Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xvij. Capittel.

+ 1

⁺ENde hy seyde tot sijn discipelen. Het is onmoghelijc dat daer gheen verarghernissen comen en souden, maer wee den ghenen door den welcken sij comen,

+ A

2

Het waer hem beter datter eenen molensteen ghehanghen worde aen sijnen hals ende dat hi gheworpen worde in die zee, dan dat hi verarghere een van desen

[p. *808]

cleynen,

3

Siet voor v. Eest dat v broeder teghen v ghesondicht heeft, soo straft hem, ende eest dat hy penitencie doet, soo vergheuet hem,

4

ende eest dat hi seuen mael sdaechs teghen v sondicht, ende dat hy hem seuen mael sdaechs bekeert tot v segghende. Tis my leedt, soo vergheuet hem,

5

Ende die apostelen hebben gheseyt den Heere vermeerdert ons tghelooue,

6

⁺Ende die Heere heeft gheseydt. Waert sake dat ghi ghelooue hadt als een mostaert saet, so soudi segghen tot desen moerboom, wert wtghewortelt, ende ouergheplant in die zee, ende hi soude v lieden onderdanich sijn,

+ B

7

Ende wie isser van v lieden hebbende eenen knecht ackerende oft die beesten weydende, die welcke hem vanden velde ghecomen sijnde segghe. Gaet ter stont doere, ende sidt ter tafelen,

8

ende en seyt hem niet. Bereyt dat ick dat auontmael ete ende scorst v op ende dient my, tot dat ick gheten ende ghedroncken hebbe, ende daer nae suldi ghi eten ende drincken?

9

Sal hijs dien knecht danc weten om dat hy ghedaen heeft dat hi hem beuolen hadde? ⁺Ick en meyns niet,

+ C

10

Also ooc als ghy ghedaen hebt alle dat v beuolen is so segget. Wi sijn onnutte knechten, dat wi sculdich waren te doen dat hebben wij ghedaen.

* + 11

Ende tis ghesciet doen hi ghinc nae Ierusalem, dat hi ghinc doort midden van Samarien ende Galileen,

12

Ende als hi quam in een casteel so sijn hem te ghemoete comen thien melaetsche mannen, die welcke hebben ghestaen van verre,

13

ende hebben hen stemme opghehauen segghende. Iesu meester ontfermt v onser,

14

Die welcke als hi ghesien heeft, so heeft hi gheseyt. Gaet henen verthoont v den priesters, ende tis ghesciet doen si ghinghen dat si ghesuyuert sijn,

15

Maer een van dien siende dat hy ghesuyuert was, ⁺is wederom ghekeert met grooter stemmen God grootelijc louende,

+ D

16

ende hi is op sijn aensicht gheuallen voor sijn voeten danckende, ende dese was een Samaritaen,

17

Ende Iesus antwoordende heeft gheseyt. En sijnder niet thien ghesuyuert, ende waer sijn die neghen?

18

Daer en is niemant gheuonden die weder ghecomen is, ende Godt die glorie ghegheuen heeft dan dese vreemdelinc,

19

Ende hi heeft hem geseyt. Staet op, gaet wech want v ghelooue heeft v ghesont ghemaect.

* 20

+ Ende ghevraecht sijnde van die Phariseen wanneer dat het rijc Godts coemt, so heeft hi hen gheantwoort ende gheseyt. ⁺Het rijck Gods en coemt niet met wtwendighen ghebare,

+ E

21

noch men en sal niet segghen. Siet hier, oft siet daer, want siet het rijc Godts is binnen v lieden,

22

Ende hi seyde tot sijnen discipelen. Die daghen sullen comen als ghi sult begheren te sien eenen dach van den sone des menschen, ende ghi en sult dien niet sien,

23

Ende men sal v segghen. Siet hier, ende siet daer, En wilt daer niet gaen, noch en volchtse niet,

24

want ghelijc den blixem schijnende van onder den hemel blincket ouer alle dat onder den hemel is, also sal die sone des menschen sijn in sijnen dach,

25

Maer ierstmael moet hi veel lijden, ende verworpen worden van desen gheslachte.

* 26

Ende ghelijc dat ghesciet is in die daghen van Noe, ⁺also salt ooc wesen in die daghen vanden sone des menschen,

+ F

27

Sij aten ende sij droncken, sij trouden huysvrouwen, ende worden ten houwelijc ghegheuen, tot opden dach dat Noe in die arcke ghinck, ende dat den oueruloet ghecomen is, ende heeftse alle vernielt,

28

Desgelijcks alsoot ghesciet is in die daghen van Loth sij aten ende sij droncken, sij cochten ende vercochten, sij planten ende timmerden,

29

maer opden dach doen Loth ghinc van Sodomen heuet ghereghent vier ende solfer vanden hemel, ende heuet al vernielt,

30

In deser voeghen salt wesen opden dach dat die sone des menschen sal gheopenbaert worden,

31

In die vre so wie sijn sal opt dack ende sijn ghereetscappen int huys die en come niet nederwaerts om die te halen, ende die opt velt is en keere desgelijcs ooc niet achterwaerts,

32

⁺Weest ghedachtich der huysvrouwen van Loth,

+ G

33

Soo wie begheert sijn ziele te behouden die salse verliesen, ende soo wie die verliest, die salse leuende maken,

34

Ic segghe v lieden. In dien nacht salder twee wesen in een bedde, die eene sal opghenomen worden, ende die andere sal achterghelaten worden,

35

Daer salder twee sijn tsamen malende, die eene sal opghenomen worden, ende die andere achterghelaten,

36

Twee int velt, die eene sal opghenomen worden, ende die andere achterghelaten

37

Antwoordende segghen sij hem. Waer Heere? Die welcke heeft hen gheseyt. So waer het lichaem is, daer sullen die arens vergaderen.