Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

+ 1

⁺ENde als hi tsamen gheroepen hadde die twaelf apostelen heeft hy hen ghegheuen cracht ende macht ouer alle duyuelen, ende dat sij siecten ghenesen souden,

+ A

2

Ende hy heeftse ghesonden te prediken het rijck Gods, ende te ghenesen die siecken,

3

Ende hy heeft tot hen gheseyt. En draecht niet ouer wech, noch roede, noch male, noch broot, noch ghelt, noch en hebt gheen twee rocken,

4

Ende in wat huys dat ghy coemt, daer blijft, ende en gaet daer niet wt,

5

Ende so wie v niet en ontfanct, wtgaende van die stadt scuddet oock het stubbe van uwen voeten tot een ghetuyghenis ouer henlieden,

6

Ende sij wtghegaen sijnde, ghinghen al om door die dorpen het Euangelie vercondighende, ende ghenesende ouer al.

* 7

Ende Herodes een vanden vier vorsten heeft ghehoort alle die dinghen die van hem ghedaen worden, ende hem twijfelde om datter gheseyt worde vanden sommighen dat Iohannes vanden dooden verresen was,

8

maer vanden sommighen, Dat Elias hem gheopenbaert hadde, ende vanden anderen, Datter een vanden ouden propheten opghestaen was,

9

Ende Herodes seyde. Iohannem heb ic onthalst, maer wie is dese daer ick sulcke dinghen af hoore? Ende hy begheerde hem te sien,

10

Ende die apostelen weder ghecomen sijnde, hebben hem vertelt al wat sij ghedaen hadden, Ende hen mede ghenomen hebbende is hy

[p. *801]

wten weghe ghegaen in een woeste plaetse welc is by Bethsaida,

11

⁺Het welc als die scaren vernomen hebben soe sijn sij hem geuolcht, ende hy heeftse ntfanghen. ende sprack hen vanden rijcke Godts, ende die ghene die helpe behoefden ghenas hy,

+ B

12

Ende den dach was begonst onder te gaen. + Ende die twaelue tot hem comende hebben hem gheseyt. Laet die scaren wechgaen, dat si gaende in die dorpen ende lanthuysen die hier omtrent sijn moghen ter herberghen gaen, ende teten vinden, want wij sijn hier in een woeste plaetse,

13

Ende hy seyde tot hen. Gheeft hen ghy teten, Ende sij hebben gheseydt. Wij en hebben niet meer dan vijf brooden ende twee visschen, ten ware dat wij by auontuere ghinghen ende spijse cochten voor alle dese scare,

14

Ende daer waren by nae vijf duysent mans, Ende hy seyde tot sijn discipelen. Doetse ter neder sitten by gheselscappen, vijftich tsamen,

15

Ende sij hebben alsoo ghedaen, Ende sij hebbense alle doen neder sitten,

16

Ende ghenomen hebbende die vijf brooden ende twee visschen heeft hy opghesien ten hemelwaerts, ende hy heeft die ghebenedijt ende ghebroken, ende sijnen discipelen ghedeylt, dat sijt den scaren voortstellen souden,

17

Ende sij hebben alle gheten ende sijn versaedt, Ende daer is opghedraghen tghene dat hen ouerghebleuen is twaelf coruen brockelingen.

* 18

⁺Ende tis ghebuert doen hi was alleen biddende, soo waren met hem oock die discipelen, ende hy heeft hen gevraecht segghende. Wie segghen die scaren dat ick ben,

+ C

19

Ende sij hebben gheantwoort ende gheseyt. Iohannem den dooper, ende die andere Eliam, maer die ander datter een propheet van den iersten opghestaen is,

20

Ende hy heeft tot hen gheseyt Maer wie segt ghy dat ick ben? Simon Petrus antwoordende heeft geseyt. Christus die ghesalfde Gods

21

Ende hy hen straffende heeft gheboden dat si dit niemant segghen souden,

22

segghende. Want die sone des menschen moet veel lijden, ende veracht worden van den ouderen ende princen der priesteren ende Scriben, ende ghedoot worden ende ten derden daghe verrijsen.

23

Ende hy seyde tot alleghader. Eest datter iemant wilt comen nae my, die verloochene sij seluen, ende heffe op sijn cruys daghelijcs, ende volghe my,

24

Want soo wie sijn ziele wilt behouden die salse verliesen, want die sijn ziele verliest om mijnen wille die salse behouden,

25

want wat batet den mensch eest dat hy winnet die gheheel werelt, ende sij seluen verliest ende sijns selfs scade lijdt?

26

Want soo wie hem mijns scaemt ende mijnder woorden, diens sal hem die sone des menschen scamen als hi comen sal in sijn maiesteyt, ende des vaders, ende der heyligher Enghelen,

27

⁺Ende ick segghe v voorwaer Hier sijnder sommighe staende, die welcke die doodt niet en sullen smaken voor dat sij het rijck Gods sien,

+ D

28

Ende tis ghesciet nae dese woorden omtrent acht daghen, ende hy heeft mede ghenomen Petrum ende Iacobum ende Iohannem, ende is gheclommen op eenen berch om te bidden,

29

Ende doen hy badt soo is die ghedaente sijns aensichts gheworden anders, ende sijn cleedinghe wit ende wederblinckende,

30

Ende siet twee mannen spraken met hem, ende het waren Moyses ende Elias

31

ghesien in die maiesteyt, ende sij seyden sijn versceyden dat hy volbringhen soude in Iherusalem,

