Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

+ 1

⁺DAer nae waert eenen feestdach der Ioden, ende Iesus is opwaerts gegaen na Ierusalem.

+ A

2

Ende te Ierusalem aen die probatica is een piscine die welck toeghenaemt wort Bethsaida int hebreussche, hebbende vijf portalen.

3

In dese lach een groote menihte van siecken, blenden, crepelen, verdroochden, verwachtende des waters beroerte.

4

Want die enghel daelde neder nae eenen tijt in die piscine, ende dat water worde beroert, ende soe wie dierste nederghinck in die piscine nae die beroerte des waters, die worde ghesont, van wat siecten dat hi beuanghen was.

5

Ende daer was een mensch die achtendertich iaren in sijn siecte gheweest was.

6

Als Iesus desen heeft ghesien ligghende, ende verstaen hadde dat hy daer nu langhen tijt sieck gheweest was, soe seyt hy hem, Wildi ghesont worden?

7

Die siecke heeft hem gheantwoert. Heere ic en heb gheenen mensch, dat die (alst water gheroert wort) my draghe in die piscine, ⁺want als ick come, soe daelt daer een ander voer my in.

+ B

8

Iesus seyt hem, Staet op, neemt v bedde, ende wandelt.

9

Ende ter stont is die mensch ghesont gheworden, ende hy heeft sijn bedde opghenomen, ende wandelde. Ende het was sabboth op dien dach.

10

Hier om seyden de Ioden tot hem die ghenesen was. Het is sabboth, ten is v niet gheorlooft v bedde te draghen.

11

Hy antwoerde hen, Die my ghesont heeft ghemaect die heeft my gheseyt, Neemt op v bedde ende wandelt.

12

Hier om hebben sij hem ghevraecht. Wie is die mensch die v gheseyt heeft, Neemt op v bedde ende wandelt?

13

Maer die ghene die ghesont ghemaect was, en wist niet wie hy was. ⁺Want Iesus was besijden ghegaen vander scaren die op die plaetse was,

+ C

14

Daer na heeft Iesus hem gheuonden inden tempel, ende heeft hem gheseyt, Siet ghi sijt ghesont gemaect, en wilt nu voerts niet sondighen, op dat v niet argher en ghesciede.

15

Die mensch is wech ghegaen, ende heeft den Ioden ghebootscapt dat Iesus was die hem ghesont ghemaect heeft.

* 16

Daer om veruolchden die Ioden Iesum, om dat hy dese dinghen opden sabboth dede.

17

Maer Iesus heeft hen gheantwoert. + Mijn vader werct tot nu toe, ende ick wercke.

18

Daer om sochten die Ioden noch meer hem te dooden, want hy niet alleen den sabboth en brack, maer ooc Godt sijnen vader noemde, makende sij seluen Gode ghelijck.

19

Aldus heeft Iesus gheantwoert ende hen gheseyt, Voerwaer voerwaer ic segghe v, die sone en mach van hem seluen niet doen, dan dat hi den vader siet doen. Want wat die doet dat doet die sone oock ghelijckelijc.

20

Want die vader heeft den sone lief, ⁺ende hy toont hem al dat hi doet, ende hi sal hem noch meerder wercken dan dese toonen, dat ghi v verwonderen sult.

+ D

21

Want ghelijc die vader die dooden verwect ende leuende maect. Alsoe maect die sone ooc leuende die hy wilt.

22

Want die vader en ordeelt niemanden, maer alle doordeel heeft hi den sone ghegheuen,

23

op dat sy alle den sone eeren souden ghelijc sij den vader eeren. Die den sone niet en eert, die en eert den vader niet die hem ghesonden heeft.

24

Voerwaer voerwaer ic seg v, dat soe wie mijn woert hoort, ende ghelooft hem die my gesonden heeft, die heeft het eewich leuen, ende hi en coemt int ordeel niet, maer hi sal doergaen van die doot totten leuen.

25

Voerwaer voerwaer ic segghe v dat die vre coemt ende is nu, als die dooden sullen hooren die stemme vanden sone Gods, ende diese hooren die sullen leuen.

26

⁺Want ghelijck die vader dleuen heeft in sij seluen. Alsoe heeft hy den sone ghegheuen te hebben het leuen in sij seluen,

+ E

27

ende hy heeft hem die macht ghegheuen oock te ordeelen om dat hy des menschen sone is.

28

En wilt v hier af niet verwonderen. Want die vre coemt, in die welcke alle die in die grauen sijn sullen sijn stemme hooren,

29

ende sij sullen voerts comen die goet ghedaen hebben tot die verrijsenisse des leuens, maer die quaet ghedaen hebben, tot die verrijsenisse des ordeels.

[p. *819]

* 30

Ick en can van my seluen niet ghedoen. Alsoe ic hoore soe ordeele ic, ende mijn ordel is rechtuerdich, want ick en soecke mijnen wille niet, maer den wille van hem die my ghesonden heeft.

31

Eest dat ic ghetuyghenis gheue van mi seluen, so en is mijn ghetuyghenis niet warachtich.

32

Daer is een andere die getuygenis van my geeft, ende ic weet dat het ghetuyghenis warachtich is dat hy van my gheeft.

33

⁺Ghi hebt tot Iohannem ghesonden, ende hy heeft der waerheyt ghetuyghenis ghegheuen.

+ F

34

Maer ick en ontfanghe van den mensche gheen ghetuyghenisse, maer dit segghe ic op dat ghy soudt salich worden.

35

Hy was een licht berrende ende schijnende. Ende ghy hebt v willen een vre verhueghen in sijn licht.

36

Maer ic heb een ghetuyghenis dat meerder is dan Iohannes. Want die wercken welc die vader my ghegheuen heeft dat icse volbrenghen soude, die selue wercken die ic doe, die gheuen ghetuyghenis van my, dat die vader mij ghesonden heeft,

37

ende die vader die my ghesonden heeft, die heeft selue ghetuyghenis van my ghegheuen, ghy en hebt sijn stemme noyt ghehoort noch sijn ghedaente ghesien,

38

ende sijn woert en hebdi in v niet wonende. Want den ghenen die hi ghesonden heeft, dien en gheloofde ghy niet.

39

Ondersoect die schriftueren, ⁺want ghy meynt het eewich leuen daer in te hebben, ende die sijnt die ghetuyghenis van my gheuen,

+ G

40

ende ghi en wilt tot my niet comen dat ghy dleuen hebben mocht.

41

Ick en ontfanghe gheen glorie van die menschen.

42

Maer ick hebbe v ghekent, dat ghy Gods liefde in v niet en hebt.

43

Ic ben ghecomen in mijns vaders naem, ende ghi en ontfanct my niet, eest datter een ander coemt in sijns selfs naem dien suldi ontfanghen.

44

Hoe moechde ghi gheloouen die glorie van malcanderen ontfanct, ende die glorie die alleen van Godt is niet en soect?

45

En wilt niet meynen dat ick v besculdighen sal by den vader, daer is een die v besculdicht Moyses, inden welcken ghy hoept.

46

Want gheloofde ghy Moysi, soe soudi by auontueren my ooc gheloouen, want van my heeft hy ghescreuen.

47

Maer eest dat ghy sijnen scriftueren niet en ghelooft, hoe suldi mijnen woerden gheloouen?