Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

+ 1

⁺ALdus is Iesus ses daghen voor paesschen ghecomen te Bethanien, daer Lazarus ghestoruen was, den welcken Iesus verwect heeft

+ A

2

Ende sij hebben hem daer een auontmael bereydt, ende Martha diende, maer Lazarus was een vanden ghenen die met hem ter tafelen saten,

3

Hierom heeft Maria ghenomen een pont costelijcker saluen van ongheualschte Nardus, ende sij heeft Iesus voeten ghesalft ende die afghedroocht met haren hayre, ende het huys wert veruult metten ruecke der saluen,

4

Hierom seyde een van sijnen discipelen Iudas die Iscarioter die hem daer naer verriet,

5

Waerom en is dese salue niet vercocht om drij hondert penninghen, ende den armen ghegheuen?

6

Ende dit heeft hi gheseyt, niet dat hi voor die arme besorcht was, maer om dat hi een dief was, ende die borse hebbende droech hy tghene datter ghegheuen worde,

7

Hierom heeft Iesus gheseyt. Laetse gheworden dat sij dat totten dach van mijnder begrauingen mach bewaren,

8

⁺Want altijt hebdy arme menschen met v, maer my en suldy altijt niet hebben,

+ B

9

Aldus heeft een groote scare van die Ioden gheweten dat hi daer was ende sij sijn daer ghecomen niet om Iesum alleene, maer om dat sij Lazarum sien souden, dien hi vander doodt verwect hadde,

10

Maer die princen der priesteren hebben ghedacht dat sij Lazarum dooden souden,

11

want om sijnen wille ghinghen veel vanden Ioden wech, ende gheloofden in Iesum.

* 12

Maer des ander daechs als een groote scare, die ghecomen was totten feestdach, ghehoort hadde dat Iesus quam nae Ierusalem,

13

soo hebben sij ghenomen palmboom tacken, ende sijn hem te ghemoete ghegaen ende sij riepen Hosanna. Ghebenedijt is hi die daer coemt inden naem des Heeren, die coninck van Israel,

14

Ende Iesus heeft gheuonden een ezelken, ende hi heeft daer op gheseten, ghelijct ghescreuen is.

15

⁺En wilt niet vreesen dochter van Sion, Siet v coninck coemt sittende opt vuelen van een ezelinne,

+ C

16

Dit en verstonden sijn discipelen niet ten iersten, maer doen Iesus gheglorificeert was, doen worden sij ghedachtich dat dese dinghen van hem ghescreuen waren, ende dat sij hem dit ghedaen hebben.

17

Hierom heeft hem ghetuyghenis ghegheuen die scare die met hem was doen hy Lazarum riep wten graue, ende hem verwecte vanden dooden,

18

Daerom is hem die scare ooc te ghemoete ghecomen, om dat sij ghehoort hadden dat hy dit teeken ghedaen hadde,

19

Hierom hebben die Phariseen tot malcanderen gheseyt. Siet ghi wel dat wij niet en vorderen? siet alle die werelt is na hem ghegaen,

20

Ende daer waren sommighe Heydenen van den ghenen die opwaerts comen waren om te aenbidden opden feestdach,

21

Aldus sijn dese ghecomen aen Philippus die van Bethsaida in Galileen was, ⁺ende sij baden hem seggende. Heere wij willen Iesum sien,

+ D

22

Philippus is ghecomen ende heuet Andree gheseyt, Andreas ende Philippus hebbent wederom Iesu gheseyt

23

Ende Iesus heeft hen gheantwoort segghende. Die vre is ghecomen dat die sone des menschen verclaert sal worden.

+ 24

Voorwaer voorwaer ick segghe v lieden, ten sij dat het terwen graen in deerde vallende sterue,

25

soo blijft dat alleen, maer eest dat versterft, so brenghet veel vruchten voorts, Soo wie sijn ziele lief heeft, die salse verliesen, ende soo wie sijn ziele haet in dese werelt, die salse totten eewighen leuen verwaren,

26

Eest dat iemant my dient, die volghe my, ende daer ick ben daer sal mijn dienaer oock wesen, Soo wie my dient, dien sal mijn vader eeren.

