Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde als hy alle sijn woerden volseyt hadde in die ooren des volcs, soe is hy in Capharnaum ghegaen.

+ A

2

Ende die knecht van eenen hondertsten man qualijck te passe sijnde begonste te steruen, die welcke hem aenghenaem was.

3

Ende als hy ghehoort hadde van Iesu, soe heeft hy tot hem ghesonden die ouders der Ioden, biddende hem dat hy comen soude ende sijnen knecht ghenesen.

4

Ende als die tot Iesum ghecomen waren, soe baden sij hem sorchuuldelijck, segghende tot hem. Hy eest weerdich dat ghy hem dit doet,

5

want hy heeft ons volck lief, ende hy heeft ons een synagoge ghetimmert.

6

Ende Iesus ginck met hen lieden. Ende doen hy nu niet verre en was vanden huyse, heeft die hondertste man vrienden tot hem ghesonden segghende, ⁺Heere en wilt v niet vermoyen, want ick en ben niet weerdich dat ghi soudt onder mijn dack in comen.

+ B

7

Waerom dat ick my oock niet weerdich en heb gheacht, dat ic tot v comen soude, maer segghet met eenen woerde, ende mijn knecht sal gesont worden.

8

Want ic bin ooc een mensch onder een ouerheyt ghestelt, hebbende onder my ruyteren, ende ic segghe desen gaet henen, ende hy gaet, ende den anderen coemt, ende hy coemt, ende mijnen dienaer doet dit, ende hy doetet,

9

Iesus dit gehoort hebbende, heeft hem verwondert, ende omghekeert sijnde heeft hy den scaren die hem volchden gheseyt, Voerwaer ic segghe v, dat ic ooc in Israel soe grooten ghelooue niet gheuonden en hebbe.

10

Ende als sij thuys ghecomen waren die daer ghesonden waren, soe hebben sij den knecht die sieck gheweest hadde, ghesont vonden.

11

+ Ende tes ghesciet daer nae dat hy ginc tot een stadt die ghenoemt was Naim, ende met hem ghinghen sijn discipelen, ende een groote scare,

12

ende doen hy quam by die poorte der stadt, siet soe worde daer een doode wtghedraghen een eenich sone sijns moeders, ende dese was een weduwe, ende een groote scare vander stadt met haer.

13

Die welcke als die Heere ghesien heeft, soe heeft hy (met bermherticheyt op haer bewecht sijnde) tot haer gheseyt. En wilt niet weenen.

14

⁺Ende hy is daer aanghegaen, ende heeft die bare gheraect. Ende die ghene diese droeghen bleuen staende. Ende hy seyde, ionghelinck ick segghe v, staet op.

+ C

15

Ende hy is recht op gheseten die doot was, ende begonste te spreken. Ende hy heeft hem sijnder moeder ghegheuen.

16

Ende een vreese heeft hen alle beuanghen, ende sij loofden Godt grotelijck segghende, Het is een groot propheet onder ons opghestaen, ende Godt heeft sijn volc besocht.

* 17

Ende dit woert is wtghegaen van hem int gheheel Ioetsche lant, ende in alle dat lantscap daer omtrent.

18

Ende Iohannes discipelen hebben hem ghebootscapt van alle dese dinghen.

19

Ende Iohannes heeft twee van sijnen discipelen tot hem gheroepen, ende hy heeftse aen Iesum ghesonden segghende, Sijdt ghy die comen sult, oft verwachten wy eenen anderen?

20

Ende als die mannen tot hem ghecomen waren, hebben sij gheseyt, Iohannes die dooper heeft ons tot v ghesonden segghende, Sijdt ghy die comen sult, oft verwachten wij eenen anderen?

21

⁺In die selue vre heefter hy vele ghesont ghemaect van siecten, ende plaghen, ende van boose gheesten, ende veel blinden heeft hy tghesicht ghegheuen.

+ D

22

Ende antwoerdende heeft hy tot hen gheseyt, Gaende bootscapt wederom Iohanni dat ghy ghehoort hebt ende ghesien. Dat die blende sien, die crepele wandelen, die melaetsche worden ghesuyuert, die dooue hooren, die doode verrijsen, den armen wort het euangelie vercondicht,

23

ende salich is hi soe wie in my niet verarghert en wort.

24

Ende doen Iohannes boden wech ghegaen waren, heeft hy begonst te segghen van Iohannes totten scaren. Wat sijdi wt ghegaen in die woestijne te siene? een riet metten winde waeyen?

