclaert is, so sal God hem ooc verclaren in si seluen ende ter stont sal hy hem verclaren.

+ 33

Kinderkens noch een luttelken ben ick met v lieden, Ghy sult my soecken, ende ghelijc ick den Ioden gheseyt hebbe, Daer ick henen gae daer en moechdi niet comen, ende v lieden seg ict nv.

34

Een nieuwe ghebodt gheue ick v dat ghy malcanderen lief hebt, ghelijc ic v lief ghehadt hebbe, dat ghy ooc malcanderen lief hebt,

35

Daer in sullen si alle kennen dat ghy mijn discipelen sijt, eest dat ghi liefde tot malcanderen hebt,

36

Simon Petrus seyt tot hem. Heere waer gaet ghi henen? Iesus heeft gheantwoort. Daer ick henen gae daer en mocht ghy my nv niet volghen, maer ghy sult my naemaels volghen,

37

Petrus seyt tot hem. Waerom en mach ick v nv niet volghen? mijn ziele sal ick voor v stellen,

38

Iesus heeft hem gheantwoort. Suldy v ziele voor my stellen? Voorwaer ick segghe v, den haen en sal niet craeyen, tot dat ghy my drijmael loochenen sult.