Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

+ 1

⁺IN den beghinne was dwoert, ende dwoert was by Gode, ende Godt was dat woert,

+ A

2

Dit was inden beghinne by Gode.

3

Alle dinghen sijn doer dat ghemaect, ende sonder dat en is niet ghemaect, datter ghemaect is.

4

In dat was dleuen, ende dleuen was dlicht der menschen,

5

ende dlicht schijnt in die duysternissen, ende die duysternissen en hebben dat niet begrepen.

6

Daer heeft gheweest een mensch ghesonden van Godt, wienst naem was Iohannes.

7

Dese is ghecomen tot een ghetuyghenis, om dat hy ghetuyghenis soude gheuen van dlicht. Dat sij alle doer hem gheloouen souden.

8

Hy en was dlicht niet, maer om dat hy ghetuyghenis soude gheuen vanden lichte.

9

Het was een warachtich licht, dwelck verlicht alle menschen comende in dese werelt.

10

Het was in die werelt, ende die werelt is daer doer ghemaect, ende die werelt en heuet niet ghekent.

11

In sijn eyghen is hy ghecomen, ⁺ende die sijne en hebben hem niet ontfanghen,

+ B

12

maer alle die hem ontfanghen hebben, dien heeft hy macht ghegheuen Gods kinderen te worden, den ghenen die in sijnen naem gheloouen.

13

Die welcke niet wten bloede, noch wt den wille des vleeschs, noch wt den wille eens mans, maer wt Godt gheboren sijn.

14

Ende dwoert is vleesch gheworden, ende het heeft onder ons ghewoont, (ende wy hebben sijn glorie ghesien, een glorie als vanden eenighen gheboren sone vanden vader) Vol gratien ende waerheyts.

* 15

+ Iohannes gheeft ghetuyghenis van hem, ende hy roept segghende, Dit was hy vanden welcken ick gheseyt hebbe. Die nae my comen sal, is voer my gheworden, want hy was eer dan ick.

16

Ende van sijnder volheyt hebben wy allegader ontfanghen ende gracie om gratie.

17

Want die wet is doer Moysen ghegheuen, die gratie ende die waerheyt is doer Iesum Christum ghesciet.

18

⁺Niemant en heeft oyt Godt ghesien, die eenighe gheboren sonedie inden schoodt des vaders is die heuet vertelt.

+ C

* + 19

Ende dit is Iohannes ghetuyghenis, als die Ioden van Ierusalem ghesonden hebben priesters ende Leuiten tot hem, dat sij hem vraghen souden. Wie sijt ghy?

20

Ende hy heuet beleden en hy en heues niet gheloochent, ende hy heuet beleden. Ick en ben Christus niet.

21

Ende sij hebben hem ghevraecht. Wat dan? Sydi Elias? Ende hy heeft gheseyt, Ick en bens niet. Sijdi een propheet? ende hy heeft gheantwoert, Neen ic.

22

Hier om hebben sij hem gheseyt, Wie sijdi, dat wy moghen antwoerde gheuen den ghenen die ons ghesonden hebben? Wat segdi van v seluen?

23

Hy heeft gheseyt, Ick ben die stemme des roepende in die woestijne, maect recht den wech des Heeren, ghelijck gheseyt heeft Isaias die propheet.

24

Ende die ghesonden waren dat waren van den Phariseen,

25

ende sij hebben hem ghevraecht, ende tot hem gheseyt, ⁺Waer om doopti dan, eest dat ghy Christus niet en sijt, noch Elias, noch propheet?

+ D

26

Iohannes heeft hen gheantwoert, segghende, Ick doope int water, maer hy heeft int midden van v ghestaen dien ghy niet en kent.

27

Hy eest die nae my comen sal, die voer my ghestelt is. Van wiens scoenen ick niet weerdich en ben den bandt te ontbinden.

* 28

Dese dinghen sijn in Bethanien ghesciet ouer die Iordane daer Iohannes doopende was.

