Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .ix. Capittel.

+ 1

⁺ENde Iesus voerbi gaende heeft ghesien eenen mensch die blent was gheboren,

+ A

2

ende sijn discipelen hebben hem ghevraecht Rabbi wie heefter ghesondicht, dese oft sijn ouders, dat hy blint soude gheboren worden?

3

Iesus heeft gheantwoert. Noch dese en heeft ghesondicht, noch sijn ouders, maer om dat die wercken Gods souden gheopenbaert worden in hem.

4

Ick moet wercken die wercken van hem die my ghesonden heeft, tot dat dach is. Den nacht coemt alser niemant wercken en mach,

5

alsoe langhe als ick in die werelt ben, soe ben ic dlicht der werelt.

6

Als hi dese dinghen gheseyt hadde, soe heeft hy op die eerde wt ghespogen, ende heeft slijm ghemaect van speecsel, ende dat slijm ghestreken op sijn ooghen,

7

ende hi heeft tot hem gheseyt, Gaet henen ende wascht v in die piscine van Siloe, dwelck te segghen is, ghesonden. Hier om is hy ghegaen ende heeft hem ghewaschen, ende hi is ghecomen siende,

8

Aldus sijn ghebueren, ⁺ende die hem te voren ghesien hadden dat hi een bedelaer was seyden, En is dit niet die sadt ende almisse badt.

+ B

9

Die andere seyden, het is die, Maer die andere seyden, Gheenssins, maer hi is hem ghelijck. Maer hi seyde, Ic bent.

10

Hier om hebben sij hem gheseyt, Hoe sijn v die oogen open ghedaen?

11

Hi heeft gheantwoert die mensch die Iesus ghenaemt is, heeft slijm ghemaect ende hy heeft mijn oogen ghesmeert, ende tot my gheseyt, Gaet henen aen die piscine van Siloe ende wasschet. Ende ic ben wech ghegaen, ende heb ghewasschen ende ghesien.

12

Ende sij hebben hem geseyt, Waer is die? Hy heeft gheseyt ick en wets niet,

13

Sij brenghen hem totten Phariseen die blent gheweest was,

14

Ende het was sabboth als Iesus dat slijm ghemaect heeft, ende sijn ooghen gheopent.

15

⁺Hier om hebben hem die Phariseen wederom ghevraecht hoe dat hi siende was gheworden. Ende hy heeft hen gheseyt, Slijm heeft hy op mijn ooghen gheleyt, ende ic hebt af ghewasschen, ende ic sie.

+ C

16

Hier om seyden sommighe vanden Phariseen. Dese mensch en is van Godt niet die den Sabboth niet en bewaert. Maer die andere seyden, Hoe mach een sondich mensch dese teekenen doen? Ende daer was eenen tweedracht tusschen hen.

17

Hier om hebben sij den blenden weder om gheseyt, Wat segt ghi vanden ghenen die v ooghen openghedaen heeft? Ende hy heeft gheseyt, Dat hy een propheet is,

18

Aldus en hebben die Ioden niet ghelooft van hem dat hy blent gheweest was, ende siende was worden, tot dat sij gheroepen hebben die ouders van hem die siende was worden,

19

ende sij hebben hen ghevraecht segghende, Is dit v lieder sone den welcken ghy segt dat blent gheboren is. ⁺Hoe siet hy dan nu?

+ D

20

Sijn ouders hebben hen gheantwoert, ende gheseyt, Wi weten wel dat dit onse sone is, ende dat hi blent gheboren is,

21

maer hoe dat hy nu siet dat en weeten wi niet, ende wie hem die ooghen gheopent heeft en weeten wy niet, Vraghet hem, hy is out ghenoch, laet hem voer sij seluen spreken.

22

Dit hebben sijn ouders gheseyt om dat sij die Ioden vreesden, want die Ioden hadden ouer een ghedraghen, waert sake datter iemant beleedt hem christum te sijne, dat die buyten der synagogen soude ghedaen worden.

23

Daer om hebben sijn ouders gheseyt, Hy is oudt ghenoech

[p. *823]

vraghet hem.

24

⁺Hier om hebben sij wederom den mensch gheroepen die blent gheweest hadde, ende si hebben hem gheseyt. Gheeft Gode die glorie, Wij weten dat dese mensch een sondaer is,

+ E

25

Hierom heeft hi henlieden gheseyt. Oft hy een sondaer is dat en weet ick niet, een dinck weet ick, dat ick nv sien daer ic ierst blent was,

26

Hierom hebben sij hem gheseyt. Wat heeft hy v ghedaen? hoe heeft hy v ooghen open ghedaen?

27

Hy heeft hen gheantwoort. Ic hebt v nv gheseyt, ende ghi hebbet ghehoort, wat wildijt wederom hooren? wildt ghi oock sijn discipelen worden?

28

Hierom hebben sij hem vermalendijt ende gheseyt. Weest ghy sijn discipel, maer wij sijn Moyses discipelen,

29

Wij weten dat Godt Moysi aenghesproken heeft, Maer desen en weten wij niet van waer hy is,

30

⁺Die mensch heeft gheantwoort ende hen gheseyt. Hier in eest een wonderlijck dinck dat ghi niet en weet van waer dat hi is, ende dat hy mijn ooghen gheopent heeft.

+ F

31

Wij weten dat Godt die sondaers niet en hoort, maer isser iemandt Gods dienaer, ende doet sijnen wille, desen verhoort hy,

32

Van tbeghin der werelt en eest niet ghehoort, dat iemant open ghedaen heeft die ooghen van eenen die blent gheboren was,

33

En waer dese van God niet, so en soude hy niet hebben moghen doen,

34

Sij hebben gheantwoort ende hem gheseyt. Ghy sijt heel in sonden gheboren, ende leerdi ons? Ende si hebben hem wtghestooten,

35

Iesus heuet ghehoort dat sij hem wtghestooten hebben, ⁺ende als hy hem vonden hadde soo heeft hi tot hem gheseyt. Gheloofde ghi inden sone Godts?

+ G

36

Hy heeft gheantwoort ende gheseydt. Wie eest Heere, op dat ick in hem mach gheloouen?

37

Ende Iesus heeft tot hem gheseyt. Ende ghi hebt hem ghesien, ende die met v spreect die eest,

38

Ende hy heeft gheseydt. Ick ghelooue Heere, Ende nederuallende heeft hy hem aenghebeden.

* 39

Ende Iesus heeft hem gheseyt. Tot een ordeel ben ick in dese werelt ghecomen dat die ghene die niet en sien, souden sien, ende dat die ghene die sien, souden blent worden,

40

Ende sommighe vanden Phariseen die met hem waren hebbent ghehoort, ende tot hem gheseyt. Sijn wij dan oock blent?

41

Iesus heeft hen gheseyt. Waerdi blent soo en soudi gheen sonde hebbeu, Maer nv segdi, Wij sien, soo blijft v sonde.