Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

+ 1

⁺ENde opden derden dach wert een bruloft ghehouden tot Cana in Galileen ende Iesus moeder was daer.

+ A

2

Ende Iesus is daer oock gheroepen ende sijn discipelen ter bruloft.

3

Ende doen daer wijn ghebrack, soe heeft Iesus moeder tot hem gheseyt, Sij en hebben gheenen wijn.

4

Ende Iesus seyt tot haer. Wat leyt my aen v? mijn vre en is noch niet comen.

5

Sijn moeder seyt den dienaren. Al wat hi v seyt dat doet.

6

Ende daer waren ses steenen cruycken ghestelt, nae die suyueringhe der Ioden, houdende elck twee oft drij metreten

7

Iesus seyt tot henlieden, Vult die cruycken met water. Ende sij hebbense gheuult tot bouen toe.

8

Ende Iesus heeft tot hen gheseyt, Scenct nu ende draghet den hoofmeester. Ende sij hebbent ghedraghen.

9

Als nu die hoofmeester gheproeft hadde dat het water wijn gheworden was, ende niet en wiste van waer dat was, maer die dienaers wistent wel die dwater gheput hadden, ⁺soe roept die hoofmeester den brudegom,

+ B

10

ende seyt tot hem, Alle mensch stelt ierstmael goeden wijn, ende als sij droncken sijn, dan stelt hi dat argher is. Maer ghi hebt den goeden wijn ghehouden tot nu toe.

11

Dit beghinsel der teekenen heeft Iesus ghedaen in Cana van Galileen ende heeft gheopenbaert sijn glorie ende sijn discipelen hebben in hem ghelooft.

* 12

Daer nae is hy nederwaerts ghegaen nae Capharnaum hy ende sijn moeder, ende sijn broeders, ende sijn discipelen, ende daer sijn sij ghebleuen niet veel daghen.

+ 13

Ende der Ioden paeschen was nae bi. Ende Iesus is opghegaen in Ierusalem,

14

ende hi heefter inden tempel gheuonden vercoopende ossen, ende scapen, ende duyuen, ⁺ende wisselaers sittende.

+ C

15

Ende als hi ghemaect hadde als een gheessele van coordekens, soe heeft hi die alle wten tempel ghedreuen, oock mede die scapen ende ossen, ende der wisselaers ghelt heeft hy wtghestort, ende die tafelen omgheworpen.

16

Ende den ghenen die de duyuen vercochten heeft hy gheseyt, Neemt dese dinghen van hier, ende en wilt mijns vaders huys niet maken een huys der comenscappen.

17

Ende sijn discipelen werden ghedachtich des gheens datter ghescreuen is. Die gramme liefde ws huys heeft my gheten,

18

daerom hebben die Ioden gheantwoert ende hem gheseyt, Wat teeken toondi ons, dat ghy dese dinghen doet?

19

Iesus heeft gheantwoert ende hen gheseyt. Ontbint desen tempel, ⁺ende binnen drij daghen sal ic dien oprichten.

+ D

20

Hier om hebben die Ioden gheseyt, Sessenveertich iaren, is desen tempel ghetimmert, en suldi ghi dien binnen drij daghen op richten?

21

Maer hy sprack vanden tempel sijns lichaems.

22

Daer om als hy dan vanden dooden weder opghestaen was, soe sijn zijn discipelen ghedachtich gheworden, dat hi dit sprack ende sij hebben der scriftueren ghelooft ende den woerden die Iesus ghesproken hadde.

23

Ende als hy te Ierusalem was opden paeschen opden feestdach, soe hebbender vele in sijnen naem ghelooft, siende zijn teekenen die hy dede.

24

Maer hi Iesus en betroude sij seluen henlieden niet, om dat hijse alle kende,

25

ende want hem van gheenen noode en was, dat iemant ghetuyghenis soude gheuen vanden mensch, want hi wiste wat in den mensche was.