Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .viij. Capittel.

1

⁺ENde tis ghesciet daer nae, ende hy reysde door die steden ende casteelen prekende ende deuangelie vercondigende vanden rijck Gods, ende die twaelue met hem,

+ A

2

ende sommighe vrouwen die ghenesen waren van boose gheesten ende siecten, Maria die ghenaemt wort Magdalene, daer seuen duyuelen wtghegaen waren,

3

ende Iohanna die huysvrouwe van Chuse die Herodes hoofmeester was ende Susanna, ende veel andere die hem dienden van haren tijtelijcke goeden.

+ 4

Maer alsser een groote scare verghaderde, ende van die steden haestelijck tot hem quamen, heeft hy gheseyt door een ghelijckenisse.

5

Hy is wtghegaen die saeyt om sijn saet te saeyen, ende als hijt saeyt soo is het een gheuallen omtrent den wech ende het is vertreden, ende die voghelen des hemels hebben dat gheten,

6

Ende dander is gheuallen opden steen, ende alst wtcomen was soo eest verdroocht, om dat gheen vochticheyt en hadde,

7

Ende het ander is gheuallen tusschen die dornen, ende die dornen tsamen opghewassen sijnde hebben dat versmacht,

8

Ende dander is gheuallen in goede eerde ende opgheghaen sijnde heuet vrucht voortghebracht honderfout, ⁺dese dinghen segghende riep hy. Die ooren heeft om te hooren die hoore,

+ B

9

Ende sijn discipelen vraechden hem wat parabel dat dit was

10

Den welcken hy heeft gheseyt. V lieden eest ghegheuen te kennen die verborghentheyt van dat rijc Gods maer den anderen in ghelijckenissen op dat sij siende niet en souden sien, ende hoorende niet en souden verstaen,

11

Ende dit is die ghelijckenisse, Tsaet is dwoort Gods,

12

Maer die omtrent den wech sijn, dat sijnse diet hooren daer na soo coemt die duyuel, ende neemt dat woort van hen herte om dat sij niet en souden gheloouende salich worden,

13

Want die opden steen sijn, die welcke als sijt ghehoort hebben, soo ontfanghen sij dwoort met blijscappe, ende dese en hebben gheen wortele, want sij wat tijts gheloouen, ende ten tijde der becoringhen soo sceyden sij daer af,

15

Maer dat in die dornen gheuallen is, dat sijn dese diet ghehoort hebben, ende van die sorchuuldicheden ende rijcdommen ende wellusticheden des leuens gaende worden sij versmacht ende si en brenghen gheen vruchten voorts,

15

Maer dat in goede eerde valt, dat sijn die ghene die in een goet ende alderbeste herte het woort hoorende onthouden ende brenghen vrucht voorts door lijdtsaemheyt.

* 16

⁺Niemant een licht ontstekende en bedect dat met eenen vate, oft en stelt dat onder tbedde niet, maer hy stellet op eenen candelaer, op dat die ghene die daer innecomen dlicht sien moghen,

+ C

17

Want daer en is niet heymelijcs dat niet gheopenbaert en sal worden, ende verborghen dat niet en sal gheweten worden, ende int openbare comen,

18

Daerom besiet hoe dat ghijt hooret, Want soo wie heeft, dien sal ghegheuen worden, ende soo wie niet en heeft, van dien sal oock tghene dat hy meynt te hebben afghenomen worden,

19

Ende tot hem sijn ghecomen sijn moeder ende sijn broeders, ende si en consten tot hem niet comen om der scaren wille,

20

Ende tis hem ghebootscapt. V moeder ende v broeders staen buyten begheerende v te sien,

21

Die welcke antwoordende heeft tot hen gheseyt. Mijn moeder ende mijn broeders sijn dese die dwoort Gods hooren ende doen.

+ 22

Ende tis ghebuert op eenen dach, ende hi is gheclommen in een sceepken, ende sijn discipelen ende hy seyde tot hen. Laet ons oueruaren ouer dat water Ende si sijn daer in gheclommen,

23

Ende die wijle dat sij

[p. *800]

sceepten soo is hy ontslapen, ende daer is eenen storm van winde int water nederghedaelt, ende sij worden vol watere, ende waren in perikel,

24

Ende tot hem gaende hebben sij hem ghewect, segghende. Meester wij gaen verloren, Ende hy opstaende heeft den wint ghestraft ende den tempeest des waters, ende tis opghehouden, ende daer is een stilte gheworden,

25

Ende hy seyde tot hen. ⁺Waer is v lieder ghelooue? Die welcke vreesende sijn verwondert gheweest tot malcanderen segghende. Wie meyndi dat dese is want hy den winden ende der zee ghebiedt, ende sij sijn hem onderdanich?

+ D

26

Ende sij sijn ghesceept tot aen dlantscap vanden Gerasenen welck is teghen ouer Galileen.

