Den gheheelen Bybel, Inhoudende het oude ende nieuwe Testament (Leuvense bijbel 1548)

Dt .vij. Capittel.

+ 1

⁺NAe desen wandelde Iesus in Galileen, want hi en wilde in Iudeen niet wandelen, want die Ioden sochten hem te dooden.

+ A

2

Ende den feestdach der Ioden Scenohegia was seer nae by.

3

Ende sijn broeders hebben tot hem gheseyt, Gaet ouer van hier ende reyst in Iudeen, op dat ooc v discipelen moghen sien v wercken die ghi doet.

4

Want voerwaer niemant en doet iet int heymelijck, ende begheert seluer int openbaer te sijne, eest dat ghi dese dinghen doet, soe vertoont v seluen der werelt.

5

Want sijn broeders en gheloofden in hem niet.

6

Hier om seyt Iesus tot hen, Mijnen tijt en is noch niet aen comen, maer uwen tijt is altoos ghereedt.

7

Die werelt en can v niet ghehaten, maer sij haet my. Want ic gheue daer af ghetuyghenis dat haer wercken quaet sijn.

8

⁺Gaet ghi opwaerts tot desen feestdach. Ick en gaen niet opwaerts tot desen feestdach. Want mijnen tijt en is noch niet veruult.

+ B

9

Als hy dese woorden gheseyt hadde, soe is hy ghebleuen in Galilieen.

10

Maer als sijn broeders opwaerts ghereyst waren, doen is hy ooc opwaerts ghetrocken totten feestdach niet openbaerlijc, maer als int heymelijck.

11

Hier om sochten hem die Ioden opden feestdach, ende seyden. Waer is die?

12

Ende daer was een groote murmuratie inder scaren van hem. Want die sommighe seyden. Hy is goet, Maer die andere seyden Neen, maer hi verleyt die scaren.

13

Maer niemant en sprack openbaerlijc van hem om die vrese der Ioden.

* 14

+ Als dan nu den feestdach half ouerleden was, soe is Iesus opgheclommen inden tempel, ende leerde.

15

Ende die Ioden verwonderden hen segghende, Hoe can dese die scriften daer hy die niet gheleert en heeft?

16

Iesus heeft hen gheantwoert ende gheseyt, ⁺Mijn leeringhe en is mijne niet, maer des gheens die my ghesonden heeft.

+ C

17

Eest datter iemant sijnen wille doen wilt, die sal verstaen van die leeringhe, oftse wt Gode is oft dat ick wt my seluen spreke.

18

Die van sij seluen spreect, die soect sijn eyghen glorie. Maer soe wie die glorie soect van den ghenen die hem ghesonden heeft, dese is warachtich, ende in hem en is gheen ongherechticheyt.

19

En heeft Moyses v die wet niet ghegheuen? Ende niemant van v lieden en doet die wet?

20

Waer om soecti my te doden? Die scare heeft gheantwoert, ende gheseyt, Ghi hebt den duyuel. Wie soect v te dooden?

21

Iesus heeft gheantwoert, ende tot hen gheseyt, Een werck heb ic ghedaen ende ghy verwondert v allegader.

22

Daer om heeft v Moyses die besnijdenisse ghegheuen. Niet om dat die van Moyses is, maer van den vaderen, ende opden sabboth soe besnijdt ghi den mensch

23

eest dat die mensch die besnijdenisse ontfanct opden sabboth, ⁺alsoe op dat die wet van Moyses niet ghebroken en worde wert ghi veronwaerdicht op my om dat ic den gheheelen mensch heb ghesont gemaect opden sabboth?

+ D

24

En wilt niet ordeelen na daensicht, maer oordeelt een recht ordeel.

25

Hier om seyden die sommighe van Ierusalem. En is dit niet die ghene dien sij soeken te doden?

26

Ende siet hi spreect openbaerlijck, ende sij en segghen hem niet. Hebben die princen warachtelijc bekent dat dese christus is?

