Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

+ 1

⁺ENde die Publicanen ende sondaers waren tot hem comende dat sij hem hooren souden,

+ A

2

Ende die Phariseen ende Scriben hebben ghemurmureert seggende. Dese ontfanct die sondaren ende eedt met hen,

3

Ende hy heeft tot hen gheseyt dese ghelijckenisse segghende.

4

Wat mensche isser van v lieden die hondert scapen heeft, ende eest dat hi een van dien verliest, en verlaet hy dan niet die neghen ende neghentich in die woestijne, ende ghaet tot het ghene datter verloren was, tot dat hijt vint?

5

Ende als hi dat gheuonden heeft soo legt hi dat op sijn scouderen, hem verblijdende

6

ende thuys comende, ⁺roept hi te samen sijn vrienden ende ghebueren segghende. Verblijt v met my, want ick hebbe mijn scaep gheuonden dat verloren was,

+ B

7

Ick segghe v, dat ooc alsoo blijscap sal sijn inden hemel ouer eenen sondaer penitencie doende, meer dan van neghen ende neghentich rechtuerdighe die gheen penitencie en behoeuen

8

Oft wat vrouwe isser hebbende thien penninghen, eest dat sij eenen penninc verloren heeft, en ontsteect sij niet een licht, ende worpt het huys omme, ende soect neerstelijc tot dat sij dien vint,

9

⁺Ende als si dien gheuonden heeft soo roept sij te samen haer vriendinnen ende ghebuerinnen seggende. Verblijt v met my, want ic heb vonden den penninc dien ic verloren hadde,

+ C

10

Alsoo (seg ick v) tsal blijscap wesen voor die enghelem Gods ouer eenen sondaer die penitencie doet.

* + 11

Ende hi seyde. Een mensch hadde twee sonen,

12

ende die ioncste van dien heeft sijnen vader geseyt. Vader gheeft my het deel van mijnen goede dwelc mi toe coemt, Ende hy heeft hem tgoet ghedeelt,

13

Ende nae een luttel daghen is die ioncste sone (als hijt al verghadert hadde) ⁺wt ghereyst in een verre lantscap, ende aldaer heeft hy sijn goet verdaen leuende ouerdadelijck,

+ D

14

Ende als hijt al verdaen hadde, soo isser eenen crachtighen hongher opghestaen in dat lantscap, ende hy begonste ghebreck te lijden,

15

Ende hy is wech gheghaen ende heeft hem gheuoecht by eenen borgher van dien lande, Ende die heeft hem ghesonden in sijn hoeue dat hy die verkenen hoeden soude,

16

Ende hy begheerde sijnen buyc te vullen van dat draf dat die verkenen aten, ende niemant en gaeft hem,

17

Maer in sij seluen ghekeert sijnde heeft hi gheseyt. ⁺Hoe veel huerlingen mijns vaders sijnder die oueruloedelijc broot hebben ende ick vergae hier van honghere,

+ E

18

Ick sal opstaen ende gaen tot mijnen vader, ende hem segghen. Vader ick heb ghesondicht inden hemel ende voor v,

19

nv en ben ick niet weerdich ghenoemt te worden v sone, maect my als een van uwen huerlinghen,

20

Ende opstaende is hi gheco-

[p. *807]

men tot sijnen vader, Ende doen hy noch verre was, heeft hem sijn vader ghesien, ende hi is door bermherticheyt beweecht gheworden, ende toeloopende is hi op sijnen hals gheuallen, ende hi heeft hem ghecust,

21

Ende die sone heeft tot hem gheseyt. Vader ick heb ghesondicht inden hemel ende voor v, ick en ben nv niet weerdich v sone ghenoemt te worden,

22

Ende die vader heeft tot sijnen knechten gheseyt. ⁺Haestelijc brengt voorts het ierste eerlijck langhe cleedt, ende doet hem dat aen, ende gheeft hem eenen rinck aen sijn hant, ende schoenen aen sijn voeten,

+ F

23

ende brengt het ghemest calf, ende dootet, ende laet ons eten, ende vrolijcken maeltijt houden,

24

want dese mijn sone was doot, ende hi is wederom leuende gheworden, hi was verloren, ende hi is gheuonden, Ende sij hebben begonnen blijdelijck te eten,

25

Maer sijn outste sone was int velt, ende doen hy quam ende naecte den huyse, soo heeft hy ghehoort een ghesanck, ende een ghedans,

26

ende hi heeft gheroepen eenen vanden knechten, ende gheuraecht wat dese dinghen waren,

27

Ende dese heeft hem gheseyt. V broeder is comen, ende v vader heeft dat ghemest calf gheslaghen om dat hi hem ghesont heeft ontfanghen,

28

Ende hi is veronweerdicht gheworden, ⁺ende en heeft niet willen binnen gaen. Hierom sijn vader wtgheghaen sijnde heeft hem begonst te bidden,

+ G

29

Ende hi antwoordende heeft tot sijnen vader gheseyt. Siet ick diene v soo veel iaren ende noyt en heb ick v ghebodt ouertreden, ende ghi en hebt my noyt eenen bock ghegheuen dat ick soude met mijnen vrienden vrolijcken maeltijt houden,

30

Maer nae dat dese v sone, die alle sijn goet met die hoeren verteert heeft, ghecomen is, hebdi hem dat ghemest calf gheslaghen, Ende hy heeft tot hem gheseyt.

31

Sone ghi sijt altijt met my, ende alle wat mijne is dat is uwe,

32

Maer men moest vrolijcken maeltijt houden ende vrolijck sijn, want dese uwe broeder was doot ende hi is wederom leuende gheworden, hy was verloren, ende hy is gheuonden.