Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xi. Capittel.

1

⁺ENde tis ghesciet doen hy was op een plaetse biddende als hy afghelaten hadde datter een van sijnen discipelen tot hem gheseyt heeft. Heere leert ons bidden, ghelijc ooc Iohannes sijn discipelen gheleert heeft,

+ A

2

Ende hy heeft tot hen gheseyt. Als ghy bidt soo segt. Vader, Gheheylicht sij uwen naem, V rijck

[p. *803]

laet aencomen,

3

Ons daghelijcks broot gheeft ons heden,

4

Ende vergheeft ons onse sonden, want wi ooc quijtscelden den ghenen die ons sculdich sijn, Ende en leyt ons niet in die becoringhe,

5

Ende hi heeft tot hen gheseydt.

* Wie van v lieden sal eenen vrint hebben, ende sal tot hem gaen inder middernacht ende hem segghen. Vrint leent my drij brooden,

6

want mijn vrint is vanden wech comen tot mi, ende ick en heb niet dat ick voor hem stellen mochte,

7

ende dat hi van binnen antwoordende segghe. En wilt my niet moeylijck wesen, mijn doere is nv ghesloten, ende mijn kinderen sijn bi mi in die slaepcamer, Ick en mach niet opstaen ende v gheuen,

8

Ende eest dat die blijft cloppende, ick seg v, al en sal hijt hem niet gheuen opstaende om dat hi sijn vrint is, nochtans om sijn moetelijcheyt sal hi opstaen, ⁺ende salder hem gheuen soo vele alsser hem van noode sijn,

+ B

9

Ende ick segghe v lieden, Begheert ende men sal v gheuen, soect, ende ghi sult vinden, clopt, ende men sal v open doen,

10

want alle die bidt die ontfanct, ende die soect die vint, ende den ghenen die clopt, sal open ghedaen worden,

11

Maer wie van v lieden begheert van sijnen vader een broot, sal hi hem eenen steen gheuen? Oft eenen visch, sal hy hem voor eenen visch, een serpent gheuen?

12

Oft begheert hi een ey sal hy hem een scorpioen bieden?

13

Aldus eest sake dat ghy lieden niet teghenstaende dat ghy quaet sijt, nochtans weet uwen kinderen goede gauen te geuen, hoe veel te meer sal v vader vanden hemel den goeden gheest gheuen den ghenen diet hem bidden?

* 14

+ Ende hi was wtworpende eenen duyuel, ende dien was stom, Ende doen hi den duyuel wtgheworpen hadde, soo heeft die stomme ghesproken, ende die scaren sijn verwondert gheweest,

15

Ende die sommighe van henlieden hebben gheseyt. Door Beelzebub den prince der duyuelen worpt hi die duyuelen wt,

16

Ende die andere tempterende begheerden van hem een teeken vanden hemel,

17

Ende als hi hen ghedachten ghesien heeft soo heeft hi tot henlieden gheseyt. ⁺Alle rijc dat teghen sij seluen ghedeylt is sal verwoest worden ende deen huys sal op dander huys vallen,

+ C

18

Eest dan dat Satanas teghen sij seluen ghedeelt is, hoe sal dan sijn rijck staen? want ghi segt dat ick door Beelzebub die duyuelen wtworpe,

19

Maer eest dat ic door Beelzebub die duyuelen wtworpe, waer door worpen v kinderen die wte? Daerom sullen sij v rechters wesen,

20

Maer eest dat ick door den vingher Godts die duyuelen wtworpe, soo is voorwaer het rijck Godts tot v lieden ghecomen,

21

Als een sterck ghewapende sijn voorhof bewaert, soo sijn alle dinghen in vrede die hi besidt,

22

Maer eest datter een die stercker dan hi is ouercomende hem verwint, so neemt hi hem alle sijn wapenen af daer hy betrouwen in hadde, ende sijn roouen sal hi wtdeylen,

23

Die met my niet en is die is teghen mi, ende soo wie met my niet en vergadert, die verstroyt,

24

Als eenen onsuyueren gheest wtghegaen is vanden mensche, soo doorwandelt hy die onghewaterde plaetsen, soeckende ruste, Ende die niet vindende seyt hi. Ick sal wederom gaen in mijn huys daer ick wtgheghaen ben,

25

Ende als hi daer coemt, soo vint hi dat met bessemen ghesuyuert, ende verciert,

26

⁺Dan gaet hi ende neemt tot hem noch seuen ander gheesten argher dan hi, ende daer inghegaen sijnde woonen sij daer, Ende die wterste van dien mensche worden argher dan dierste.

