Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat.iij.Capittel.

+ 1

⁺DAer was een mensche vanden Phariseen Nicodemus ghenaemt, een prince der Ioden.

+ A

2

Dese is tot Iesum des nachts ghecomen, ende heeft hem gheseyt, Rabbi, wy weeten dat ghi van Godt ghecomen sijt een meester. Want niemant en mach dese teekeenen doen die ghi doet, ten sij dat Godt met hem sij,

3

Iesus heeft gheantwoert, ende tot hem gheseyt, Voerwaer voerwaer ick segghe v, ten sij dat iemant weder om gheboren worden, soe en mach hy het rijck Godts niet sien.

4

Nicodemus seyt tot hem, Hoe mach een mensch gheboren worden als hy oudt is? mach hy wederom in sijns moeders lichaem gaen, ende gheboren worden?

5

Iesus heeft gheantwoert. Voerwaer voerwaer ick segghe v, ten sij dat iemant wederom gheboren worde wten water ende den gheest, soe en mach hy niet comen int rijck Gods.

6

Dat wten vleesch gheboren is, dat is vleesch, ende dat wten gheest gheboren is, ⁺dats gheest.

+ B

7

En verwondert v niet om dat ick v gheseyt hebbe. Ghy moet weder om gheboren worden.

8

Die gheest blaest daer hy wilt, ende ghy hoort sijn stemme, maer ghi en weet niet van waer hy coemt, ende waer henen dat hi gaet, alsoe is een ieghelijck die gheboren is wt den gheest.

9

Nicodemus heeft gheantwoert ende hem gheseyt, Hoe moghen dese dinghen ghescieden?

10

Iesus heeft gheantwoert, ende tot hem gheseyt, Sijdi een meester in Israel ende en weeti dese dinghen niet?

11

Voerwaer voerwaer ick seg v, Dat wy weeten dat spreken wy, ende dat wy ghesien hebben dat ghetuyghen wy, ende ghi en ontfangt ons ghetuyghenis niet.

12

Eest dat ic v eertsche dinghen gheseyt hebbe, ende ghi en gheloouet niet, hoe suldi gheloouen eest dat ic v hemelsche dinghen segghe?

13

Ende niemant en climt inden hemel, dan die

[p. *817]

van den hemel nederghedaelt is, die sone des menschen die inden hemel is,

14

ende ghelijck Moyses tserpent verheuen heeft in die woestijne, alsoe moet die sone des menschen verheuen worden,

15

op dat alle die in hem ghelooft niet verloren en gae, maer hebbe dat eewich leuen.

* + 16

Want alsoe lief heeft Godt die werelt ghehadt dat hy sijnen eenighen sone ghegheuen heeft op dat alle die in hem ghelooft niet en vergae, maer hebbe dat eewich leuen.

17

⁺Want Godt en heeft sijnen sone in die werelt niet ghesonden, dat hy die werelt ordeelen soude, maer om dat die werelt doer hem behouden soude worden.

+ C

18

Soe wie in hem ghelooft die en wort niet gheordeelt, maer die niet en gelooft, die is nu gheoordeelt, om dat hy niet ghelooft en heeft inden naem van den eenighen gheboren sone Gods.

19

Ende dit is dat ordeel, want het licht is in die werelt ghecomen, ende die menschen hebben die duysternissen lieuer ghehadt, dan dlicht. Want hen wercken waren quaet.

20

Want alle die qualijck doet die haetet dlicht, ende hy en coemt totten lichte niet, op dat sijn wercken niet ghestraft en souden worden,

21

maer die de waerheyt doet, die coemt tot dat licht, op dat sijn wercken vertoont moghen worden dat sij in Gode ghedaen sijn.

* 22

Daer na is Iesus ghecomen ende sijn discipelen int lant van Iudeen ende daer woonde hy met hen lieden, ende hy doopte.

23

Ende Iohannes was oock doopende in Enon by Salim want daer was veel waters, ende sij quamen ende worden ghedoopt.

24

Want Iohannes en was noch inden kerker niet gheworpen.

25

+ Ende daer is een vraghe opgheresen van Iohannes discipelen metten Ioden van die suyueringhe.

26

Ende sij sijn tot Iohannes ghecomen ende hebben hem gheseyt, Rabbi die ghene die met v was ouer die Iordane, den welcken ghy ghetuyghenis hebt ghegheuen, siet dese doopt, ende sij comen alle tot hem.

27

Iohannes heeft gheantwoert ende gheseyt, ⁺Een mensch en mach niet ontfanghen ten sij dat hem ghegheuen worde vanden hemel.

+ D

28

Ghiselue gheeft my ghetuyghenis dat ic gheseyt hebbe. Ick en ben Christus niet, maer dat ic ghesonden ben voer hem.

29

Die die bruyt heeft, dats die brudegom, maer des brudegoms vrient die staet ende hem hoort, die verblijt hem met blijscap om des brudegoms stemme. Aldus is dese mijn blijscap veruult.

30

Het is van noode dat hi wasse, ende dat ick vermindert worde.

31

Die van bouen ghecomen is, die is bouen al. Die vander eerden is, die is van eerden, ende hy spreect vander eerden, die vanden hemel coemt die is bouen al.

32

Ende dat hy ghesien heeft ende ghehoort dat ghetuycht hy, ende sijn ghetuyghenis en ontfanct niemant.

33

Die sijn ghetuyghenis ontfanghen heeft, die heuet gheseghelt dat Godt warachtich is.

34

Want die ghene den welcken Godt ghesonden heeft, die spreect Gods woerden, want Godt en gheeft den gheest niet by maten.

35

Die vader bemint den sone, ende hy heeft alle dinghen in sijn hant ghegheuen.

36

Die inden sone ghelooft, heeft dat eewich leuen, maer wie den sone niet en ghelooft, die en salt dleuen niet sien. Maer den toren Gods blijft op hem.