Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

+ 1

⁺ENde het hoochtijt vanden ongheheefden brooden naecte, dwelck Paesschen ghenoemt wort,

+ A

2

ende die princen der priesteren ende Scriben sochten hoe dat sij hem dooden souden, maer sij ontsaghen het volck.

3

Ende satanas is ghegaen in Iudam die ghenoemt was die Iscarioter een vanden twaeluen,

4

ende hy is wech ghegaen ende heeft ghesproken met die princen der priesteren ende wethouders, hoe dat hy hem haerlieden leueren soude.

5

Ende sij sijn blijde gheweest, ende sij hebben hem gheloeft ghelt te gheuen.

6

Ende hy heuet beloeft. Ende hy socht bequamen tijt dat hi hem leueren mocht sonder turbacien.

7

Ende den dach der ongheheefder brooden es ghecomen op den welcken men moest het Paeschlam dooden.

8

Ende hy heeft Petrum ende Iohannem ghesonden segghende, Gaet henen bereyt ons tpaeschlam, dat wijt eten moghen.

9

⁺Maer sij hebben gheseyt. Waer wildi dat wijt bereyden?

+ B

10

Ende hy heeft tot hen gheseyt, siet als ghy comen sult in die stadt, soe sal v ontmoeten een mensch een cruycke waters draghende volcht hem int huys daer hy ingaet,

11

ende ghy sult den vader des huysghesins van dien huyse segghen. Die meester seyt tot v. Waer is die eetplaetse, daer ick tpaeschlam met mijnen discipelen eten mach?

12

ende hy sal v toonen een grooter bereydde eetcamer, ende aldaer bereyt voer ons?

13

Ende sij gaende hebbent ghevonden alsoe hy hen gheseyt hadde, ende sij hebben tpaeschlam bereyt.

14

Ende

[p. *812]

als die vre comen was, soe is hy ter tafelen gheseten, ende die twaelf apostelen met hem.

15

Ende hy seyde tot hen, Met begheerten heb ick begheert dit paeschlam met v te eten eer dat ick lijde.

16

Want ick segghe v, dat ick van nu voerts dat niet meer eten en sal, tot dat volbracht worde int rijck Godts.

17

Ende als hy den kelck ghenomen hadde, soe heeft hy ghedanct ende gheseyt, Neemt ende deylet onder v lieden.

18

Want ic segghe v, dat ick niet drincken en sal van dat ghewas des wijngaerts tot dat het rijck Gods comen sal.

19

Ende als hy dbroot ghenomen hadde, soe heeft hy ghedanct, ende heuet ghebroken, ende hen ghegheuen segghende, Dits mijn lichaem dat voer v lieden ghegheuen wort, dat doet in mijnder ghedenckenisse.

20

Desghelijcs oock den kelck nae dat hij het auontmael gheten hadde segghende, ⁺Dit is den kelck het het nieuwe testament in mijn bloet dwelck voer v lieden sal ghestort worden.

+ C

21

Maer nochtans siet die hant des gheens die mij verradet, is met my op die tafele.

22

Ende voerwaer die sone des menschen gaet nae datter van hem ghesloten is, maer nochtans wee dien mensche doer den welcken hy gheleuert sal worden.

23

Ende sij begonsten onder malcanderen te vraghen wie dat dit ware van henlieden die dit doen soude.

24

Ende daer is oock eenen twist onder henlieden opghestaen, wie datter van hen lieden scheen die meeste te wesen.

25

Ende hy heeft tot hen gheseyt, Die coninghen der heydenen hebben heerscappie ouer henlieden, ende die macht ouer hen hebben, die worden goetdadighe ghenoemt.

26

Maer ghi alsoe niet, maer die de meeste is onder v lieden, die worde alsdie ioncste, ende die de ouerste is, als een dienaer.

27

Want wie is meerder die ter tafelen sidt, oft die dient? en eest niet die ter tafelen sidt? Maer ick ben int midden van v lieden, als een die dient

28

ende ghy sijt die ghene die met my altijts ghebleuen sijt in mijn becoringhen.

29

Ende ick bescicke v lieden, ghelijck my mijn vader bescict heeft, het rijck,

30

dat ghy eten ende drincken soudt op mijn tafele, in mijn rijck, ende dat ghy sitten soudt op die throonen ordeelende die twaelf gheslachten van Israel. Ende die Heere heeft gheseyt,

31

Simon Simon, siet Satanas heeft v lieden begheert dat hy v siften soude als tarwe,

32

maer ick heb voor v ghebeden, dat v ghelooue niet vergaen en soude, ende als ghy eenich tijt bekeert sijt, soe versterct v broeders.

33

Die welcke heeft hem gheseyt. Heere ick ben met v bereedt ooc inden kerker, ende in die doot te gaene.

34

⁺Ende hy heeft gheseyt, Ick segghe v Peeter, den haen en sal heden niet singhen tot dat ghy drijmael sult verloochenen dat ghi my kent.

+ D

35

Ende hy heeft hen gheseyt, Als ick v ghesonden hebbe sonder borse, ende male, ende schoenen, heeft v oyt iet ghebroken? Ende sy hebben gheseyt, Niet,

36

Aldus heeft hy hen gheseyt, Maer nu soe wie een borse heeft die neme die, ende desghelijcs oock een male, ende diese niet en heeft die vercoop sijnen rock, ende coope een sweert.

