Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

+ 1

⁺ENde nae desen heeft die Heere ghecoren noch ander tweentseuentich, ende hy heeft die twee tsamen ghesonden voor sijn aensicht in alle steden ende plaetsen daer hy comen soude,

+ A

2

Ende hi seyde henlieden, Den oochst is voorwaer groot maer die wercluyden sijn luttel, Daerom biddet den Heere des oochsts dat hi wercluyden sende in sijnen oochst,

3

Gaet henen, siet ick sende v ghelijc lammeren onder die woluen.

4

En wilt gheen borse draghen, noch male, noch scoenen ende niemanden en groet ouer wech,

5

In wat huys dat ghi inne gaet soo segghet ten iersten. Vrede sij desen huyse,

6

ende eest dat daer een kint des vreedts is soo sal op dien uwen vrede rusten, Maer eest soo niet, soo sal uwen vrede wederom tot v keeren,

7

Maer int selue huys blijft etende ende drinckende van dat si hebben, want een wercman is sijns loons weerdich.

⁺* En wilt niet vertrecken van deen huys in dandere,

+ B

8

Ende in wat stadt dat ghi gaet, ende sij v ontfanghen, so etet dat v voor ghestelt wort,

9

ende gheneest die siecke die daer in sijn, ende segghet hen. Het rijck Godts is v lieden nae by comen,

10

Maer in wat stadt dat ghy in gaet, ende sij v lieden niet en ontfanghen, soo suldi wtgaende in hen straten segghen.

11

Ooc het stubbe dat ons aenghebleuen is van uwer stadt, vaghen wij af op v lieden, maer nochtans weet dat het rijck Gods is nae by comen,

12

Ick segghe v, dat den Sodomiten ghenadelijcker gheschieden sal op dien dach, dan dier stadt,

13

Wee v Chorozaim, wee v Bethsaida, want waren in Tiro ende Sidon die mirakelen ghedaen gheweest, ⁺die in v ghedaen sijn, sij souden in voorleden tijden in hairen cleederen ende asschen sittende penitencie ghedaen hebben,

+ C

14

Maer nochtans sal Tyro ende Sidoni ghenadelijcker ghescieden int ordeel dan v lieden,

15

Ende Capharnaum totten hemel toe verhauen ghi sult totter hellen toe nederghesoncken worden,

16

Die v lieden hoort die hoort mi, ende die v versmaet die versmaet my, ende die mi versmaet, die versmaet hem die my ghesonden heeft,

17

Ende die tweentseuentich sijn wederghecomen met blijscappen segghende. Heere die duyuels sijn ons oock onderdanich in uwen naem,

18

Ende hi seyde hen. Ick heb Satanam als eenen blixem sien vallen vanden hemel.

19

Siet ick heb v macht ghegheuen te treden op serpenten ende scorpioenen, ende ouer alle die macht des viants, ⁺ende ten sal v niet letten,

+ D

20

Maer nochtans en wilt v daer in niet verblijden om dat die gheesten v onderdanich sijn, Maer verblijt v dat uwe namen ghescreuen sijn in die hemelen,

21

In die selue vre heeft hy hem verhuecht inden gheest ende gheseyt. Ick belijde v vader Heere des hemels ende der eerden, dat ghy dese dinghen verborghen hebt van die wijse ende voorsienighe, ende hebt die gheopenbaert den cleynen, Iae vader, want het heeft also behaecht voor v,

22

Alle dinghen sijn mi ghegheuen van mijnen vader, Ende niemant en weet wie die sone is, dan die vadere, ende wie die vader is, dan die sone, ende die ghene diet die sone wilt openbaren,

23

Ende omghekeert sijnde tot sijnen discipelen heeft hi gheseyt. + Salich sijn die ooghen die sien tghene dat ghi siet,

24

Want ic segghe v dat veel propheten ende coninghen hebben willen sien tghene dat ghy siet, ende sij en hebbens niet ghesien, ende hooren tghene dat ghy hoort, ende sij en hebbens niet ghehoort,

25

Ende siet een wetgheleerde is opghestaen hem tempterende ende segghende. Meester wat doende sal ic deewich leuen besitten?

26

⁺Ende hi heeft tot hem gheseydt. Wat isser in die wet ghescreuen? Hoe leesdi?

+ E

27

Hi antwoordende heeft gheseydt. Ghy sult liefhebben den Heere uwen Godt wt v gheheel herte ende wt v gheheel ziele, ende wt alle v crachten, ende wt allen v verstant ende uwen naesten als v seluen,

28

Ende hy heeft hem gheseyt. Ghi hebt recht gheantwoort, doet dit, ende ghi sult leuen,

29

Maer hi willende sij seluen rechtuerdich maken heeft gheseyt tot Iesum, Ende wie is mijn naeste?

30

Ende Iesus dit opnemende heeft gheseyt. Een mensch ghinck nederwaerts van Ierusalem nae Iericho, ende hi is gheuallen onder die moordenaers die welcke hebben hem oock berooft, ende als sij hem ghewont hadden sijn sij wech ghegaen, latende hem half leuende,

31

Ende tis ghesciet datter een priester afquam door den seluen wech, ende dien siende, is hi voorby ghegaen,

32

⁺Desghelijcs oock een Leuijt doen hy omtrent die plaetse was ende hem sach is voorbi ghegaen

+ F

33

Maer een Samaritaen ouer wech gaende is by hem ghecomen, ende hem siende is met bermherticheyt beweecht gheweest,

34

Ende bi hem comende heeft hi sijn wonden verbonden, ghietende daer in olie ende wijn, ende settende hem op sijn lastdragende beeste heeft hi dien gebracht in een herberghe, ende hi heeft hem besorgt,

35

Ende des anderen daechs heeft hi twee penninghen wtghenomen, ende heeftse ghegheuen den herberghier ende heeft gheseyt. Besorgt hem, ende al wat ghi daer bouen verlegghet, dat sal ick (als ick wedercomen ben) v wederom gheuen,

36

Wie dunct v dat van desen drijen die naeste gheweest is vanden ghenen die onder die moordenaren gheuallen is?

37

Ende hi seyde die bermherticheyt aen hem ghedaen heeft, Ende Iesus heeft tot hem gheseyt. ⁺Gaet henen ende doet ghi oock desghelijcs.

+ G

* + 38

Ende tis ghebuert doen sij ghinghen dat hi is ghegaen in een casteelken, ende een vrouwe Martha ghenaemt heeft hem ontfanghen in haer huys,

39

ende dese hadde een suster ghenaemt Maria, die welcke oock sittende neffens die voeten des Heeren hoorde sijn woort,

40

Maer Martha was sorchuuldichlijc becommert met veel dienens, die welcke heeft ghestaen ende gheseydt. Heere en achte ghi dat niet, dat mijn suster my heeft alleen laten dienen? daerom segt haer dat sij my helpe,

41

Ende die Heere antwoordende heeft tot haer geseyt. Martha, Martha ghi sijt sorchuuldich, ende wort ongherustelijck becommert met veel dinghen,

42

Maer voorwaer een isser van noode, Maria heuet beste deel vercoren, dwelck haer niet en sal afghenomen worden.