Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

+ 1

⁺ENde daer was eenen siecken Lazarus van Bethanien, van dat casteelken van Maria en Martha sijnder suster,

+ A

2

Ende Maria was die ghene die den Heere ghesalft heeft met costelijcke salue, ende sijn voeten ghedroocht met haren hayre, wiens broeder Lazarus sieck was,

3

Hierom hebben sijn susters tot hem ghesonden segghende. Heere siet die ghy lief hebt die is sieck,

4

Ende Iesus hoorende, heeft tot hen gheseyt. Dese siecte en is ter doodt niet, maer om die glorie Gods, dat die sone Gods daer door mach gheglorificeert worden,

5

Ende Iesus beminde Martham ende haer suster Mariam ende Lazarum,

6

Hierom als hi ghehoort heeft dat hy siec was, soo is hy doen ghebleuen in die selue plaetse twee daghen,

7

en voorts daer na heeft hy tot sijnen discipelen gheseyt. Laet ons wederom in Iudeen gaen,

8

Sijn discipelen segghen tot hem. Rabbi, die Ioden sochten v nv om te steenen, en gaet ghy wederom derwaerts?

9

Iesus heeft gheantwoort. En sijnder niet twaelf vren des daechs? Eest dat iemant wandelt inden dach, soo en stoot hy hem niet, want hij dlicht van deser werelt siet,

10

Maer eest dat hi inden nacht wandelt hy stoot hem seluen, ⁺want het licht en is in hem niet,

+ B

11

Dit heeft hi ghesproken, ende daer nae seyt hi tot hen. Lazarus ons vrient slaept, maer ick ghae dat ick hem mach vanden slaep ontwecken,

12

Hierom hebben sijn discipelen gheseyt. Heere eest dat hy slaept, soo sal hi ghesont worden,

13

Maer Iesus hadde geseyt van sijnder doot, maer sij hebben ghemeynt dat hi van dat rusten des slaeps sprack,

14

Hierom heuet Iesus hen doen openlijck gheseyt. Lazarus is doot,

15

ende ic ben blijde om uwen wille, om dat ghy gheloouen moecht, dat ic daer niet en was, maer laet ons tot hem gaen,

16

Hierom heeft gheseyt Thomas die ghenoemt worde Didimus, tot sijn mede discipelen. Laet ons oock ghaen dat wij met hem steruen,

17

Aldus is Iesus ghecomen, ende hy heeft hem gheuonden dat hy vier daghen in tgraf gheweest hadde,

18

Ende Bethanien was by Ierusalem omtrent vijfthien stadien,

19

Ende veel vanden Ioden waren ghecomen tot Martham ende Mariam dat sij die troosten souden van haren broeder,

20

Aldus doen Martha ghehoort hadde dat Iesus quam is sij hem te ghemoete ghegaen, ⁺Maer Maria sadt thuys,

+ C

21

Hier om heeft Martha gheseydt tot Iesum. Heere hadde ghi hier gheweest, soo en waer mijn broeder niet ghestoruen,

22

Maer oock nv weet ick wel dat v Godt gheuen sal wat ghi van God begheert,

23

Iesus seyt haer. V broeder sal verrijsen,

24

Martha seyt tot hem. Ic weet wel dat hy verrijsen sal in die verrijsenisse inden wtersten daghe,

25

Iesus heeft haer gheseyt. Ick ben die verrijsenisse ende dleuen. Soo wie in my ghelooft al waer hy oock doot, soo sal hy leuen,

26

ende alle die leeft ende in my ghelooft, dien en sal niet steruen inder eewicheyt Gheloofdi dat?

27

Sij heeft tot hem gheseyt. Ia ic Heere Ick heb ghelooft dat ghi sijt Christus die sone Gods die in deser werelt comen sijt,

28

Ende als si dit gheseyt hadde soo is sij wech ghegaen, ende heeft Mariam haer suster gheroepen al stillijck segghende. Die Meester is hier, ende roept v,

29

Als sij dat ghehoort hadde soo staet si ter stont op, ende is ghecomen tot hem,

30

want Iesus en was noch int casteelken niet ghecomen, ⁺maer hy was noch op die plaetse daer hem Martha te ghemoete was ghecomen,

+ D

31

Hierom als die Ioden die met haer in huys waren ende haer troosten Mariam ghesien hadden, dat sij haestelijck opghestaen was, ende wtghegaen soo sijn sij haer gheuolcht segghende. Sij gaet totten graue, om daer te weenen,