+ D

* 27

Ende tis ghesciet als hi dese dinghen seyde, datter een vrouwe wter scaren haer stemme opheffende tot hem gheseydt heeft. Salich is den buyck die v ghedraghen heeft, ende die borsten die ghi gesoghen hebt,

28

Ende hi seyde. Dats emmer waer, maer oock sijn sij salich die dwoort Gods hooren ende dat bewaren,

29

Ende doen die scaren ouer een te samen liepen soo heeft hi begonst te segghen. Dit gheslachte is een arch gheslachte, het begheert een teeken, ende hem en sal gheen teeken ghegheuen worden, dan het teeken van Ionas den propheet,

30

Want ghelijck Ionas een teeken was den Niniuiten, alsoo sal die sone des menschen sijn desen gheslachte,

31

Die coninghinne van tsuyde lant sal opstaen int ordeel met die mannen van desen gheslachte, ende sij salse verdoemen, want si quam van die eynden des aertrijcs om te hooren die wijsheyt van Salomon, ⁺ende siet hier is meer dan Salomon,

+ E

32

Die mannen van Niniue sullen opstaen int ordeel met desen gheslachte, ende sij sullen dat verdoemen, want sij hebben penitencie ghedaen ter predicatien van Ionas, ende siet hier is meer dan Ionas.

33

Niemant en ontsteect een licht ende stelt dat int verborghen, nocht onder een corenvat, maer op eenen candelaer, op dat die ghene die in comen dlicht sien moghen,

24

Dlicht ws lichaems is v ooghe, Eest dat v ooghe simpel is, soo sal v gheheel lichaem licht wesen, maer eest dat die arch is, soo sal v lichaem ooc duyster wesen,

35

Daerom siet toe dattet dlicht dat in v is, gheen duysternissen en sijn,

36

Eest dan dat v lichaem gheheel licht is, niet hebbende eenich deel der duysternissen, so salt gheheel licht wesen, ende ghelijck een licht des scijnsels salt v verlichten.

37

+ Ende als hi sprack soo heeft hem een Phariseus ghebeden dat hi den noenmael by hem eten wilde Ende daer inghegaen sijnde is hi ter tafelen gheseten

38

Maer die Phariseus begonste in sij seluen ouerlegghende te segghen, waerom dat hi niet ghewasschen en was voor den noenmaeltijt,

39

Ende die Heere heeft tot hem gheseyt. ⁺Nv ghi Phariseen suyuert het buytenste vanden croes oft scotele, maer dat van v lieden binnen is, dat is vol roouerien ende boosheyt.

+ F

40

Ghy dwase, die ghene diet buytenste ghemaect heeft, en heeft die ooc niet ghemaect datter binnen is?

41

Maer nochtans datter ouerblijft gheeft ter aelmissen, ende siet alle dinghen sijn v suyuere,

42

Maer wee v ghi Phariseen want ghy verthient die munte ende ruyte ende alderande spijscruyt, ende ghi laet achter dat recht ordeel ende die liefde Gods maer dese dinghen haddi moeten doen ende die niet achter laten,

43

Wee v ghi Phariseen, want ghi bemint die ierste stoelen in die Sinagogen ende die groeten op die merct,

44

Wee v want ghi sijt als grauen die verborghen sijn, ende die menschen daer op wandelende en wetens niet,

45

Ende een vanden wetgheleerden antwoordende heeft tot hem gheseyt. Meester dese dinghen segghende doedi ons ooc versmaetheyt aen,

46

Ende hi seyde. Ende wee oock v ghy wetgheleerde, want ghy die menschen belast met lasten die sij niet ghedraghen en connen, ende ghi en raect die packen niet met uwen eenen vingher.

* 47

Wee v die optimmert die grauen der propheten, maer v vaderen hebben die ghedoot,

48

voor waer ghi ghetuycht, ⁺dat ghi consenteert in uwer vaderen wercken, want tis waer dat sij die ghedoot hebben, maer ghi timmert hen grauen.

+ G

49

Daerom heeft ooc die wijsheyt Gods gheseyt. Ic sal tot hen senden propheten ende apostelen, ende van dien sullen sij dooden ende veruolghen,

50

op dat gheeyscht worde het bloet van allen den propheten dat ghestort is van tbeghinsel der werelt, van desen gheslachte,

51

Van Abels bloet tot dat bloet van Zacharias die ghedoot is tusschen den outaer ende den tempel. Alsoo (segghe ick v) salt gheeyscht worden van desen gheslachte,

52

Wee v ghi wetgheleerde want ghi hebt den slotel der wetenheyt ghedraghen, ende

[p. *804]

ghi en sijt niet ingheghaen, ende die ghene die dare inghinghen hebdijt verboden,

53

Ende doen hi dese dinghen tot hen seyde, soo begonsten die Phariseen ende wetgheleerde swaerlijck teghen hem in te dringhen, ende sijnen mont te oueruallen van veel dinghen, legghende hem laghen,

54

ende begherende iet te vaten wt sijnen mont dat sij hem souden besculdighen.