Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xix. Capittel.

+ 1

⁺ENde inghegaen sijnde heeft hy Iericho doorwandelt,

+ A

2

Ende siet een man Zaccheus ghenaemt, ende dese was een prince der publicanen ende hy was rijc,

3

ende hy begheerde Iesum te siene wie dat hi was, ende hi en constes niet om der scaren wille, want hi cleyn was van lengden,

4

ende voorloopende is hi gheclommen op eenen wilden vijgheboom dat hy hem sien soude want hy soude aldaer passeren,

5

Ende doen Iesus tot die plaetse ghecomen was heeft hy opsiende hem ghesien ende tot hem gheseydt. Zacchee coemt gheringhe af, want heden moet ick in v huys blijuen,

6

Ende hy is haestelijck afcomen, ende heeft hem blijdelijc ontfanghen,

7

Ende als sijt alle saghen, soo murmureerden sij segghende, dat hy tot eenen sondighen mensch ter herberghen ghegaen was,

8

⁺Maer Zaccheus staende heeft gheseyt totten Heere. Siet Heere die helicht van mijnen goeden gheue ick den armen, ende heb ic iemant iet bedroghen dat gheue ic vierdobbel wederom,

+ B

9

Ende Iesus seyde tot hem. Heden is salicheyt desen huyse ghesciet, om dat dit ooc is een kint van Abraham,

10

Want die sone des menschen is ghecomen, om te soecken ende salich te maken datter verloren was.

* 11

Ende als sij dese dinghen hoorden, soo heeft hy daer noch toevoeghende een parabel gheseyt om dat hy by Ierusalem was, ende om dat sij meynden dat het rijck Gods ter stont soude gheopenbaert worden,

12

Daerom heeft hy gheseyt. + Een edel mensche is wechghereyst in een verre lant om te ontfanghen voor sij seluen een rijck, ende wederom te comen,

13

Ende gheroepen hebbende sijn thien knechten, heeft hy thien ponden ghegheuen, ⁺ende gheseyt tot hen. Comenscapt tot dat ick come,

+ C

14

Ende sijn borghers haetten hem, ende sij hebben hem boden nae ghesonden segghende. Wij en willen niet dat dese ouer ons regnere,

15

Ende tis ghesciet dat hy weder quam hebbende trijck ontfanghen, ende hy heeft gheboden dat men die knechten soude roepen den welcken hy ghelt ghegheuen heeft, om dat hy weten soude wat een yeghelijc ghecomenscapt hadde,

16

Ende dierste is ghecomen segghende. Heere v pont heeft thien pont ghewonnen

17

Ende hy heeft dien gheseyt. Wel aen goede knecht aenghesien dat ghi in een luttel ghetrou hebt gheweest, soo suldi wesen macht hebbende ouer thien steden,

18

Ende een ander is ghecomen segghende. Heere siet v pont heeft vijf pont ghewonnen,

19

Ende desen heeft hy gheseyt. Ende ghy weest ouer vijf steden,

20

Ende een ander isser ghecomen segghende. Heere siet daer v pont, het welck ick hebbe bewaert ghehadt in eenen sweetdoec,

21

want ick heb v ontsien, om dat ghi een straf mensch sijt, ⁺ghi neemt wech dat ghi niet geleyt en hebt, ende ghi maeyet dat ghi niet ghesaeyt en hebt,

+ D

22

Hy seyt tot hem. Wt uwen monde ordeele ic v ghi boose knecht, ghi wist wel dat ic een straf mensch ben, nemende dat ick niet gheleyt en hebbe, ende maeyende dat ick niet ghesaeyt en hebbe,

23

ende waerom en hebdi dan mijn ghelt niet ghegheuen ter tafelen, ende dat ic comende dat immer hadde gheeyscht met ghewin,

24

Ende den ghenen die daer bi stonden heeft hi gheseyt. Neemt van hem dat pont, ende gheuet hem die thien ponden heeft

25

Ende sij hebben hem gheseyt. Heere hi heeft thien ponden,

26

Maer ic segghe v lieden datmen gheuen sal alle den ghenen die heeft, ende vanden ghenen die niet en heeft salmen ooc nemen tgheen dat hi heeft,

27

Maer ooc brengt hier die mijne vianden, die niet en hebben ghewilt dat ic ouer hen regneren soude, ende dootse voor my,

28

Ende dese dinghen gheseyt hebbende is hy voor ghegaen opwaerts climmende nae Ierusalem.

* + 29

⁺Ende tis ghesciet doen hy ghecomen was by Bethphage ende Bethanien, aen den berch die ghenoemt wort van Oliueten dat hy heeft ghesonden twee van sijnen discipelen

+ E

30

segghende. Ghaet henen int casteel dat teghen ouer is, int welck incomende suldy vinden een vuelen van een ezelinne ghebonden, daer noyt mensch op gheseten en heeft, ontbint dat, ende brenghet herwaerts,

31

Ende eest dat v yemant vraecht? Waerom ontbint ghijt soo suldy hem aldus segghen. Want die Heere begheert sijns diensts,

32

Ende sij sijn wech gheghaen die ghesonden waren, ende hebben gheuonden alsoo hy hen gheseyt hadde een vuelen staende.

33

Ende als si het vuelen ontbonden, soo hebben die heeren van dien tot hen gheseyt. Waer toe ontbindi dat vuelen,

34

Ende sij hebben gheseydt. Om dat die Heere dies van doene heeft,

35

Ende sij hebben dat tot Iesum gheleydt, ⁺ende worpende hen cleederen opt vuelen hebben si Iesum daer op ghestelt,

+ F

36

Ende als hi voorts reysde, soo hebben si hen cleederen daer onder ghespreyt inden wech,

37

Ende doen hy

[p. *810]

nv by quam aenden nederganc vanden berch van Oliueten, soo hebben alle die scaren der gheender die nederwaerts ghinghen blijde sijnde begonst Godt te louen met luyder stemmen, van alle die mirakelen die si ghesien hadden

38

segghende. Ghebenedijt is hy die coemt een coninck inden naem des Heeren, vrede inden hemel, ende glorie in die hoochden.

* 39

Ende sommighe vanden Phariseen wt die scaren hebben tot hem gheseyt. Meester straft v discipelen,

40

Den welcken hi heeft gheseyt. Ick segghe v eest dat dese swijghen soo sullen die steenen roepen,

41

Ende als hy nae by comen was, siende die stadt heeft hi ouer die gheweent

42

segghende ⁺Hadde ghijt ooc bekent, ende voorwaer in desen uwen dach die tot uwen vrede is, maer nv sijn die dinghen verborghen van uwen ooghen,

+ G

43

Want daer sullen daghen in v comen, ende v vianden sullen v omlegghen met eenen walle, ende sij sullen v omlegghen, ende v benauwen van allen sijden,

44

ende si sullen v neder ter eerden worpen, ende v kinderen die in v sijn, ende sij en sullen den eenen steen opden anderen steen niet laten blijuen, om dat ghi niet ghekent en hebt den tijt van uwer besoeckinghen,

45

Ende inden tempel ghegaen sijnde heeft hi begonst wt te drijuen die coopers ende vercoopers die daer in waren

46

segghende. Daer staet ghescreuen. Mijn huys is een huys des ghebedts, Maer ghilieden hebt dat ghemaect een speluncke der moordenaren,

47

Ende hy was daghelijcs leerende inden tempel, Maer die princen der priesteren ende die Scriben ende die princen des volcs begheerden hem te dooden,

48

ende sij en vonden niet wat sij hem doen souden, Want alle tvolck hinck hem aen hem hoorende.