Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde alle hen menichte opstaende hebben hem gheleydt tot Pilatum.

+ A

2

Ende sij hebben hem begonnen te besculdighen segghende, Desen hebben wy gheuonden verkeerende ons volck, ende verbiedende den keyser tribuyt te gheuen, ende segghende hem seluen Christum den coninck te sijne.

3

Maer Pilatus heeft hem gheuraecht segghende, Sijt ghi die coninck der Ioden? Ende hy antwoerdende seyde, Ghy segghet.

4

Ende Pilatus heeft gheseyt tot die princen der priesteren, ende die scaren, Ick en vinde gheen sake in desen mensch.

5

Maer sij worden gheweldigher, segghende, Hy beroert het volck, leerende ouer gheheel Iudeen, beghinnende van Galileen tot hier toe.

6

Ende Pilatus hoorende Galileen, heeft gheuraecht oft hy een mensch van Galileen was.

7

Ende als hy verstaen heeft dat hy van Herodes macht was, soe heeft hy hem wederom ghesonden aen Herodem, die selue oock te Ierusalem was in dien daghen.

8

Ende Herodes Iesum ghesien hebbende is seer verblijdt gheweest, want hy was van langhe tijt gheweest begheerende hem te siene, ⁺om dat hi veel hoorde van hem, ende hy hoopte dat hy eenich teeken soude sien van hem ghescieden.

+ B

9

Ende hi vraechde hem met veel redenen. Ende hy en antwoerde hem niet.

10

Maer die princen der priesteren ende Scriben stonden sterckelijck hem besculdighende.

11

Maer Herodes heeft hem versmaet met sijnen heyre, ende hy heeft hem bespot ghecleedt wesende met een wit cleedt, ende hy heeft hem wederom ghesonden tot Pilatum,

12

ende Herodes ende Pilatus sijn vrienden gheworden op den seluen dach, want te voren waren sij vianden deen teghen den anderen.

13

Ende Pilatus tsamen gheroepen hebbende die princen der priesteren ende die ouerste, ende dat volck,

14

heeft tot hen gheseyt, Ghy hebt my desen man aenghebracht, als het volck afkeerende, ende siet ick voer v lieden hem ondervraghende en heb gheen sake gheuonden in desen mensch, van die dinghen daer ghy hem af besculdicht,

15

Noch Herodes oock, Want ick heb v weder om ghesonden tot hem, ende siet hem en is niet ghedaen datter doot weert is.

16

Aldus sal ick hem ghecastijt, laten gaen.

17

Ende hy moest hen binnen den feestdach eenen vrij laten gaen.

18

⁺Ende die gheheel scare heeft tsamen luyde gheroepen segghende, Neemt desen wech, ende laet ons Barabbam vrij gaen,

+ C

19

die welcke was om eenen oploop in die stadt ghedaen, ende om eenen dootslach, inden kerker ghesteken.

20

Maer Pilatus heeft weder om tot hen ghesproken, willende Iesum vrij laten gaen.

21

Maer sij riepen deen nae dandere segghende, Cruyst, Cruyst hem.

22

Maer hy heeft ten derdenmale tot hen gheseyt, Maer wat quaet heeft dese ghedaen? Ick en vinde gheen sake des doots in hem, aldus sal ic hem castijden ende laten vrij gaen.

23

Maer sij dronghen toe met grooten stemmen eysschende datmen cruycen soude, ende hen stemmen worden gheweldich.

24

Ende Pilatus heuet aenghewesen datmen doen soude haren eysch.

25

⁺Ende hy heeft hen dien laten vrij gaen die om eenen dootslach ende om den oploop inden kerker gheworpen was, den welcken sij begheerden. Maer Iesum heeft hy haren wille ouergheleuert.

+ D

26

Ende doen sij hem leydden, soe hebben sij aenveert eenen Simon van Cyrenen comende van eenen lanthuyse, ende sij hebben hem tcruys opgheleydt om dat te draghen achter Iesum.

27

Ende hem volchde een groote scare volcs, ende vrouwen, die welcke hem beclaechden, ende bescreyden.

28

Ende Iesus tot haer omghekeert sijnde heeft gheseyt, Ghy dochteren van Ierusalem en wilt niet weenen op my, maer weent op v seluen ende op v kinderen.

