Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

+ 1

⁺VOorwaer voorwaer ick segghe v lieden, die door die doere niet en ghaet inden scaepstal der scapen, maer climt van elders binnen, dat is een dief ende een moordenaer,

+ A

2

Maer so wie door die doere ingaet, dat is een herder der scapen,

3

Desen doet die doorwaerder open, ende die scapen hooren sijn stemme, ende sijn eyghen scapen roept hy by name, ende hy leydt die wte,

4

Ende als hy sijn eyghen scapen wtghelaten heeft, soo gaet hy voor hen, ende die scapen volghen hem, Want sij kennen sijn stemme,

5

Maer eenen vreemden en volghen sij niet, maer sij vlieden van hem, want sij en kennen die stemme van dien vreemden niet,

6

Dese ghelijckenisse heeft hen Iesus gheseyt. Ende sij en verstonden niet wat hy hen seyde.

7

Hierom heeft Iesus hen wederom gheseyt. Voorwaer voorwaer ick segghe v ick ben die doere der scapen,

8

⁺Alle die ghecomen sijn, dat sijn dieuen ende moordenaers, maer die scapen en hebben hen niet ghehoort,

+ B

9

Ick ben die doere. So wie door my ingaet, die sal behouden worden, ende hi sal ingaen ende wtgaen ende sal weyde vinden,

10

Een dief en coemt niet dan om te stelen ende te dooden ende te verderuen, Ick ben ghecomen dat sij souden dleuen hebben, ende oueruloedelijcker hebben.

* + 11

Ick ben een goet herder, Een goet herder gheeft sijn ziele voor sijn scapen,

12

Maer een huerlinck die gheen herder en is, ⁺wiens die schapen niet eyghen en sijn die siet den wolf comen, ende hy verlaet die scapen ende vliet, ende die wolf grijpt ende verstroyt die scapen,

+ C

13

maer die huerlinc vliedt om dat hi een huerlinc is, ende hy en draecht voor die scapen gheen sorghe,

14

Ick ben een goet herder, ende ic ken die mijne, ende die mijne kennen my,

15

Ghelijck my die vader kent, alsoo ken ick den vader, ende mijn ziele stelle ick voor mijn scapen,

16

Ende ic heb noch ander scapen die van desen scaepstal niet en sijn dese moet ick oock hier by brenghen, ende sij sullen mijn stemme hooren, ende tsal eenen scaepstal worden ende eenen herder.

* 17

Daerom heeft my die vader lief, om dat ick mijn ziele late op dat ickse wederom nemen mach,

18

Niemant en neemt die van my, ⁺maer ic late die van my seluen, Ick heb macht die te laten, ende ick heb macht die wederom te nemen, Dit ghebot heb ic ontfanghen van mijnen vader.

+ D

19

Daer is wederom eenen twist gheworden onder die Ioden om dese woorden,

20

Want veel van henlieden seyden. Hy heeft den duyuel, ende hy raest, waer toe hoordi hem?

21

Die ander seyden. Dese woorden en sijn niet van eenen die den duyuel heeft, Mach die duyuel der blenden ooghen open doen?

+ 22

Ende tis gheworden die feest van des tempels wijdinghe in Ierusalem, ende het was winter,

23

⁺Ende Iesus wandelde in den tempel in Salomons portael.

+ E

24

Aldus hebben hem die Ioden omringelt ende seyden tot hem. Hoe langhe houdy onse zielen in twijfel? Sijt ghi Christus soo segghet ons openlijck,

25

Iesus heeft hen gheantwoort. Ick segt v, ende ghi en ghelooues niet, Die wercken die ick doe in mijns vaders naem, dese gheuen ghetuyghenis van my,

26

maer ghi en ghelooues niet, want ghy en sijt van mijnen scapen niet,

27

Mijn scapen hooren mijn stemme, ende ick kense, ende sij volghen my,

28

ende ick gheue hen dat eewich leuen, ende sij en sullen niet vergaen inder eewicheyt, ende niemant en sal die roouen wt mijn hant,

29

⁺Dat mijn vader mi ghegheuen heeft dat is het meeste van al, ende niemant en macht roouen wt mijns vaders hant,

+ F

30

Ick ende die vader sijn een,

31

Die Ioden hebben steenen ghenomen dat sij hem steenen souden,

32

Iesus heeft hen gheantwoort. Veel goede wercken heb ick v lieden ghetoont van mijnen vader, om welc van dien wercken steent ghi my?

33

Die Ioden hebben hem gheantwoort. Van gheen goet werck en steenen wij v, maer van die blasphemie ende om dat ghi die een mensch sijt, v seluen God maect

34

Iesus heeft gheantwoort. En isser niet ghescreuen in v wet, Ick heb gheseydt ghy sijt goden?

35

Eest dat hy die goden ghenoemt heeft totten welcken Gods woort ghedaen is gheweest, ende die scriftuere niet en mach ghebroken worden,

36

den welcken die vader gheheylicht heeft ende ghesonden in die werelt segde ghilieden ghi blasphemeert om dat ic gheseyt hebbe. ⁺Ic ben Gods sone?

+ G

37

Eest dat ick mijns vaders wercken niet en doe, soo en wilt my niet gheloouen,

38

Maer eest dat ickse doen, ende eest dat ghy my niet en wilt gheloouen, soo ghelooft den wercken, op dat ghy kennen moecht ende gheloouen dat die vader in my is, ende ic inden vader.

* 39

Hierom begheerden sij hem te vanghen, ende hy is ghegaen wt haren handen,

40

Ende hy is wederom wech ghegaen ouer die Iordane te dier plaetsen daer Iohannes ierstmael doopende was, ende hy is daer ghebleuen,

41

ende veel isser tot hem ghecomen ende sij seyden, Iohannes en heeft voorwaer gheen teeken ghedaen,

42

Ende alle dat Iohannes van desen gheseyt heeft

[p. *824]

was warachtich, Ende vele hebben in hem ghelooft.