27

Maer van desen weten wi van waer hy is, Maer als Christus comen sal, soe en weet niemant van waer hi is.

28

Hier om heeft Iesus geroe-

[p. *821]

pen inden tempel leerende ende segghende, Ghi kent my ende ghy weet van waer ic ben, ende ic en ben van my seluen niet gecomen, maer hi is warachtich, die my ghesonden heeft, den welcken ghi niet en kent.

29

Ic ken hem, want ic ben van hem, ende hy heeft mi ghesonden.

30

Hier om sochten sij hem te vanghen ende niemant en sloech die handen aen hem, want sijn vre en was noch niet ghecomen,

31

Maer vander scaren heefter vele in hem ghelooft. * ⁺Ende sij seyden, Christus als hy sal ghecomen sijn, sal hy meer teekenen doen, dan dese doet?

+ E

32

Die Phariseen hebben die scare ghehoort dese dinghen murmurerende van hem. + Ende die princen ende Phariseen hebben dienaren ghesonden dat sij hem souden vanghen.

33

Hier om heeft Iesus tot hem gheseyt, Noch een luttel tijts ben ic met v lieden, ende ick gae tot hem die my ghesonden heeft.

34

Ghy sult my soecken, ende niet vinden, ende daer ick ben, daer en moechde ghi niet comen.

35

Hierom hebben die Ioden tot malcanderen gheseyt. Waer sal dese henen gaen, dat wy hem niet vinden en sullen? sal hy in die verstroytheyt der heydenen gaen ende leeren die heydenen?

36

Wat woert is dit, dat hy gheseyt heeft, Ghy sult my soecken ende niet vinden, ende daer ic ben daer en moechde ghi lieden niet comen?

37

Maer opden laesten grooten dach des hoochtijts soe stont Iesus ende riep segghende, Soe wie dorst heeft, die come tot my ende drincke.

38

⁺Die in mi ghelooft, ghelijc die scriftuere seyt, vloeden des leuende waters sullen van sijnen buyck vloeyen,

+ F

39

(Maer dat seyde hy vanden gheest den welcken sij ontfanghen souden die in hem gheloofden. * Want den gheest en was noch niet ghegheuen, Want Iesus en was noch niet gheglorificeert)

40

Hier om als die sommighe van die scare dese sijn woerden ghehoort hadden, soe seyden sij, Dit is warachtelijck een propheet.

41

Die andere seyden. Dit is Christus. Maer die sommighe seyden, Coemt Christus van Galileen?

42

En seyt die scriftuere niet dat Christus coemt wt Dauids sade ende van dat stedeken van Bethlehem daer Dauid was.

43

Aldus isser eenen twist worden onder die scare om sijnen wille.

44

Ende die sommighe van henlieden wilden hem vanghen, maer niemant en sloech die handen aen hem,

45

Hier om sijn die dienaers ghecomen tot die ouerste priesters ende Phariseen. Ende die hebben hen gheseyt, ⁺Waer om en hebdi hem niet mede ghebracht?

+ G

46

Die dienaren hebben gheantwoert, Noyt en heeft mensch alsoe ghesproken, ghelijc dese mensch,

47

Hier om hebben die Phariseen hen lieden gheantwoert. Sijde ghi oock verleyt?

48

Heeft iemant vanden princen in hem ghelooft, oft vanden Phariseen?

49

Maer dese scare die de wet niet en weet, is vermalendijt.

50

Nicodemus heeft tot hem gheseyt, die ghene die tot Iesum des nachts quam, die een van henlieden was,

51

Ordeelt ons wet eenighen mensch, ten sij datmen ierstmael van hem ghehoort hebbe, ende wete wat hy doet?

52

Sy hebben hem gheantwoert ende gheseyt. Sijdi ooc een Galileus man? Ondersoect ende siet dat van Galileen gheen propheet en op staet,

53

Ende sij sijn wederghekeert een ieghelijck in sijn huys.