Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

+ 1

⁺MAer Iesus is ghereyst totten berch van Oliueten,

+ A

2

ende des morghens is hi wederom comen inden tempel, ende alle tvolck quam tot hem, ende sittende leerde hi henlieden.

3

Ende die Scriben ende Phariseen brenghen tot hem een vrouwe in ouerspel beuonden, ende sij hebben haer int midden ghestelt,

4

ende hebben tot hem gheseyt, Meester dese vrouwe is nu beuonden in ouerspel.

5

Maer in die wet heeft ons Moyses beuolen alsulcke te steenen. Aldus wat segt ghy?

6

Ende dit seyden sij hem tempterende, dat sij hem souden moghen besculdighen. Maer Iesus hem buygende nederwaerts heeft metten vingher in die eerde ghescreuen.

7

Hier om als sij hem bleuen vraghende, soe heeft hy hem opghericht, ende tot hen gheseyt, Die van v lieden sonder sonde is, die worp den iersten steen op haer.

8

Ende wederom sij seluen buyghende screef hi in deerde.

9

Ende dit hoorende ghinghen sij deen nae dander wt, beghinende vanden outsten, ende Iesus is daer alleen ghebleuen, ende die vrouwe int midden staende.

10

Ende Iesus hem oprichtende heeft tot haer gheseyt. Vrouwe waer sijn sij die v besculdichden? en heeft v niemant verdoemt?

11

Die welcke heeft gheseyt, Niemant Heere. Ende Iesus heeft gheseyt, Ick en sal v oock niet verdoemen. Gaet henen ende en wilt nu voerts niet meer sondighen.

* 12

Wederom heeft Iesus tot hen ghesproken segghende. + ⁺Ic ben dlicht der werelt. Wie my volcht die en wandelt in duysternissen niet, maer hi sal dlicht des leuens hebben,

+ B

13

Hier om hebben hem die Phariseen gheseyt. Ghi gheeft van v seluen ghetuyghenis, v ghetuyghenis en is niet warachtich,

14

Iesus heeft gheantwoert ende hen gheseyt, Al eest dat ic ghetuyghenis gheue van my seluen mijn ghetuyghenis is warachtich. Want ic weet van waer ic ghecomen ben, ende waer dat ic henen gae, maer ghi lieden en weet niet van waer ick come, oft werwaerts dat ic gae.

15

Ghi ordeelt na tvleesch, ic en ordeel niemanden,

16

ende eest dat ic ordeele, soe is mijn ordeel warachtich, want ic en ben alleen niet, maer ic ende die vader die my ghesonden heeft.

17

Ende in v wet is ghescreuen, dat het tghetuyghenis van twee menschen warachtich is.

18

Ick bent die ghetuyghenis gheue van my seluen, ⁺ende die vader die my ghesonden heeft, gheeft ooc ghetuyghenis van my.

+ C

19

Hier om seyden sij tot hem. Waer is v vader? Iesus heeft gheantwoert, Ghi en kent noch my noch mijnen vadere, waert sake dat ghi my kendet soe soudi bijauontueren mijnen vader ooc kennen.

20

Dese woerden heeft Iesus ghesproken in die tresoirie leerende inden tempel, ende niemant en heeft hem gheuanghen, want sijn vre en was noch niet ghecomen.

* 21

Hier om heeft Iesus hen wederom gheseyt. + Ic gae, ende ghi sult my soecken, ende in v sonde suldi steruen. Daer ic henen gaen daer en moechdi niet comen.

22

Hier om hebben die Ioden gheseyt, sal hy sij seluen dooden, dat hy seyt, Daer ic henen gaen daer en moechdi niet comen?

23

Ende hy seyde hen. Ghi sijt van beneden. Ic ben van bouen. Ghy sijt van deser werelt, ic en ben van deser werelt niet.

24

Hier om heb ic v lieden gheseyt dat ghi steruen sult in v sonden. ⁺Want eest dat ghi lieden niet en ghelooft dat ict ben, soe suldi in v sonden steruen.

+ D

25

Daer om hebben sij hem gheseyt, Wie sijt ghi? Iesus heeft hen gheseyt, Het beghinsel die tot v ooc spreke.

26

Ick heb vele van v lieden te segghen ende te ordeelen, maer die my ghesonden heeft die is warachtich, ende die dinghen die ic van hem ghehoort hebbe die spreke ic in die werelt.

27

Ende sij en hebben niet verstaen dat hi hen den vader Godt noemde.

28

Hier om heeft Iesus hen lieden gheseyt, Als ghy den sone des menschen sult verhauen hebben, dan suldi bekennen dat ict ben, ende dat ic van my seluen niet en doe, maer ghelijck my die vader gheleert heeft alsoe spreeck ick,

29

ende die my ghesonden heeft die is met my, ende hy en heeft my niet alleen ghelaten, want dat hem behaghelijc is doe ic altoos.

* 30

Als hy dese dinghen sprekende was, soe hebben-

[p. *822]

der vele in hem ghelooft.

