Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iiij. Capittel.

1

⁺ALs nu Iesus gheweten heeft dat die Phariseen ghehoort hadden dat Iesus meer discipelen maect ende doopt dan Iohannes

+ A

2

(hoe wel dat Iesus selue niet en doopte, maer sijn discipelen)

3

soe heeft hi Iudeen ghelaten, ende is wederom ghegaen in Galileen.

+ 4

Maer hi moest gaen doer samarien.

5

Aldus is hy ghecomen in een stadt van Samarien die Sichar ghenoemt wert, by die erue die Iacob Ioseph sijnen sone ghegheuen heeft.

6

Ende daer was Iacobs fonteyne. Ende Iesus vermoeyt sijnde vanden wech sadt alsoe op die fonteyne. Het was omtrent der sester uren.

7

Daer is ghecomen een vrouwe van Samarien om water te putten. Iesus seyt haer, Gheeft my te drincken.

8

Want sijn discipelen waren wech ghegaen in die stadt, dat sij spijse coopen souden.

9

⁺Hier om heeft die Samaritaensche vrouwe hem gheseyt, Hoe comet aenghesien dat ghi een Iode sijt, dat ghi van my te drincken eyscht, die een Samaritaensche vrouwe ben? Want die Ioden en houden gheen ghemeynscap met die Samaritanen,

+ B

10

Iesus heeft gheantwoert ende haer gheseyt, Wiste ghy Gods gaue, ende wie hi is die v seyt, Gheeft my te drincken, ghy soudet bijauontueren van hem gheeysscht hebben, ende hy soude v leuende water ghegheuen hebben.

11

Die vrouwe seyt tot hem, Heere ghy en hebt niet daer ghy mede putten moecht, ende den put is diepe. Van waer hebdi dan leuende water?

12

Sijt ghy meerder dan onse vader Iacob die ons den put ghegheuen heeft, ende hy heefter wt ghedroncken, ende sijn kinderen, ende sijn beesten?

13

Iesus heeft gheantwoert ende haer gheseyt, Alle die van desen water drinct sal wederom dorst hebben, maer soe wie drincket van den water dat ic hem gheuen sal, die en sal inder eewicheit gheenen dorst hebben,

14

maer dwater dat ic hem gheuen sal, sal in hem worden een fonteyn van een springhende water in deewich leuen.

15

Die vrouwe seyt tot hem, Heere gheeft my dit water dat ic gheenen dorst en hebbe, ende dat ic herwaerts niet en come putten.

16

Iesus seyde haer, Gaet, roept uwen man, ende coemt hier.

17

⁺Die vrouwe heeft gheantwoert ende gheseyt, Ick en heb gheenen man, Iesus seyt tot haer, Ghi hebbet wel gheseyt, Ick en heb gheenen man,

+ C

18

Want ghi hebt vijf mans ghehadt, ende dien ghy nu hebt die en is v man niet, dat hebdi warachtelijc gheseyt,

19

Die vrouwe seyt tot hem, Heere ick sie dat ghi een propheet sijt.

20

Ons vaderen hebben op desen berch aenghebeden, ende ghy lieden segghet dat te Ierusalem die plaetse is, daermen aenbidden moet.

21

Iesus seyt haer, Vrouwe ghelooft my, die vre sal comen wanneer ghy lieden noch op desen berch, noch in Ierusalem den vader en sult aenbidden.

22

Ghy lieden aenbidt dat ghy niet en weet. Wy aenbidden dat wij weten, want die salicheyt is wten Ioden.

23

Maer die vre coemt ende is nu, wanneer die warachtighe aenbidders den vader sullen aenbidden inden gheest ende in die waerheyt. Want die vader begheert alsulcke die hem aenbidden.

24

Godt is eenen gheest, ende die gheene die hem aenbidden die moeten inden gheest, ⁺ende in die waerheyt aenbidden.

+ D

25

Die vrouwe seyt, Ick weet dat Messias coemt die ghenaemt wort Christus. Daer om als hy comen sal sijn, die salt ons al vercondighen.

26

Iesus seyde haer, Ick bent die met v spreke.

27

Ende ter stont sijn ghecomen zijn discipelen, ende sij verwonderden hen dat hy metter vrouwen sprack. Maer niemant en heeft gheseyt, Wat vraechdi oft wat spreecti met haer?