* 27

⁺Nv is mijn ziele verstoort, Ende wat sal ic segghen? Vader verlost my wt dese vre, Maer daerom ben ick in dese vre ghecomen,

+ E

28

Vader verclaert uwen naem, Hierom isser een stemme ghecomen wten hemel. Ic hebben verclaert, ende ick sal dien wederom verclaren

29

Hierom seyde die scare die daer stont ende dit ghehoort hadde, datter eenen donder gheweest was, Die ander seyden. Een Enghel heeft hem aenghesproken,

30

Iesus heeft gheantwoort ende gheseyt. Om mijnen wille en is dese stemme niet ghecomen, maer om v lieden.

+ 31

Nv eest des werelts ordeel, Nv sal die prince deser werelt daer buyten gheworpen worden,

32

Ende eest dat ick verhauen worde vander eerden so sal ic alle dinghen tot my seluen trecken

33

(Ende dit seyde hy te kennen gheuende wat doot dat hy steruen soude)

34

Ende die scare heeft hem gheantwoort. Wij hebben ghehoort wter wet, dat Christus blijft inder eewicheyt, ende hoe segt ghi dan. Die sone des menschen moet verheuen worden? Wie is dese sone des menschen?

35

⁺Hierom heeft Iesus hen gheseyt. Noch een luttel tijts is dlicht in v lieden. Wandelt die wijle dat ghy dlicht hebt, dat v die duysternissen niet en beuanghen, ende die in duysternissen wandelt, die en weet niet werwaerts dat hy gaet,

+ F

36

Die wijle dat ghi dlicht hebt, soo gelooft int licht op dat ghi kinderen des lichts moecht wesen, Dese dinghen heeft Iesus ghesproken, ende hy is wech ghegaen ende heeft hem verborghen van hen lieden.

* 37

Ende doen hy soo veel teekenen voor hen ghedaen hadde, soo en gheloofden si in hem niet,

38

om dat het woort van Isaias den propheet soude volbracht worden, dwelc hy gheseyt heeft. Heere wie heeft onsen ghehoore ghelooft? ende wien is den arm des Heeren gheopenbaert?

39

Daerom en mochten sij niet gheloouen, om dat Isaias wederom gheseyt heeft.

40

Hy heeft hen ooghen verblint, ende hen herte verhart alsoo dat sij niet sien en souden metten ooghen, ende niet verstaen metter herten, ende dat sij bekeert souden worden, ende dat icse ghenesen soude.

41

Dit heeft Isaias gheseyt doen hy sijn glorie ghesien heeft, ende heeft van hem ghesproken,

42

Maer nochtans hebbender ooc veel vanden princen in hem ghelooft, maer om die Phariseen en beleden sij dat niet, op dat sij wter synagogen niet en souden gheworpen worden,

43

⁺want sij hebben die glorie der menschen lieuer ghehadt dan die glorie Gods,

+ G

44

Maer Iesus heeft gheroepen ende gheseyt. Die in my ghelooft, die en ghelooft in my niet, maer in hem die my ghesonden heeft,

45

Ende die my siet, die siet hem die my ghesonden heeft.

+ 46

Ick ben een licht in die werelt ghecomen, op dat alle die in mi ghelooft in die duysternisse niet en blijue,

47

Ende eest dat iemant mijn woorden hoort ende die niet en bewaert, ick en ordeele hem niet, want ick en ben niet ghecomen dat ick die werelt soude ordeelen, maer om dat ick die werelt salich maken soude,

48

Die my versmaet ende mijn woorden niet en ontfanct, die heeft eenen die hem ordeelen sal, dwoort dat ick ghesproken hebbe, dat sal hem ordeelen inden wtersten dach,

49

Want ick en heb wt my seluen niet ghesproken, Maer die vader die my ghesonden heeft die heeft my een ghebodt ghegheuen wat ick segghen ende wat ick spreken soude,

50

Ende ick weet dat sijn ghebodt het eewich leuen is, Daerom dat ick spreke, dat spreeck ick alsoo my die vader gheseyt heeft.