Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde tis gesciet op eenen dach, als hy tvolc leerde inden tempel, ende deuangelie vercondichde, dat tsamen verghadert sijn die princen der priesteren, ende die Scriben metten ouderen,

+ A

2

ende si spreken tot hem segghende. Segt ons, door wat macht doedy dese dinghen? oft wie is hy die v dese macht heeft ghegheuen?

3

Ende Iesus antwoordende heeft tot hen gheseyt. Ick sal v lieden ooc een woort vraghen, Antwoort my.

4

Iohannes doopsel was dat vanden hemel oft vanden menschen?

5

Ende sij dachten in hen seluen segghende. Eest sake dat wi segghen vanden hemel, soo sal hy segghen. Waerom en hebdi dan hem niet ghelooft?

6

Maer eest dat wij segghen van die menschen, soo sal alle tvolck ons steenen, want sij seker sijn dat Iohannes een propheet is,

7

Ende sij antwoorden dat si niet en wisten van waer dattet was,

8

⁺Ende Iesus seyde hen. Noch ick en segghe v ooc niet door wat macht dat ick dese dinghen doe,

+ B

9

Ende hy heeft begonnen te segghen totten volcke dese parabele. Een mensch heeft eenen wijngaert gheplant, ende hy heeft dien verhuert den wijngaerders ende hy is wten lande ghereyst veel tijts,

10

Ende alst tijt was heeft hy tot die wijnghaerders eenen knecht ghesonden, dat sij hem van die vrucht des wijngaerts gheuen souden, Die welcke hebben hem gheslaghen ende ydel laten wech ghaen,

11

Ende hy heeft daer bouen noch eenen anderen knecht ghesonden, Maer sij hebben desen ooc slaende ende versmaetheyt aendoende ydel laten gaen,

12

Ende hy heeft daer toe noch den derden ghesonden, Die welcke hebben dien ghewont ende wtghestooten,

13

Maer die heere des wijngaerts heeft gheseyt. Wat sal ick doen? ick sal mijnen beminden sone senden, by auontueren als si desen sien so sullen si hem ontsien,

14

Den welcken als die wijngaerders ghesien hadden, so hebben si ghedacht in hen seluen seggende. ⁺Dit is die erfghenaem, laet ons dien dooden, op dat die erffenisse onse worde,

+ C

15

Ende si hebben dien wt den wijngaert ghestooten ende ghedoot, Hierom wat sal hen die Heere des wijngaerts doen?

16

Hy sal comen ende dooden dese wijngaerders, ende hi sal sijnen wijngaert anderen luyden wtgheuen, Dwelc als sij ghehoort hadden so hebben sij gheseyt. Dat sij verre,

17

Ende hi henlieden aensiende heeft gheseyt. Wat is dan datter ghescreuen is. Dien steen den welcken die timmerluyden verworpen hebben, die is gheworden tot dat hooft van eenen hoec?

18

Soo wie valt op dien steen, die sal seer ghequetst worden, maer op wien dat hi valt, dien sal hy heel in stucken brijselen,

19

Ende die princen der priesteren ende die Scriben begheerden die handen aen hem te steken op die vre ende sij vreesden tvolc, want sij hebben verstaen dat hy tot hen dese ghelijckenisse gheseyt hadde,

20

⁺Ende wachtende hebben sij bespieders ghesonden die hen veynsden rechtuerdich te sijn, op dat sij hem souden vanghen in sijn woorden, ende hem leueren der ouerheyt ende der macht vanden president,

+ D

21

Ende sij hebben hem ghevraecht seggende. Meester wij weten dat ghy oprechtelijc segt, ende leert, ende ghy en neemt geenen persoon wt, maer ghi leert den wech Godts inder waerheyt,

22

Eest ons gheorlooft den keyser tribuyt te gheuen, oft niet?

23

Ende hi aenmerckende hen bedroch heeft tot hen gheseyt. Waerom tempteerdi my?

24

Thoont my den penninc, Wiens beelt ende opscrift heeft die? Sij antwoordende hebben gheseyt. Des keysers,

25

Ende hi seyde hen. Gheeft dan den keyser weder dat den keyser toebehoort, ende Gode dat Godt toebehoort,

26

Ende si en conden sijn woort niet berispen voort volc, ende verwondert sijnde van sijn antwoorde hebben sij ghesweghen.

27

+ ⁺Ende daer sijn tot hem ghecomen sommighe vanden sadduceen die de verrijsenisse loochenen, ende sij hebben hem ghevraecht

+ E

28

segghende. Meester Moyses heeft ons ghescreuen. Eest sake dat iemants broeder ghestoruen is hebbende een huysvrouwe, ende by also dese sonder kinderen is geweest dat sijn broeder haer tot een huysvrouwe neme, ende verwecke sijnen broeder saet,

29

aldus hebbender seuen broeders gheweest, ende dierste heeft een huysvrouwe ghenomen, ende hy is ghestoruen sonder kinderen,

30

Ende die tweede heeftse ghenomen, ende hy is oock ghestoruen sonder kinderen,

31

Ende die derde heeftse ghenomen, Ende desghelijcs oock alle die seuen, ende si en hebben gheen saet achterghelaten, ende sij sijn ghestoruen,

32

Ende ten laetsten van allen soo is die vrouwe oock ghestoruen,

33

Daerom in die verrijsenisse, wiens van desen huysvrouwe sal sij wesen? Aenghesien dat die seuen haer ghehadt hebben tot een huysvrouwe,

34

⁺Ende Iesus heeft hen gheseyt. Die kinderen deser werelt trouwen ende worden ghetrout,

+ F

35

Maer die weerdich ghehouden sullen sijn dier werelt, ende der verrijsenisse van die dooden die en sullen niet ghetrout worden, noch huysvrouwen nemen,

36

noch sij en sullen voortaen niet meer moghen steruen, want si sijn den Enghelen ghelijck ende tsijn Godts kinderen, want si kinderen der verrijsenisse sijn

37

Maer dat die dooden verrijsen dat thoont Moysen by den doorn ghelijck hy den Heere noemt, den God van Abraham ende den Godt van Isaac ende den God van Iacob,

38

ende ten is gheen God der dooden, maer der leuender,want sij leuen hem alle.

* 39

⁺Ende sommighe van die Scriben antwoordende hebben tot hem gheseyt. Meester ghi hebt wel gheseyt,

+ G

40

Ende sij en hebben hem niet meer dorren vraghen,

41

Maer hy heeft tot hen gheseydt. Hoe segghen sij Christum Dauids sone te sijn,

42

ende Dauid seyt selue int boeck der psalmen. Die Heere heeft gheseyt tot mijnen Heere, sidt te mijnder rechter sijden,

43

tot dat ic v vianden ghestelt hebbe tot een voetbancke uwer voeten,

44

Aldus noemt hem Dauid

[p. *811]

Heere, ende hoe eest dan sijn sone?

45

Ende alst alle tvolck hoorde, soe heeft hy tot sijnen discipelen gheseyt.

46

Wacht v van die Scriben die willen wandelen in langhe cleederen, ende hebben gheerne die groeten op die merct, ende dierste stoelen in die synagogen, ende dierste sidtsteden in die maeltijden,

47

die der weduwen huysen verslinden, veynsende een lanck ghebedt. Dese sullen meerder verdoemenisse ontfanghen.