37

Want ick segghe v datter noch in my moet volbrocht worden tghene dat ghescreuen is. Ende hi is metten boosen gherekent gheweest. Want voerwaer die dinghen die van my sijn die hebben een eynde.

38

Ende sij hebben gheseyt, Heere siet hier sijn twee sweerden. Ende hi heeft hen gheseyt, Tes ghenoech.

39

Ende wt ghegaen sijnde ginck hy nae die ghewoonte opden berch van Oliueten, ende sijn discipelen sijn hem ooc gheuolcht.

40

Ende als hy ter plaetsen comen was, soe heeft hy hen gheseyt, Bidt dat ghy niet en valt in becoringhe.

41

Ende hy werde van daer ghetrocken van hen lieden, soe verre als den worp is van eenen steen, ende als hy sijn knyen gheboocht hadde,

42

⁺soe badt hy segghende, Vader, eest dat ghy wilt, neemt desen kelck wech van my. Maer nochtans niet mijnen wille, maer den uwen ghesciede.

+ E

43

Ende hem heeft gheopenbaert eenen engbel vanden hemel hem versterckende.

44

Ende ghestelt sijnde inden strijdt des doots heeft hy noch langher ghebeden. Ende sijn sweet is gheworden als druppelen bloets loopende op die eerde.

45

Ende als hy opghestaen was van sijnen ghebede, ende comen was tot sijnen discipelen, soe heeft hy die gheuonden slapende van droefheden.

46

Ende hy heeft hen gheseyt, Waer om slaepti? Staet op bidt dat ghy niet en valt in becoringhe.

47

Ende als hy noch sprack, siet soe quam daer een scare, ende die Iudas ghenaemt was, een vanden twaeluen ghinck voer hen, ende hy is by Iesu ghecomen dat hy hem cussen soude.

48

Maer Iesus seyde tot hem Iuda, Verraet ghi met een cussen den sone des menschen?

49

Ende die omtrent hem waren siende datter toecomende was, hebben tot hem gheseyt, Heere sullen wy slaen metten swaerde?

50

Ende een van dien heeft gheslaghen den dienaer vanden prince der priesteren, ende hy heeft sijn rechte oore afghehouwen.

51

⁺Ende Iesus antwoerdende heeft gheseyt, Ghehenghet, tot hier toe. Ende als hy sijn oore gheraect hadde, soe heeft hy hem ghenesen.

+ F

52

Ende Iesus heeft gheseyt tot die ghene die tot hem comen waren, die princen der priesteren, ende die ouerste des tempels, ende die ouders. Sijdi als tot eenen mordenaer wt ghegaen met sweerden ende stocken?

53

Als ick daghelijcs met v lieden gheweest hebbe inden tempel, soe en hebdi die handen aen my niet wtghesteken, maer dit is v vre, ende die macht der duysternissen,

54

Ende sij hem vanghende hebben hem gheleydt totten huyse van den prince der priesteren. Maer Petrus volchde van verre.

55

Ende alser een vier ontsteken was int midden vanden voerhoue, ende sij daer omme saten, soe was Petrus int midden van hen.

56

Den welcken als een dienstvrouwe ghesien hadde sittende aent licht, ende hem aensien hadde, soe heeft sij gheseyt. Dese was oock met hem.

57

Est hy heeft hem gheloochent segghende, Vrouwe ic en ken hem niet,

58

Ende nae een weynich een ander hem siende heeft gheseyt, Ghy sijt oock een van dien. Maer Petrus seyde, O mensch ick en bens niet.

59

Ende alst een wijle gheleden was, by na van eender vren, ⁺soe sprack dat een ander sterckelijck segghende, Voerwaer dese was ooc met dien, want hy is een Galileusch man.

+ G

60

Ende Petrus seyde, Mensch ick en weet niet wat ghy segt. Ende ter stont als hy noch sprack, soe heeft den haen ghesonghen.

61

Ende die Heere omghekeert sijnde heeft Petrum aenghesien. Ende Petrus es ghedachtich worden des woerts vanden Heere ghelijck hy gheseyt hadde. Eer den haen singhen sal, soe suldi my drij mael loochenen.

62

Ende Petrus buyten ghegaen sijnde heeft bitterlijck gheweent.

63

Ende die mannen die hem gheuanghen hielden, bespotten hem al slaende.

64

Ende sij hebben hem bedect, ende sloeghen sijn aensicht, ende sij vraechden hem segghende, Propheteert, wie eest die v gheslaghen heeft?

65

Ende veel andere blasphemerende seyden sij teghen hem.

66

Ende alst dach gheworden is, soe sijn vergadert die ouders des volcs ende die princen der priesteren ende die Scriben, ende sij hebben hem gheleyt in haren raet segghende, Eest dat ghy Christus sijt soe segghet ons.

67

Ende hy heeft tot hen gheseyt, Eest dat ict v segghe,

[p. *813]

soe en suldi my niet gheloouen,

68

ende eest dat ic v ooc vraghe soe en suldi my niet antwoerden, noch ghy en sult my niet vrij laten.

69

Maer van nu voerts sal die sone des menschen sijn sittende aen die rechte sijde vander cracht Gods.

70

Ende sij hebben allegader gheseyt, Sijt ghy dan die sone Gods? Die welcke heeft gheseyt, Ghy segghet, dat ict ben.

71

Ende sij hebben gheseyt, Waer toe begheeren wij noch ghetuyghenisse? Want wy hebbent selue ghehoort wt sijnen monde.