Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

+ 1

⁺HIer nae is Iesus wech ghereyst ouer die zee van Galileen dwelck is Tiberiadis,

+ A

2

ende hem volchde een groote scare, om dat sij saghen die teekenen die hi dede ouer die ghene die sieck waren.

3

Hier om is Iesus op eenen berch gheclommen, ende daer sadt hi met sijnen discipelen.

4

Ende Paesschen was seer bi nakende den feestdach der Ioden.

5

Als dan Iesus sijn oogen opghehauen hadde, ende ghesien datter een seer groote menichte tot hem ghecomen was, soe seyt hy tot Philippum. Waer mede sullen wy brooden coopen dat dese eten moghen?

6

Ende dat seyde hy hem tempterende, want hy wist wel wat hy doen soude,

7

Philippus antwoerde hem, Om twee hondert penninghen brooden en sijn hen niet ghenoech, om dat een ieghelijck een weynich mocht nemen.

8

Een van sijnen discipelen Andreas, die broeder van Simon Petrus seyt hem,

9

Hier is een kint dat heeft vijf ghersten brooden, ende twee visschen, maer wat sijn dese onder soe vele?

10

Hier om seyt Iesus, ⁺Doet die luyden sitten. Ende daer was veel hoys in die plaetse. Aldus sijnder mans gheseten in ghetale by nae vijf duysent.

+ B

11

Hier om heeft Iesus die brooden ghenomen, ende als hy ghedanct hadde, soe heeft hy die bedeylt den ghenen die daer saten, desghelijcs ooc van den visschen, soe veel als sij wilden.

12

Ende als sij versaet waren, soe heeft hi sijnen discipelen gheseyt, Vergadert die brockelinghen die ouerbleuen sijn dat die niet verloren en gaen.

13

Aldus hebben sij die vergadert, ende ghevult tweelf coruen brockelinghen, van vijf ghersten brooden, die ouerghebleuen waren den ghenen die daer gheten hadden.

14

Hier om seyden die menschen (doen sij ghesien hadden het teeken dat Iesus ghedaen hadde) Dit is voerwaer die propheet, die daer toecomende is in die werelt.

* 15

Hier om als Iesus verstaen hadde dat sij comen souden om hem begrijpen, ende coninc te maken, soe is hi wederom gheuloden opden berch hy alleen.

16

Ende alst auont was gheworden, soe sijn zijn discipelen nederwaerts ghegaen ter zee.

17

Ende als sij int scip gheclommen waren, soe sijn sij ghecomen ouer die zee in Capharnaum, ende het was doen doncker gheworden, ende Iesus was tot hen niet ghecomen.

18

Ende als daer eenen grooten wint waeyende was soe verhief haer die zee.

19

Aldus doen sij gheroeyt hadden omtrent vijuentwintich oft dertich stadien, soe sien sij Iesum wandelende op die zee, ende by dat scip comen, ende sij hebben ghevreest.

20

Maer hy heeft hen gheseyt, Ic bent, en wilt niet vreesen.

21

⁺Aldus hebben sij hem willen ontfanghen in scip, ende ter stont was tscip aent lant daer sij henen voeren.

+ C

22

Des anderen daechs, soe heeft die scare die ouer die zee stont, ghesien datter maer een sceepken en was, ende dat Iesus met sijnen discipelen int scip niet ghecomen en was, maer dat sijn discipelen alleen wech gheuaren waren,

23

maer daer sijn ander scepen ouergecomen van Tiberiade, omtrent die plaetse daer sij tbroot hadden gheten als die Heere dancte.

24

Als dan die scare ghesien hadde dat Iesus daer niet en was, noch sijn discipelen, soe sijn sij in die sceepkens gheclommen ende ghecomen tot Capharnaum soeckende Iesum.

25

Ende als sij hem gheuonden hadden ouer die zee, soe hebben sij hem gheseyt, Rabbi wanneer sijt ghi hier ghecomen?

26

Iesus heeft hen geantwoert ende gheseyt, Voerwaer voerwaer ic segghe v ghi soect my, niet om dat ghi teekenen ghesien hebt, maer om dat ghi gheten hebt vanden brooden ende versaet sijt.

27

Werct spijse die niet en vergaet maer die altijt blijft totten eewigen leuen die v die sone des menschen gheuen sal) want desen heeft Godt die vader besegelt.

28

Hier om hebben sij tot hem gheseyt, Wat sullen wy doen dat wy Gods wercken moghen wercken?

29

Iesus heeft gheantwoert, ende hen gheseyt, Dat is Gods werck, dat ghy ghelooft in den ghenen die hy ghesonden heeft.

30

Hier om hebben sij hem gheseyt, Wat teeken doedi dan, ⁺dat wijt sien moghen ende v gheloouen? Wat werck doet ghy?

+ D

31

Onse vaderen hebben manna gheten in die woestijne ghelijck daer ghescreuen is. Broot vanden hemel heeft hy hen teten ghegheuen.

32

Hier om heeft Iesus hen gheseyt, Voerwaer voerwaer ick seg v lieden Moyses en heeft v tbroot vanden hemel niet ghegheuen, maer mijn vader gheeft v warachtich broot vanden hemel.

33

Want het es Gods broot dat vanden hemel nederdaelt, ende gheeft der werelt het leuen.

34

Hier om hebben sij tot hem gheseyt, Heere gheeft ons altijt dit broot.