* 31

Hier om heeft Iesus gheseyt tot dien Ioden die in hem ghelooft hebben. Eest sake dat ghi lieden in mijn woerden blijft, soe suldi warachtelijck mijn discipelen sijn,

32

ende ghi sult die waerheyt kennen, ende die waerheyt sal v verlossen,

33

Sij hebben hem gheantwoert. Wy sijn Abrahams saet, ende wy en hebben noyt iemanden ghedient. Hoe segt ghi dan, Ghy sult vrij sijn?

34

Iesus heeft hen gheantwoert, Voerwaer Voerwaer ick segghe v lieden, dat alle die sonde doet, een knecht der sonden is,

35

ende een knecht en blijft int huys niet inder eewicheyt, die sone blijft inder eewicheyt,

36

daer om eest dat v die sone verlost, soe suldi warachtelijck vrij sijn,

37

Ic weet wel dat ghy Abrahams kinderen sijt, ⁺maer ghi soect my te dooden, om dat mijn woert in v gheen stadt en grijpt,

+ E

38

Ick spreke tghene dat ick by den vader ghesien hebbe, ende ghi doet tghene datghi by uwen vader ghesien hebt.

39

Sij hebben gheantwoort ende hem gheseyt, Onse vader es Abraham Iesus seyt hen, Sijt ghy Abrahams kinderen, soe doet Abrahams wercken,

40

Maer nu soect ghy my te dooden, eenen mensch die v die waerheyt ghesproken hebbe, die ic ghehoort hebbe van Godt, dat en heeft Abraham niet ghedaen.

41

Ghy doet ws vaders wercken. Aldus hebben sij hem gheseyt, Wy en sijn niet onwettelijck gheboren. Wy hebben eenen vader Godt.

42

Hier om heeft Iesus tot hen gheseyt. Waer Godt v vader, soe soude ghi lieden voerwaer my liefhebben, Want ick ben wt ghegaen ende ghecomen van Godt. Want ic en ben van my seluen niet ghecomen, maer hy heeft my ghesonden.

43

Waer om en kendi mijn sprake niet? Want ghy en moecht mijn woerden niet hooren.

44

⁺Ghy sijt vanden vader den duyuel, ende die lusten ws vaders wildi doen, die was een doot slagher vanden beghinne, ende hi en heeft in die waerheyt niet ghestaen. Want in hem en is gheen waerheyt. Als hy een loghen spreect, soe spreect hy wt sijnen eyghen, want hi is loghenachtich ende een vader der seluer.

+ F

45

Maer om dat ic die waerheyt segghe soe en gheloofdi my niet.

* + 46

Wie van v lieden sal my berispen van een sonde? Eest dat ic v die waerheyt segghe, waer om en gheloofdi my niet?

47

Die wt Godt is, die hoort Gods woerden. Daer om en hoorde ghy niet, om dat ghi wt Gode niet en sijt,

48

Hier om hebben die Ioden gheantwoert ende hem gheseyt, En segghen wy niet wel dat ghi een Samaritaen sijt, ende den duyuel hebt?

49

Iesus heeft gheantwoert, Ic en heb gheenen duyuel, maer ic eere mijnen vader, ende ghi hebt mi onteert.

50

Maer icen soecke mijn glorie niet daer is een diese soeken ende ordeelen sal,

51

⁺Voerwaer Voerwaer ick segghe v lieden eest dat iemant mijn woert bewaert, die en sal die doot niet sien inder eewicheyt.

+ G

52

Daer om seyden die Ioden, Nu hebben wy bekent dat ghi den duyuel hebt Abraham is doot, ende die Propheten, ende ghy segt, soe wie mijn woerden hoort die en sal die doot niet smaken inder eewicheit.

53

Sijtghi meerder dan onse vader Abraham die ghestoruen is? ende die propheten sijn ghestoruen, Wien maecti v seluen?

54

Iesus heeft gheantwoert eest dat ic my seluen glorificere, soe en is mijn glorie niet? Daer is mijn vader die mij glorificeert, den welcken ghi segt dattet v lieder Godt is,

55

Ende ghi en hebt hem niet ghekent, maer ick heb hem ghekent. Ende eest dat ic segghe dat ic hem niet en kenne, soe sal ick ws ghelijck sijn loghenachtich, Maer ic kenne hem, ende ic onderhoude sijn woerden,

56

Abraham v vader heeft hem verhuecht dat hy mijnen dach sien soude, ende hi heeften ghesien, ende heeft hem verblijt.

57

Hier om hebben die Ioden tot hem gheseyt. Ghi en hebt noch gheen vijftich iaren, ende hebdi Abraham ghesien?

58

Iesus heeft hen gheseyt, Voerwaer voerwaer ic segghe v lieden, eer Abraham worde ben ic.

59

Hier om hebben die Ioden steenen ghenomen om op hem te werpen. Maer Iesus heeft hem gheborgen, ende is wt den tempel ghegaen.