Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde als daer veel scaren rontsomme stonden, alsoo dat sij malcanderen vertreedden, so heeft hy begonst te segghen tot sijnen discipelen.

Wacht v vanden deesem der Phariseen dwelc is gheveijnstheyt,

+ A

2

Maer niet en isser bedect, dat niet en sal ontdect worden, noch verborghen, dat niet en sal gheweten worden,

3

Want dat ghi in duysternissen gheseyt hebt, sal in dlicht gheseyt worden, ende dat ghi in die oore ghesproken hebt in die slaepcameren, sal gepreect worden op die daken,

4

Maer ick segghe v mijnen vrienden. En wilt niet veruaert wesen van die ghene diet lichaem dooden, ende nae desen en hebben sij niet meer dat sij doen moghen,

5

Maer ick sal v toonen wien ghi vreesen moet, vreest hem die nae dat hi ghedoot heeft die macht heeft te worpen in die helle, Alsoo segghe ick v, desen vreest,

6

En vercooptmen niet vijf musschen om twee cleyn penninghen, ende niet een van dien en is voor Godt vergheten?

7

Maer oock die hayren ws hoofts sijn alle ghetelt, Daerom en wilt niet vreesen want ghi sijt beter dan veel musschen,

8

Ende ick segghe v. ⁺Alle die my belijdt voor die menschen, dien sal die sone des menschen oock belijden voor die enghelen Gods

+ B

9

maer die mi loochent voor die menschen, die sal verloochent worden voor die enghelen Gods,

10

Ende alle die een woort seyt teghen den sone des menschen, dat sal hem vergheuen worden, maer den ghenen die inden heyleghen gheest blasphemeert en salt niet vergeuen worden.

+ 11

Ende als sij v brenghen sullen in die Sinagogen, ende tot die wethouderen ende machtighe heeren, soo en wilt niet besorcht sijn, hoe oft wat ghi antwoorden sult, oft wat ghi segghen sult,

12

want die heylighe gheest sal v leeren op die selue vre wat ghy sult moeten segghen,

13

Ende een vander scaren seyde tot hem Meester segt mijnen broeder dat hi die erffenisse met my deyle,

14

Ende hi seyde hem. Mensch wie heeft mi rechter oft erfsceyder ghemaect tusschen v lieden?

15

Ende hi heeft tot hen gheseyt. Siet toe ende wacht v van alle ghiericheyt, want niemant en leeft van die oueruloedicheyt der dinghen die hi besidt,

16

Ende hi seyde tot hen een ghelijckenisse segghende. Eens rijcs mans acker heeft oueruloedighe vruchten voorts ghebracht,

17

⁺ende hi dachte in sij seluen segghende. Wat sal ic doen, want ick en heb niet daer ick mijn vruchten in mach vergaderen?

+ C

18

Ende hi heeft gheseyt, dit sal ick doen. Ick sal mijn schueren afbreken ende meerder maken, ende daer sal ick vergaderen al dat mi ghewassen is, ende mijn goeden,

19

ende ick sal mijnder zielen segghen. Siele ghy hebt veel goets opgheleyt voor veel iaren, rust, eedt, drinct, brast,

20

Ende Godt heeft hem gheseyt. Ghi sot desen nacht eysschen sij v ziele van v wederom, ende die goeden die ghy bereydt hebt wiens sullen die wesen?

21

Alsoo is hi die voor sij seluen eenen scadt verghadert, ende en is in Gode niet rijck.

* 22

Ende hi heeft tot sijn discipelen gheseyt. Daerom segghe ick v. En wilt niet sorchuuldich sijn uwer zielen wat ghi eten sult, nocht den lichaem wat ghi aendoen sult,

23

Die ziele is beter dan die spijse, ende dlichaem beter dan tcleet,

24

Aenmerct die rauen, want sij en saeyen nocht en maeyen niet, die noch kelder noch schuere en hebben ende God voetse Hoe veel weerdigher sijt ghi dan die?

25

Maer wie van v lieden mach al denckende tot sijnder lengden eenen cubitus toe doen?

26

Aldus eest dat ghi niet en vermoecht tghene dat het minste is, waerom sijdi van die ander dinghen besorgt?

27

Aenmerct die lelien hoe die wassen, ⁺sij en arbeyden noch sij en spinnen niet, Maer ick segghe v dat Salomon in alle sijn glorie niet ghecleet en was als een van desen,

+ D

28

Ende eest dat het gras (dat heden is inden acker ende morghen inden ouen gheworpen wort) Godt alsoo cleedt, hoe veel te meer v ghy cleyn van ghelooue?