29

Want siet daer sullen daghen comen in die welcke men segghen sal, Salich sijn die onvruchtbarighe ende die lichamen die niet ghebaert en hebben, ende die borsten die niet ghesoocht en hebben.

30

Dan sullen sij beghinnen te segghen den berghen, Valt op ons, ende den hueuelen, Bedect ons.

31

Want eest dat sij dit doen in een groen hout, ⁺wat sal in dat drooghe ghescieden?

+ E

32

Ende daer worden gheleyt noch twee ander misdadighe met hem, dat sij souden ghedoot worden.

33

Ende nae dat sij ghecomen waren ter plaetsen die ghenoemt wort Caluarien, daer hebben sij hem ghecruyst, ende die mordenaers, den eenen ter rechter handt, ende den anderen ter slincker hant.

34

Maer Iesus seyde, Vader vergheuet hen, want sij en weeten niet wat sij doen. Maer sij deylende sijn cleederen hebben loten gheworpen.

35

Ende het volck stont verwachtende, ende die princen bespotten hem met hen segghende, Andere heeft hy ghesont ghemaect, help sij seluen, eest dat hy es Christus die wtuercoren Gods.

36

Ende die ruyters bespotten hem oock aencomende, ende hem edick biedende,

37

ende segghende, Eest dat ghy die coninck der Ioden sijt, soe verlost v seluen.

38

Ende daer was een opscrift op hem ghescreuen met Griecsche, Latijnsche, ende Hebreussche letteren. Dit is die Coninck der Ioden.

39

⁺Ende een van dien mordenaren die daer hinghen blasphemeerden hem oock segghende, Eest dat ghy Christus sijt, soe helpt v seluen, ende ons.

+ F

40

Ende die andere antwoerdende strafte hem segghende, Ghy en vreest ooc Godt niet daer ghy in die selue verdoemenisse sijt.

41

Ende wy lijden dit voerwaer rechtuerdelijck, want wy ontfanghen rechten loon nae onse werken, maer dese en heeft niet quaets ghedaen.

42

Ende hy seyde tot Iesum Heere weest mijns ghedachtich als ghy sult comen in v rijck.

43

Ende Iesus heeft hem gheseyt, Voerwaer ick segghe v, Heden suldi met my sijn int paradijs.

44

Ende het was by nae die seste vre, ende daer sijn duysternissen gheworpen ouer alle die eerde, tot die neghenste vre.

45

Ende die sonne is verduystert, ende dat voerhancsel des tempels is ouermidts ghescoert.

46

Ende Iesus met luyder stemmen roepende heeft gheseyt, Vader in uwen handen beuele ick mijnen gheest. Ende dit segghende, heeft hy sijnen gheest ghegheuen.

47

Ende die hondertste man siende datter ghesciet was, heeft Godt gheglorificeert, segghende. ⁺Voerwaer dese mensch was rechtuerdich.

+ G

48

Ende alle die scare der gheender die tsamen daer teghenwoerdich waren tot dit besiensel, ende saghen die dinghen die daer ghescieden, keerden wederom slaende hen borsten.

49

Ende alle die hem kenden stonden van verre, ende die vrouwen die hem gheuolcht waren van Galileen, dese dinghen siende.

50

Ende siet een man ghenaemt Ioseph, die een thienste man was, een goet ende

[p. *814]

rechtuerdich man,

51

dese en hadde niet gheconsenteert in haren raet ende daden, van Arimatheen een Ioetsche stadt die welcke oock selue verwachte het rijck Gods.

52

Dese is tot Pilatus ghecomen, ende hy heeft Iesus lichaem begheert,

53

ende dat afghedaen hebbende, heeft hy dat in een fijn lijnen cleedt ghewonden, ende hy heeft hem gheleyt in een wtghehouwen graf, daer noch niemant in gheleyt en was.

54

Ende het was des bereytsels dach, ende den sabboth dach quam des morghens aen.

55

Ende die vrouwen die naeghevolcht waren, ende met hem comen waren van Galileen, hebben ghesien het graf, ende hoe sijn lichaem gheleydt was.

56

Ende wederom keerende hebben sij bereydt costelijcke specerien, ende saluen, ende opden sabboth dach hebben sij stil gheweest nae tghebodt.