Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

+ 1

⁺ENde tis ghesciet doen Iesus ghinck int huys van eenen prince der Phariseen op eenen sabboth dach om broot te eten, ende sij sloeghen hem gade

+ A

2

Ende siet een watersuchtich mensch was voor hem,

3

ende Iesus antwoordende heeft gheseyt tot die wetgeleerde ende Phariseen segghende. Eest gheorlooft op eenen sabboth dach te ghenesen

4

Maer si sweghen Ende hi dien te hem nemende heeft hem ghenesen, ende laten gaen,

5

Ende antwoordende tot henlieden heeft hi gheseyt. Wiens van v lieden ezel

[p. *806]

oft osse sal inden put vallen, ende dat hy dien niet en sal ter stont wt trecken op eenen sabbothdach?

6

Ende si en consten hem hier op niet gheantwoorden,

7

⁺Ende hy seyde oock tot die ghenoodde een ghelijckenisse aenmerckende hoe dat sij dierste sitplaetsen vercosen segghende tot henlieden.

+ B

8

Als ghy ghenoodt sijt ter bruyloft, soo en sidt in dierste plaetse niet, op auontueren ofter iemant eerlijcker dan ghi ghenoodt ware van hem,

9

ende dat hi die v ende dien ghenoodt heeft, comende tot v segghe. Gheeft desen plaetse, ende dat ghi dan beghint met bescaemtheden die laetste plaetse te nemen,

10

maer als ghi gheroepen sijt, soo gaet ende sidt in die laetste plaetse, op dat hy (wanneer hi comen sal die v ghenoodt heeft) v segghe. Vrient climt opwaerts, Dant salt v glorie sijn voor die ghene die daer tsamen ter tafelen sitten,

11

⁺Want alle die hem verheft sal vernedert worden ende wie hem vernedert die sal verheuen worden.

+ C

* 12

+ Ende hi seyde oock tot den ghenen die hem ghenoodt hadde. Als ghi eenen noenmael oft auontmael houdt, soo en wilt v vrienden niet roepen, nocht v broeders, nocht v maghen, nocht v rijcke ghebueren, dat sij by auontueren v niet wederom en nooden, ende dat v vergheldinghe ghesciede,

13

Maer als ghi eenen maeltijt houdt, soo roept arme, crancke, cruepele, ende blende,

14

ende ghi sult salich sijn, want sij en hebben niet om te verghelden, want tsal v gheloont worden in die verrijsenisse der rechtuerdigher, Ende als hi dit gheseyt hadde,

15

⁺soo heefter een vanden ghenen die tsamen ter maeltijt saten tot hem gheseyt. Salich is hi die broot eten sal int rijck Godts,

+ D

16

Ende hy heeft tot hem gheseyt. Een mensch heeft eenen grooten auontmael ghehouden, ende hi heefter veel gheroepen,

17

Ende hy heeft sijnen knecht ghesonden op die vre des auontmaels om den ghenoodden te segghen dat sij comen souden, want alle dinghen nv bereydt waren,

18

Ende sij begonsten hen alle te samen te ontsculdighen, Dierste heeft hem gheseyt. Ick heb een lanthuys ghecocht, ende tis mi noot dat ick wtghae ende dat besie, Ick bidde v verontsculdicht mi,

19

Ende die ander heeft gheseyt. ⁺Ick heb vijf iocken ossen ghecocht, ende ic gaen die proeuen, Ick bidde v verontsculdicht my,

+ E

20

Ende een ander heeft gheseyt. Ic heb een huysvrouwe ghetrout, ende daerom en mach ick niet comen,

21

Ende die knecht wederom ghekeert sijnde heeft dese dinghen sijnen heere ghebootschapt. Doen heeft die vader des huysghesins ghestoort sijnde gheseyt tot sijnen knechte. Gaet gheringhe wte tot die straten ende wijcken der stadt, ende die arme, ende crancke, ende blende, ende cruepele brengt hier binnen,

22

Ende die knecht heeft gheseyt. Heere tis ghedaen ghelijck ghi gheboden hebt, ende daer is noch plaetse,

23

Ende die heere heeft tot sijnen dienaer gheseyt. Gaet wt tot die weghen, ende thuynen, ende dwingtse binnen te comen op dat mijn huys mach veruult worden,

24

Ende ic segghe v lieden, dat niemant van dien mannen die gheroepen sijn, mijn auontmael smaken en sal.

* 25

Ende daer ghinghen veel scaren met hem, ende omghekeert sijnde heeft hi tot hen gheseyt.

26

Eest dat iemant tot my coemt, ende niet en haet sijnen vader ende moeder, ende huysvrouwe, ende kinderen, ende broederen, ende susteren, ende noch oock mede sijn ziele, soo en mach hy mijn discipel niet sijn,

27

Ende wie sijn cruys niet en draecht, ende coemt na my, die en mach mijn discipel niet wesen,

28

Want wie van v lieden willende eenen torre timmeren en rekent niet ierstmael al sittende die costen die daer van noode sijn, oft hi die heeft om te volmaken,

29

op dat naemaels als hy tfundament gheleyt sal hebben ende niet en sal moghen volmaken, ⁺alle diet sien niet en beghinnen hem te bespotten

+ G

30

segghende. Dese man heeft begonnen te timmeren, ende hy en heues niet moghen volmaken,

31

Oft wat coninc willende gaen om te orloghen teghen eenen anderen coninck, en sal niet ierstmael sittende dencken oft hy soude moghen met thien duysent hem teghen comen die met twintich duysent tot hem coemt?

32

want anders soo sendt hi boden wt (als die noch verre is) ende begheert tghene dat den vrede aenghaet,

33

Aldus oock een ieghelijck van v lieden wie niet en versaect alle dat hy besidt, die en mach mijn discipel niet wesen,

34

Tsout is goet, maer eest sake dat het sout onsmakelijck wort waer mede salment souten?

35

want ten is noch totten lande noch totten mesthoop nuttelijck, maer tsal buyten wech gheworpen worden, Die ooren heeft om te hooren die hoore.