Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde ommesiende heeft hy ghesien die rijcke, die hen giften wierpen in die offerkiste.

+ A

2

Maer hy heeft ooc ghesien een arme weduwe worpende twee cleyn penninghen.

3

Ende hy heeft gheseyt, Voerwaer ick segghe v lieden, dat dese arme weduwe meer gheoffert heeft dan sij alle.

4

Want alle dese hebben gheworpen van tghene dat hen ouerde in Gods offeranden. Maer dese heeft ghegheuen van tghene dat sij behoeft, allen haren nootdurft die sij hadde.

5

⁺Ende als die sommighe seyden van den tempel dat dien met goeden steenen ende ghiften verciert was soe heeft hy gheseyt. Dese dinghen die ghy siet,

+ B

6

daer sullen daghen comen in die welcke den eenen steen opden anderen steen niet en sal ghelaten worden die niet en sal ghebroken worden.

7

Ende sij hebben hem ghevraecht segghende, Meester wanneer sullen dese dinghen sijn, ende wat teeken salder sijn als dese dinghen sullen beghinnen te ghescieden?

8

Die welcke heeft gheseyt, Siet toe dat ghy niet bedroghen en wort. Want daer salder veel comen in mijnen naem segghende, dat ict ben, ende den tijt is by ghecomen, daer om en wilt nae hen niet gaen.

9

Maer als ghy hooren sult orlooghen ende tweedrachtighe oploopen, ⁺soe en wilt niet veruaert worden, dese dinghen moeten ierstmael ghescieden, maer ten sal noch ter stont gheen eynde sijn.

+ C

10

Doen seyde hy hen, Deen volck sal teghen dander volck opstaen, ende deen rijck teghen dander rijck,

11

ende daer sullen groote aertbeuinghen wesen van plaetsen te plaetsen, ende pestilencien, ende diere tijden, ende veruaerlijcheden vanden hemel, ende daer sullen groote tekenen sijn.

12

Maer voer alle dese dinghen sullen sij hen handen aen v slaen, ende sij sullen v veruolghen leuerende v in die synagogen ende bewaernissen, treckende v tot die coninghen ende presidenten om mijnen naem,

13

ende tsal v ghescieden tot een ghetuyghenis.

14

Daer om stelt in v herten, niet te voerdencken hoe ghy antwoerden sult,

15

⁺want ic sal v eenen mont ende wijsheyt gheuen teghen den welcken niet en sullen connen staen ende segghen allen v vianden.

+ D

16

Ende ghy sult gheleuert worden van uwen ouders, ende broeders, ende maghen, ende vrienden, ende sij sullen sommighen van v lieden die doot aendoen,

17

ende ghy sult inden haet wesen van allen menschen om mijnen naem,

18

ende een haer van uwen hoofde en sal niet verloren gaen

19

in v lijdtsaemheyt suldi v zielen besitten.

20

Maer als ghy sult sien Ierusalem rontsom belegghen van een heyr, weet dan dat sijn verwoestinghe aenghecomen is,

21

Soe wie dan in Iudeen sijn die vlieden tot die berghen, ende die int midden van haer sijn die gaen wech, ende die op dlant sijn die en gaen in haer niet.

22

⁺Want dit sijn die daghen der wraken, op dat volbracht souden worden alle die dinghen die ghescreuen sijn.

+ E

23

Maer wee den bevruchten ende voesterende in die daghen. Want daer sal een groote verdructheyt wesen op die aerde, ende een gramscap desen volcke.

24

Ende sij sullen vallen in tscerp des sweerts, ende ghevanghen gheleyt worden tot allen volcken, ende Ierusalem sal vertreden worden van die heydenen, tot dat veruult sullen worden die tijden der heydenen.

25

+ Ende daer sullen teekenen sijn in die sonne ende in die mane, ende in die sterren, ende in die landen een verdructheyt der luyden van die verbaestheyt wt dat gheluyt der zee ende der vloeden,

26

die menschen verdorrende van vreesen ende verwachtinghen, der dinghen die der gheheelder werelt ouercomen sullen, want die crachten der hemelen sullen beroert worden,

27

ende dan sullen sij den sone des menschen sien comen in die wolcke, met grooter macht, ende maiesteyt.

28

⁺Ende als dese dinghen beghinnen te ghescieden, soe siet toe ende heft v hoofden op want v lieder verlossinghe is nakende.

+ F

29

Ende hi heeft dien een ghelijckenisse gheseyt, Besiet de vijgheboom, ende alle die boomen,

30

als sij nu wt hen seluen vrucht voerts brenghen, soe weet ghy dat den somer by is.

31

Alsoe oock als ghy dese dinghen siet ghescieden, soe weet dat het rijck Gods na by is.

32

Voerwaer ick segghe v dat dit gheslachte niet en sal voerb y gaen, tot dat alle dese dinghen ghescieden.

33

Hemel ende eerde sullen voerby gaen, maer mijn woerden en sullen niet vergaen.

* 34

⁺Maer wacht v dat v herten by auontueren niet beswaert en worden met gulsicheyt ende dronckenscap, ende sorchuuldicheden van desen leuen, ende dat v dien onuersienighen dach niet ouer en come.

+ G

35

Want hy sal als eenen strick ouer comen op alle die ghene die sitten op daenschijn van tgheheel eertrijck.

36

Daer om waect, tot allen tijden biddende, dat ghy moecht weerdich ghehouden worden om te vlieden van alle dese dinghen die toecomende sijn, ende te staen voer daensicht van den sone des menschen.

37

Ende hy was sdaechs leerende inden tempel, maer des nachts wtgaende bleef hy opden berch die ghenoemt wort van Oliueten,

38

ende alle tvolck quam tot hem smorghens vroech inden tempel om hem te hooren.