35

Ende Iesus heeft tot hen gheseyt, Ic ben dbroot des leuens, soe wie tot my coemt, die en sal gheenen honger hebben, ende die in my ghelooft die en sal nemmermeer dorst hebben.

36

Maer ic hebt v geseyt dat ghi my ghesien hebt ende ghi en gelooft niet.

37

Alle dat my die vader gheeft, dat sal tot my comen, ende den ghenen die tot my coemt en sal ick niet wech worpen,

38

want ick ben vanden hemel neder gedaelt, niet om dat ic mijnen wille doen soude, maer den wille van hem die my ghesonden heeft.

[p. *820]

39

Want dit is den wille des vaders die my ghesonden heeft, dat ic niet verliesen en soude van alle dat hi my ghegheuen heeft, maer dat ic dat verwecken soude inden wtersten dach.

40

Ende dit is den wille mijns vaders die my ghesonden heeft, ⁺dat soe wie den sone siet, ende in hem ghelooft het eewich leuen hebbe, ende ic sal hem verwecken inden wtersten dach.

+ E

41

Hier om hebben die Ioden van hem ghemurmureert, om dat hi gheseyt hadde. Ic ben dbroot die van den hemel ghedaelt ben,

42

ende sij seyden, En is dese niet Iesus Iosephs sone? Wiens vader ende moeder wy kennen? Hoe seyt hy dan. Ic ben vanden hemel neder ghedaelt?

43

Hier om heeft Iesus gheantwoert, ende tot hen gheseyt, En wilt niet murmureren onder malcanderen.

+ 44

Niemant en mach tot my comen, ten sij dat die vader die my ghesonden heeft hem trecke, ende ic sal dien verwecken inden wtersten daghe.

45

Tes ghescreuen in die propheten. Ende sij sullen alle van Godt gheleert worden. Alle diet dan den vader ghehoort heeft ende gheleert, die coemt tot my.

46

Niet dat iemant den vader ghesien heeft, dan die ghene die van Gode is, dese heeft den vader ghesien.

47

Voerwaer voerwaer ic segghe v, wie in my ghelooft, die heeft dat eewich leuen.

48

Ic ben dbroot des leuens.

49

V vaderen hebben manna in die woestijne gheten, ende sij sijn ghestoruen.

50

Dit is dbroot vanden hemel nederdalende, op dat soe wie daer af etet, niet en sterue.

51

Ick ben dleuende broot, die vanden hemel comen ben.

52

Eest dat iemant van desen broode etet die sal inder eewicheyt leuen, ⁺ende tbroot dat ic sal gheuen, is mijn vleesch voer dleuen der werelt.

+ F

* 53

Hier om keuen die Ioden onder malcanderen segghende, Hoe mach dese ons sijn vleesch teten gheuen?

54

Daer om heeft hen Iesus gheseyt, Voerwaer voerwaer ic segghe v, ten sij dat ghi etet het vleesch vanden sone des menschen ende sijn bloet drinct, soe en suldi gheen leuen in v seluen hebben.

55

Soe wie mijn vleesch etet ende mijn bloet drinct, die heeft het eewich leuen, ende ic sal hem verwecken inden wtertsen dach.

* 56

Want mijn vleesch is warachtelijcke spijse, ende mijn bloet is warachtelijck dranck,

57

soe wie mijn vleesch etet, ende mijn bloet drinct, die blijft in my ende ic in hem.

58

Ghelijc my die leuende vader ghesonden heeft ende ic leue om den vader, ende die my etet die sal leuen om mijnen wille.

59

Dit is dbroot dat vanden hemel ghecomen is. Niet ghelijck v vaderen gheten hebben het manna, ende sijn ghestoruen. Soe wie dit broot etet die sal leuen inder eewicheyt.

* 60

Dit heeft hi gheseyt in die synagoge leerende in Capharnaum.

61

Hier om hebben veel van sijnen discipelen dit hoorende gheseyt, ⁺Dits een hart woert, ende wie mach dit hooren?

+ G

62

Maer Iesus wetende by sij seluen, dat sijn discipelen daer af murmureerden heeft tot hen gheseyt, Verarghert v dat?

63

Eest dan dat ghi den sone des menschen siet opclimmen daer hy te voren was?

64

Den gheest eest die leuende maect, het vleesch en baet niet met allen, die woerden die ic v ghesproken hebbe sijn gheest ende leuen.

65

Maer daer isser sommighe van v lieden die niet en gheloouen. Want Iesus wist van tbeghinsel wie dat niet gheloouich en waren, ende wie hem verraden soude.

66

Ende hy seyde, daer om heb ic v lieden gheseyt, dat niemant en mach tot my comen, ten sij dat hem ghegheuen ware van mijnen vader.

67

Van dier tijt sijnder veel van sijnen discipelen achterwaerts ghegaen, ende sij en wandelden nu voerts niet meer met hem.

68

Hier om heeft Iesus gheseyt tot die twaelue. Wildi ooc wech gaen?

69

Aldus heeft hem gheantwoert Simon Petrus. Heere tot wien sullen wy gaen? ghi hebt die woerden des eewichs leuens,

70

ende wy gheloouen, ende hebben ghekent dat ghi sijt Christus die sone Gods.

71

Iesus heeft hen gheantwoert. En heb ic v twaelue niet ghecosen, ende een van v lieden is een duyuel?

72

Ende hy seyde dat van Iudas Simons sone den Iscarioter, want dese was die ghene die hem verraden soude, daer hy was een vanden twaeluen.