32

Aldus doen Maria ghecomen was daer Iesus was, hem siende is sij aen sijn voeten gheuallen, ende seyt tot hem. Heere hadde ghy hier gheweest, soo en waer mijn broeder niet doot,

33

Hierom als haer Iesus sach weenen, ende die Ioden die met haer ghecomen waren, ooc weenende, soo heeft hy in sijnen gheest hem verscroomt, ende sij seluen ontstelt,

34

ende heeft gheseyt. Waer hebdi hem gheleyt? Sij segghen tot hem Heere coemt ende besieghet,

35

Ende Iesus heeft gheweent,

36

Hierom hebben die Ioden gheseyt. Siet hoe lief hadde hy hem,

37

Maer die sommighe van henlieden hebben gheseyt. En mocht dese, die de ooghen vanden blinden open ghedaen heeft, ⁺niet doen dat dese niet ghestoruen en hadde?

+ E

38

Hierom Iesus wederom verscroomende in sij seluen is ghecomen totten graue, Ende het was een speluncke ende eenen steen was daer op gheleydt,

39

Iesus seyde. Neemt wech den steen, Martha die suster van hem die ghestoruen was, seyt tot hem. Heere hy stinct nv, want hy is nv vier daghen doot,

40

Iesus seyt haer. En heb ic v niet gheseyt dat ghy (eest dat ghi ghelooft) sien sult die glorie Gods?

41

Aldus hebben sij den steen wech ghenomen, Ende Iesus sijn ooghen opwaerts heffende heeft gheseyt. Vader ic danc v dat ghi mi gehoort hebt,

42

maer ic wist wel dat ghi my altijts hoort, maer om tvolc dat hier rontsomme staet heb ict gheseyt, dat sij gheloouen souden dat ghy my ghesonden hebt.

43

Als hy dit gheseydt hadde, soo heeft hy met luyder stemmen gheroepen. Lazare coemt wte,

44

Ende terstont is hy voorts ghecomen die ghestoruen was, ghebonden aen handen ende voeten met banden, ende sijn aensicht was met eenen sweetdoeck ghebonden, ⁺Iesus heeft henlieden gheseyt ontbint hem ende laet hem gaen,

+ F

45

Hierom veel vanden Ioden die tot Mariam ende Martham ghecomen waren, ende ghesien hadden dat Iesus ghedaen hadde, hebben in hem ghelooft.

* 46

Maer die sommighe van henlieden sijn wech ghegaen tot die Phariseen, ende sij hebben hen gheseyt dat Iesus ghedaen hadde.

+ 47

Hierom hebben die ouerste priesters ende Phariseen den raet vergadert, ende sij seyden. Wat doen wij? want dese mensch doet veel teekenen,

48

Eest dat wij hem alsoo laten, soo sullen sij alle in hem gheloouen, ende die Romeynen sullen comen, ende sij sullen onse plaetse ende volck wechnemen

49

Maer een van henlieden Cayphas ghenaemt, mits dat hy ouerste priester was van dien iare, heeft tot hen gheseyt. Ghi en weet niet met allen,

50

noch ghi en dencket niet dattet onslieden orbaerlijc is, datter een mensch sterue voort volck, ende dat alle tvolck niet en vergae,

51

Maer dat en seyde hy van sij seluen niet, maer midts dat hy die ouerste priester was van dien iare, so heeft hy ghepropheteert, dat Iesus steruen soude voor dat volck,

52

ende niet alleen voor dat volck, ⁺maer oock om dat hy die kinderen Gods die verstroyt waren in een soude vergaderen,

+ G

53

Hierom hebben sij van dien daghe voorts ghedacht dat sij hem dooden soude,

54

Daerom en wandelde Iesus nv voorts niet openbaerlijc bi die Ioden, maer hy is wech ghereyst in dlantscap by die woestijne in een stadt die ghenoemt wort Ephrem, ende aldaer bleef hy met sijnen discipelen.

* 55

Ende der Ioden paesschen was seer by nakende, Ende daer isser vele vanden lande opghetrocken nae Ierusalem voor paesschen dat sij hen seluen heylich maken souden.

56

Hierom hebben sij Iesum ghesocht, ende si spraken tot malcanderen inden tempel staende. Wat meyndi, dat hy niet en is ghecomen tot den feestdach?

[p. *825]

Ende die ouerste priesters ende Phariseen hadden een ghebodt ghegheuen, dat soo wie vername waer hi ware, dat hijt te kennen gaue op dat sij hem vanghen mochten.