+ 29

Des anderen daechs heeft Iohannes Iesum ghesien tot hem comende ende hy heeft gheseyt, Siet daer dlam Gods, siet daer den ghenen die af neemt die sonde der werelt.

30

Dit es hy daer ick af gheseyt hebbe. Nae my coemt een man, die voer my gheweest is. Want hy was eer dan ick,

31

ende ic en kende hem niet, maer om dat hy gheopenbaert soude worden in Israel, daer om ben ick ghecomen doopende int water.

32

Ende Iohannes heeft ghetuyghenis ghegheuen segghende, ⁺Ick heb ghesien den gheest nederdalende vanden hemel ghelijck een duyue, ende bleef op hem.

+ E

33

Ende ick en kende hem niet, maer die my ghesonden heeft om te doopen int water, die heeft my gheseyt. Opden welcken ghy sult sien den gheest nederdalende ende blijuende op hem, dese eest die doopt in den heyleghen gheest.

34

Ende ick hebt ghesien ende tghetuyghenis ghegheuen dat dese is die sone Gods.

* 35

Des anderen daechs stont Iohannes wederom, ende twee van sijnen discipelen.

36

Ende siende Iesum wandelende seydt hy, Siet daer het lam Gods.

37

Ende die twee discipelen hebben hem hooren spreken, ende sij sijn Iesum ghevolcht.

38

Ende Iesus omghekeert sijnde, ende siende dese hem volghende seyde tot hem, Wat begheerdi? Die welcke hebben tot hem gheseyt, Rabbi (dwelck is te segghen) Meester. Waer woondi?

39

Hy heeft

[p. *816]

hen gheseyt, Coemt ende besieghet. Sij sijn ghecomen ende hebbent besien waer hy woonde, ende sij sijn by hem ghebleuen dien dach, ende het was ontrent die thienste vre.

40

Ende Andreas Simon Petrus broeder was een vanden tween, diet ghehoort hadden van Iohannes, ende hem ghevolcht waren.

41

Dese vint ten iersten sijnen broeder Simon, ende seyt tot hem, Wy hebben Messiam gheuonden, dwelck is te segghen, Christum.

42

Ende hy heeft hem gheleyt tot Iesum. Ende Iesus hem aensiende heeft gheseyt, Ghy sijt Simon die sone van Iona, ghi sult ghenoemt worden Cephas dwelck is te segghen Petrus.

43

Des anderen daechs heeft hy willen wt gaen in Galileen, ende hi vint Philippum. Ende Iesus heeft hem gheseyt, Volcht my.

44

Ende Philippus was van Beth saida die stadt van Andreas ende Petrus.

45

Ende Philippus vint Nathanael ende seyt tot hem, Den ghenen die Moyses in die wet bescreuen heeft ende die propheten, dien hebben wy gheuonden Iesum van Nazaretht Iosephs sone.

46

⁺Ende Nathanael heeft hem gheseyt, Mach van Nazareth iet goets wesen? Philippus seyt hem, Coemt ende besieghet.

+ G

47

Iesus heeft ghesien Nathanael tot hem comende, ende seyt van hem. Siet daer een warachtich Israelijt, in den welcken gheen bedroch en is.

48

Nathanael seyt tot hem, Waer af kendi my? Iesus heeft gheantwoert, ende tot hem gheseyt, Eer v Philippus riep, doen ghy onder den vijgheboom waert, heb ick v ghesien.

49

Nathanael heeft hem gheantwoert ende gheseyt, Rabbi ghi sijt die sone Gods, ghi sijt die coninck van Israel,

50

Iesus heeft gheantwoert, ende tot hem gheseyt. Om dat ic v gheseyt hebbe. Ick heb v onder den vijgheboom ghesien, soe gheloofdi, ghi sult meerder dinck sien dan dese.

51

Ende hi seyt hem, Voerwaer voerwaer ick segghe v lieden, ghi sult den hemel open sien, ende die enghelen Gods opclimmende, ende nederdalende opden sone des menschen.