28

Aldus heeft die vrouwe haer cruycke ghelaten, ende sij is wech ghegaen in die stadt, ende sij seyt dien menschen.

29

Coemt ende siet eenen mensch, die my gheseyt heeft alle tghene dat ick ghedaen hebbe, soude hy Christus sijn?

30

Hier om sijn die wter stadt ghegaen, ende quamen tot hem.

31

Hier en tusschen soe baden hem sijn discipelen segghende, Rabbi eedt.

[p. *818]

32

Ende hy heeft hen gheseyt, Ick heb een spijse teten die ghi niet en weet.

33

Hier om seyden die discipelen tot malcanderen. Heeft hem iemant teten ghebrocht?

34

⁺Iesus seyt hen, Mijn spijse is dat ic doe den wille van hem die my gesonden heeft, op dat ic sijn werc voldoen mach.

+ E

35

En segt ghi lieden niet datter noch vier maenden sijn, ende dat dan den oochst coemt? Siet ick segghe v, Heft op v ooghen, ende besiet die landen want sij sijn nu wit ten oochste.

36

Ende die maeyt die ontfanct loon, ende hy vergadert die vrucht totten eewighen leuen, op dat die ghene die saeyt tsamen hem verblijden mach ende die daer maeyt.

37

Want hier in is het woert waerachtich, dat een ander is diet saeyt, ende een ander diet maeyt.

38

Ic hebt v ghesonden te maeyen dat ghi niet bearbeyt en hebt, andere hebbent gearbeyt, ende ghi sijt in hen arbeyden ghecomen.

39

Ende van dier stadt hebbender veel Samaritanen in hem ghelooft, ⁺om der vrouwen woert die tghetuyghenis gaf. Hy heuet my al gheseyt dat ic ghedaen hebbe.

+ F

40

Alsdan die Samaritanen tot hem ghecomen waren, soe hebben sij hem gebeden dat hi daer blijuen soude. Ende hi is daer ghebleuen twee daghen.

41

Ende veel meer hebbender ghelooft om sijn woerden,

42

ende sij seyden der vrouwen. Wi en gheloouen nu niet om v segghen. Want wy hebbent selue ghehoort, ende wy weten dat dit warachtelijck is die salichmaker der werelt.

* 43

Ende nae twee daghen is hy van daer wt ghegaen, ende wech ghereyst in Galileen.

44

Want Iesus heeft selue ghetuyghenis ghegheuen dat een propheet in sijn lant gheen eere en heeft.

45

Daer om doen hi in Galileen ghecomen was, soe hebben hem die galileussche ontfanghen. Als sijt al ghesien hadden dat hy te Ierusalem ghedaen hadde op den feestdach. Want sij waren ooc ghecomen totten feestdach.

46

Aldus is hy wederom gecomen in Cana van Galileen, daer hi van water wijn ghemaect heeft. + Ende daer was een coninxken wiens sone siec was te Capharnaum.

47

⁺Dese (doen hi ghehoort hadde dat Iesus aen quam van Iudeen in Galileen) is ghegaen tot hem, ende hi badt hem dat hi nederwaerts quame ende sijnen sone ghesont maken wilde. Want hi begonste te steruen.

+ G

48

Hier om heeft Iesus tot hem gheseyt, Ten sij dat ghi teekenen ende wonderwercken siet, soe en gheloofdi niet.

49

Dat coninxken seyt tot hem. Heere coemt nederwaerts eer dat mijn sone sterue.

50

Iesus seyt hem, Gaet henen, v sone leeft. Die mensch heeft dat woert ghelooft dwelc hem Iesus gheseyt hadde, ende hi ghinc.

51

Ende als hi nu afcomende was, soe sijn hem sijn knechten te ghemoete ghecomen ende boodtscapten hem segghende, dat sijn sone leefde.

52

Hier om heeft hi van hen ghevraecht die vre in die welcke hi beter te passe worde. Ende sij hebben hem gheseyt, Dat hem die febres ghisteren ter seuenster vren ghelaten heeft.

53

Aldus heeft die vader ghekent dattet die vre was in die welcke hem Iesus seyde, V sone leeft, ende hi heeft gelooft, ende sijn gheheel huys.

* 54

Dat tweede teeken heeft Iesus wederom ghedaen doen hy ghecomen was van Iudeen in Galileen.