* 27

Ende doen hy wtghegaen was opt lant, soo is hem te ghemoete comen een man die eenen duyuel hadde nv van langhen tijden, ende hy en worde met gheenen cleede ghecleedt, noch hy en woonde in gheen huys, maer in die grauen,

28

Dese als hy Iesum ghesien heeft is voor hem nedergheuallen, ende luyde roepende met grooter stemme heeft hy gheseyt. Wat heb ick met v te doen Iesu sone des alderhoochsten Gods? Ick bidde v en pijnicht my niet,

29

Want hy gheboodt den boosen gheest dat hy wtgaen soude vanden mensche, Want langhe tijden hadde hy hem beseten, ende hi worde ghebonden met ketenen ende met veteren bewaert, ende brekende die banden worde hy ghedreuen vanden duyuel in die woestijnen,

30

Ende Iesus heeft hem ghevraecht segghende. Hoe sijdi ghenaemt? Ende hi antwoorde Legioen, want daer waren veel duyuels in hem ghecomen,

31

Ende sij baden hem dat hy hen niet en soude ghebieden dat sij souden inden afgront ghaen,

32

Ende daer was een cudde van veel verkenen die daer opden berch weydden, ende sij baden hem dat hy hen toelaten wilde in die verkenen te gaen, ⁺Ende hy heuet hen toeghelaten,

+ E

33

Aldus sijn die duyuels wten mensche ghegaen ende sijn in die verkenen ghegaen, ende met eenen ghebruyssche is dat cudde van bouen nederwaerts gheloopen in dat water ende is versmacht.

34

Dwelc als die ghene diese hoedden ghesien hebben datter gheschiet was, soo sijn sij gheuloden, ende hebbent ghebootscapt in die stadt ende in die dorpen,

35

Ende sij sijn wtghegaen om te besien datter ghedaen was, ende si sijn tot Iesum ghecomen, ende sij hebben den mensch gheuonden sittende vanden welcken die duyuels wtghegaen waren, ghecleedt ende met goeden verstande aen sijn voeten, ende sij hebben ghevreest,

36

Ende sij hebben ooc henlieden vercondicht diet ghesien hadden hoe dat hy ghesont was worden van dat Legioen,

37

Ende alle die menichte vander Gerasenen lantscap hebben hem ghebeden, dat hy van henlieden wech gaen woude want sij waren met grooter vreesen beuanghen, Ende climmende in een scip is hi wederom ghekeert,

38

Ende die man wten welcken die duyuelen ghegaen waren badt hem dat hi met hem sijn mochte, Ende Iesus heeft hem laten wechgaen segghende.

39

Keert wederom in v huys, ende vertelt hoe groote dinghen die v Godt ghedaen heeft, ⁺Ende hy is wechghegaen door alle die stadt prekende hoe groote dinghen dat hem Iesus ghedaen hadde,

+ F

40

Ende tis ghesciet doen Iesus wederom ghecomen was, dat hem die scare ontfanghen heeft want sij waren alle hem verbeydende,

41

Ende siet daer is een man ghecomen wiens naem was Iairus, ende hi was een ouerste der Sinagogen, ende hy is gheuallen aen Iesus voeten, hem biddende dat hy in sijn huys comen wilde

42

want hy hadde een eenighe dochter omtrent van twaelf iaren, ende dese sterf, Ende tis ghesciet doen hi ghinc dat hy van die scaren ghedronghen worde.

43

+ Ende daer was een vrouwe die in des bloets vloet was twaelf iaren lanck, die aen die medecijn meesters allen haer goet hadde ghehanghen, ende sij en conste van niemanden ghenesen worden,

44

dese is van achter ghecomen, ende heeft gheraect die wterste lijste van sijnen cleede, ende ter stont heeft den vloet haers bloets stille ghestaen,

45

Ende Iesus seyde. Wie eest die my gheraect heeft? Maer doen sijt alle loochende, soo heeft Petrus gheseydt, ende die met hem waren. Meester die scaren verdringhen v ende pijnighen v, ende segdi. Wie heeft my gheraect?

46

Ende Iesus heeft gheseydt. Iemant heeft my gheraect, want ick weet datter een cracht wt mi ghegaen is,

47

Ende die vrouwe siende dat niet verborghen en heeft gheweest, soo is sij al beuende ghecomen, ende is nedergheuallen voor sijn voeten ende si heeft te kennen ghegheuen voor alle tvolc om wat sake dat sij hem gheraect hadde, ende hoe dat sij ter stont ghesont was gheworden,

48

Ende hy seyde tot haer Dochter v ghelooue heeft v ghesont ghemaect, gaet in vreden.

* 49

⁺Als hy noch sprekende was soo isser een ghecomen aen den prince der Sinagogen segghende tot hem. V dochter is doot, en wilt hem niet quellen

+ G

50

Maer Iesus hebbende dit woort ghehoort heeft gheseyt totten vader vander iongher dochter. En wilt niet vreesen, Alleen ghelooft, ende sij sal ghesont sijn,

51

Ende doen hy aen thuys ghecomen was soo en heeft hy daer niemanden met hem laten ingaen, dan Petrum ende Iacobum ende Iohannem, ende den vader ende die moeder vander iongher dochter,

52

Ende sij weenden alleghader ende beclaechden haer, Ende hy seyde. En wilt niet weenen want die ionghe dochter en is niet doot, maer sij slaept,

53

Ende sij beghecten hem, wetende dat sij doot was,

54

Ende hy nemende haer hant heeft gheroepen segghende. Ionghe dochter staet op

55

Ende haren gheest is wederom ghecomen, ende si is ter stont opghestaen, Ende hy heeft gheboden datmen haer teten gheuen soude,

56

Ende haer ouders hebben seer verwondert gheweest, den welcken hi gheboden heeft dat si niemanden segghen en souden datter ghesciet was.