25

Maer wat sijdi wtghegaen te siene? eenen mensch met saechten cleederen ghecleedt?

[p. *799]

Siet die in costelijcke cleederen sijn ende in wellusticheden, die sijn in der coninghen huysen,

26

Maer wat sidi wtgaen te sien? eenen propheet? Voorwaer ick segghe v lieden oock meer dan eenen propheet.

27

Dit is hy daer af ghescreuen is. Siet ick sende mijnen Enghel voor v aensicht die uwen wech bereyden sal voor v,

28

want ick segghe v meerder propheet onder die kinderen der vrouwen dan Iohannes die dooper en isser niemant, Maer wie de minste is int rijck Gods die is meerder dan hy,

29

⁺Ende alle tvolck hoorende, ende die publicanen die ghedoopt waren met Iohannes doopsel hebben God gherechtuerdicht,

+ E

30

Maer die Phariseen ende wetgheleerde hebben den raet Gods versmaet in hen seluen, niet ghedoopt sijnde van hem,

31

Ende die Heere heeft gheseyt. By wien sal ick die menschen van desen gheslachte ghelijcken, ende wien sijnse ghelijc?

32

Sij sijn ghelijc den kinderen op die merct sittende ende sprekende tot malcanderen ende seggende. Wij hebben v ghesonghen met pijpen, ende ghy en hebt niet ghedanst, Wij hebben v droef gheclach ghesonghen, ende ghy en hebt niet gheweent,

33

Want Iohannes die dooper is ghecomen noch broot etende noch wijn drinckende, ende ghi segt hi heeft den duyuel,

34

Die sone des menschen is ghecomen etende ende drinckende ende ghi segt. Siet dese mensch is een brasser ende wijndrincker, een vrient der publicanen ende sondaren

35

ende die wijsheyt is gherechtuerdicht van allen haren kinderen.

+ 36

Ende een vanden Phariseen badt hem dat hi met hem eten soude, ⁺Ende in des Phariseus huys ghegaen sijnde is hy ter tafelen gheseten,

+ F

37

Ende siet een vrouwe die een sondersse was in die stadt, als si verstaen heeft dat hi gheseten was ten maeltijde in des Phariseus huys, heeft sij ghebracht een costelijcke alabasteren busse met salue, ende staende van achter aen sijn voeten, heeft sij met tranen begonst sijn voeten vochtich te maken, ende metten hayre haers hoofts droochde sijt ende custe sijn voeten, ende salfdese metter saluen,

39

Maer dit siende die Phariseus die hem ghenoodt hadde, heeft in si seluen ghesproken seggende. Waer dese een propheet, soo soude hy emmer wel weten wie ende hoedanich dese vrouwe is, die hem geraket, dat sij een sondersse is,

40

Ende Iesus antwoordende heeft tot hem gheseyt. Simon ick hebbe v wat te segghen, Ende hy seyde. Meester segt.

41

Een scultheere hadde twee sculdenaren, die eene was sculdich vijf hondert penninghen ende die ander vijftich,

42

Ende als sij niet en hadden daer mede dat sijt betalen mochten, soo heeft hijt hen beyden quijt ghescouden, Wie heeft hem dan aldermeest lief?

43

⁺Simon antwoordende heeft gheseyt. Ic meyne dat die ghene dien hy meest quijt ghescouden heeft. Ende hi heeft hem gheseyt. Ghi hebt recht gheordeelt,

+ G

44

Ende omghekeert sijnde totter vrouwen heeft hy gheseyt tot Simonem. Siedi dese vrouwe? Ic ben in v huys ghecomen, ghi en hebt mijnen voeten gheen water ghegheuen, maer dese heeft met tranen mijn voeten vochtich ghemaect, ende met haren hayre ghedroocht

45

Ghy en hebt my gheenen kus ghegheuen, maer dese en heeft niet opghehouden, van dat ick incomen ben mijn voeten te cussen,

46

Mijn hooft en hebdi met olien niet ghesalft, Maer dese heeft met saluen mijn voeten ghesalft,

47

Daerom segghe ic v. Haer worden veel sonden vergheuen, om dat sij seer bemint heeft, maer den welcken min vergheuen wort die bemint min,

48

Ende hy heeft tot haer gheseyt. V sonden worden v vergheuen,

49

Ende die daer tsamen ter tafelen saten begonsten te segghen in hen seluen. Wie is dese die oock die sonden vergheeft?

50

Ende hy heeft totter vrouwen gheseyt. V ghelooue heeft v salich ghemaect gaet in vrede.