29

Ende en wilt ghi niet vraghen wat ghi eten sult oft drincken, ende en wilt v niet verheffen om hooch,

30

want alle dese dinghen soecken die luyden der werelt, Maer v vader weet wel dat ghi alle dese dingen behoeft,

31

Maer soect ierstmael het rijc Gods ende alle dese dinghen sullen v toe gheworpen worden

32

En wilt niet vreesen o ghi cleyn vergaderinghe, want het heeft uwen vader belieft v te gheuen het rijck,

33

vercoopt dat ghi heden besidt ende gheeft almissen, Maect voor v borsen die niet en verouderen, eenen scadt die niet en mindert in die hemelen, daer gheenen dief aen en coemt, noch gheen motte en bederft,

34

Want waer uwen scadt is daer sal v herte ooc sijn,

35

Laet v lendenen omgort wesen, ende bernende lichten in v hant,

36

ende ghi weest ghelijc den menschen die haren heere verbeyden wanneer hi wederkeeren sal van die bruyloft, op dat sij (als hi coemt ende clopt) hem ter stont open doen moghen

37

⁺Salich sijn die knechten, die welcke (als die heere coemt) hi sal wakende vinden, voorwaer ic segghe v dat hy hen opscorten sal, ende salse doen ter tafelen sitten, ende doorgaende sal hijse dienen,

+ E

38

Ende eest dat hy coemt inde tweede wake, ende eest dat hy in die derde wake coemt, ende dat hijse alsoo vint, salich sijn die knechten,

39

Maer weet dit dat waert sake dat die vader des huysgesins wiste ter wat uren dat die dief comen soude, hi soude voorwaer waken, ende hi en soude sijn huys niet laten doorgrauen

40

Ende ghi weest ooc bereedt, want ter vren als ghijt niet en meynt, sal die sone des menschen comen,

41

Ende Petrus heeft tot hem gheseyt. Heere segdy dese ghelijckenisse tot ons, oft oock tot allegader?

42

Ende die Heere heeft gheseyt. Wie meyndi datter een ghetrouwe ende wijs huysregeerder is, den welcken die Heere ghestelt heeft ouer sijn familie, om dat hi die te sijnen tijde gheuen soude een mate terwen?

43

Salich is die knecht den welcken die heere (als hi coemt) sal alsoo doende vinden,

44

Voorwaer ick segghe v, dat hi ouer alle dat hi besidt hem stellen sal,

45

⁺Maer eest dat die knecht seyt in sijn herte, mijn heere vertrect te comen, ende dat hi beghint te slaen die knechten ende dienstvrouwen, ende te eten ende te drincken, ende droncken te worden,

+ F

46

soo sal die heere van dien knecht comen opden dach als hijt niet en hoept ende ter vren die hi niet en weet, ende hy sal hem in stucken slaen ende sijn deel sal hi metten onghetrouwen stellen,

47

Maer die knecht die sijns heeren wille gheweten heeft ende en heeft niet bereydt, ende niet en heeft ghedaen nae sijnen wille, die sal gheslaghen worden met veel slaghen,

48

maer diet niet gheweten en heeft, ende heeft ghedaen dinghen die slaghen weerdich sijn, die sal met luttel slaghen gheslaghen worden, Ende alle wien veel ghegheuen is van dien sal veel gheeyscht worden, ende wien men veel betrout heeft, van dien sal men meer eysschen,

49

Ick ben ghecomen om vier te brenghen op deerde, ende wat wille ick dan dat ontsteken worde?

50

Ende ick moet met een doopsel ghedoopt worden, en hoe worde ick benaut tot dat volbracht wort?

51

Meyn-

[p. *805]

di dat ick ben ghecomen om vrede te gheuen op die eerde? ⁺Neen segghe ic v, maer een afsceydinghe,

+ G

52

want van desen tijt voorts sullender vijue sijn in een huys ghesceyden, drije teghen twee, ende twee teghen drije,

53

Die vader sal ghesceyden worden teghen tkint, ende tkint teghen sijnen vader, ende die moeder teghen die dochter, ende die dochter teghen die moeder, die sweerinne teghen haer behoude dochter, ende die behoude dochter teghen haer sweerinne,

54

Ende hi seyde tot die scaren. Als ghi sult sien een wolcke opgaende vanden westen, soo segdi ter stont. Daer coemt eenen plasreghen, ende tghesciet alsoo,

55

ende als ghi den suyden wint siet blasen soo segdi. Het sal heet sijn, ende het ghesciet,

56

Ghy hypocrijten die ghedaente des hemels ende der eerden condi ordeelen, maer hoe en ordeeldi desen tijt niet?

57

Ende waerom en ordeeldi niet van v seluen dat rechtuerdich is?

58

Ende als ghi gaet met uwen wederpartijder tot den prince, soo doet neersticheyt om onder weghen van hem ontslaghen te sijne, dat hy v by auontueren niet en trecke totten rechter ende dat die rechter v leuere den steenwachter ende dat die steenwachter v inden kerker worpe,

59

Ick segghe v ghy en sult daer niet wtgaen tot dat ghi betaelt oock die laetste mijte.