32

Maer Petrus ende die met hem waren, waren beswaert met vake, Ende ontspringhende hebben sij ghesien sijn maiesteyt ende die twee mannen die by hem stonden,

33

Ende tis ghesciet doen sij van hem sceydden, dat Petrus heeft gheseyt tot Iesus, Meester tis ons hier goet sijn, ende laet ons maken drij tabernakelen, een voor v, ende een voor Moyses, ende een voor Elias, niet wetende wat hy seyde,

34

Ende doen hy dit sprekende was, soo isser een wolcke ghecomen, ende die heeftse al om belommert, ende sij hebben ghevreest doen si in die wolcke ghinghen,

35

Ende daer is een stemme ghesciet vander wolcken segghende. ⁺Dit is mijn beminde sone, Hoort hem,

+ E

36

Ende als die stemme ghesciede, so is Iesus alleen gheuonden, Ende sij hebben ghesweghen, ende niemanden iet gheseyt in dien daghen van tghene dat sij ghesien hadden.

37

Ende tis ghesciet opden navolghenden dach als sij vanden berch quamen dat hem te ghemoete is comen een groote scare,

38

Ende siet een man wter scaren heeft luyde gheroepen seggende. Meester ick bidde v, siet op mijnen sone, want het is mijn eenich kint,

39

Ende siet den gheest aengrijpt hem ende ter stont soo roept hy, ende hy stoot hem aen ende verscoort hem met scuymsel, ende nauwelijcs en sceydt hy van hem als hy hem verscoort heeft,

40

ende ick heb uwen discipelen ghebeden dat si dien wtworpen souden ende sij en hebbens niet gheconnen,

41

Ende Iesus antwoordende heeft gheseyt. O ongheloouich ende verkeert gheslachte, hoe langhe sal ick by v lieden sijn, ende v ghedooghen? Brengt herwaerts uwen sone,

42

Ende als hy aenquam soo heeft hem die duyuel teghen die eerde ghestooten ende verscoorde hem, Ende Iesus heeft den onsuyueren gheest ghestraft, ende dat kint ghenesen, ende dat sijnen vader wederom ghegheuen,

43

Ende sij verwonderden hem allegader in die grootheyt Gods ende als sij hem alle verwonderden van allen dat hi dede soo heeft hi tot sijnen discipelen gheseyt.

44

Stelt ghilieden in uwe herten dese woorden, ⁺Want tis toecomende dat die sone des menschen sal gheleuert worden in die handen der menschen,

+ F

45

Maer sij en verstonden dit woord niet, Ende het was bedect voor henlieden, dat sijt niet en begrepen, ende sij vreesden hem te vraghen van desen woorde,

46

Maer daer is een ghedachte in henlieden comen, wie van hen die meeste was,

47

Ende Iesus siende die ghedachten haerder herten, heeft ghenomen een kint, ende dat ghestelt by hem

48

ende hi seyde hen, Soo wie dit kint ontfanghet in mijnen naem, die ontfangt my, ende soo wie my ontfangt, die ontfanct hem die my ghesonden heeft, Want soo wie die minste is onder v allen die is die meeste,

49

Ende Iohannes antwoordende heeft gheseyt. Meester wij hebben eenen ghesien in uwen naem duyuelen wtworpende, ende wij hebbent hem verboden, want hy en volcht met ons niet,

50

Ende Iesus heeft tot hem gheseydt. En willet niet verbieden, want soo wie teghen v lieden niet en is, die is voor v.

+ 51

Ende het is ghesciet als die daghen veruult worden dat hy van hier ghenomen soude worden, ende hy heeft sijn aensicht vast ghestelt om te gaen nae Ierusalem,

52

Ende heeft boden ghesonden voor sijn aensicht, ende wechgaende sijn inder Samaritanen stadt ghecomen dat sij hem bereyden souden,

53

Ende sij en hebben hem niet ontfanghen, want sijn aensicht was als van eenen die gaende was nae Ierusalem,

54

⁺Ende als sijn discipelen Iacobus ende Iohannes dat ghesien hadden, soo hebben sij gheseyt. Heere wildi dat wij segghen datter vier wten hemel nedercome ende verniele die?

+ G

55

Ende hem ommekeerende heeft hy hen ghestraft segghende. Ghy en weet niet van wat geest dat ghi sijt,

56

Die sone des menschen en is niet ghecomen om zielen te dooden, maer om salich te maken Ende sij sijn wechghegaen in een ander stedeken.

* 57

Ende tis ghesciet die wijle dat sij wandelden opden wech datter een gheseyt heeft tot hem. Ic sal v volghen

[p. *802]

al waer dat ghi ghaet,

58

Iesus heeft hem gheseydt. Die vossen hebben holen ende die voghelen des hemels nesten, maer die sone des menschen en heeft niet daer hi sijn hooft op rusten mach,

59

Ende hi heeft gheseydt tot eenen anderen. Volcht my, Maer die heeft gheseyt. Heere laet my ierstmael gaen ende mijnen vader begrauen,

60

Ende Iesus heeft hem gheseyt. Latet ghescieden dat die dooden hen dooden begrauen, maer gaet ghy henen ende vercondicht het rijc Gods,

61

Ende een ander seyde. Ick sal v volghen Heere, maer laet my ierstmael gaen sceyden vanden ghenen die thuys sijn,

62

Iesus heeft tot hem gheseyt. Niemant sijn hant aenden ploech slaende ende achterwaerts siende en is bequaem totten rijcke Godts.