Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde tes ghesciet opden nae sabboth dach als hy doert coren ghinc, so plucten sijn discipelen die aren af, ende sy atense wrijuende metten handen.

+ A

2

Ende sommighe vanden Phariseen seyden hen, Waerom doedi dat niet gheorlooft en is op die sabboth daghen?

3

Ende Iesus hen antwoerdende heeft gheseyt, En hebdi oock dit niet ghelesen dat Dauid ghedaen heeft doen hi hongher hadde, ende die met hem waren.

4

Hoe dat hy int huys Gods ghegaen is, ende heeft die brooden der voerlegghinghen ghenomen, ende gheten, ende heeftse ghegheuen den ghenen die met hem waren, die welck niet en is gheorlooft teten dan alleen den priesteren?

5

Ende hy seyde hen lieden. Dat die sone des menschen heere is ooc vanden sabboth dach.

6

Ende tis ghesciet ooc in eenen anderen sabboth dach, dat hy in die synagoge ghinck ende leerde. Ende daer was een mensch ende sijn rechte hant was dorre.

7

Ende die Phariseen ende Scriben wachten oft hy opden sabboth soude ghesont maken, op dat sij vinden souden, waer mede dat sij hem souden besculdighen.

8

⁺Maer hy kende hen ghedachten, ende hy heeft gheseyt den mensch die die dorre hant hadde. Staet op, ende staet int midden. Ende oprijsende heeft hy ghestaen.

+ B

9

Ende Iesus heeft tot hen gheseyt, Ick vraghe v lieden oftmen mach op die sabboth daghen wel doen oft qualijck, een ziele behouden oft dooden?

10

Ende als hy hen alle rontsomme ghesien hadde, soe heeft hy totten mensch gheseyt, Strect wt v hant. Ende hy heeftse wtghestrect, ende sijn hant is weder ghesont gheworden.

11

Ende sij worden veruult met dwaesheyt, ende spraken tsamen met malcanderen, wat sij Iesu doen souden.

12

Ende tis ghesciet in die daghen, dat hy is wtghegaen opden berch om te bidden, ende hy was ouernachtende in Gods ghebedt.

13

Ende alst dach gheworden was, soe heeft hy sijn discipelen gheroepen, ende heefter twaelue van hen wtghecoren die hy oock apostelen ghenoemt heeft.

14

Simon den welcken hy toeghenaemt heeft Petrus, ende Andream sijnen broeder, ende Iacobum ende Iohannem, Philippum ende Bartholomeum,

15

Matheum ende Thomam, Iacobum Alpheus sone, ende Simonem die ghenoemt wort Zelotes,

16

ende Iudam Iacobus sone, ende Iudam den Iscarioter die de verradere heeft gheweest.

17

⁺Ende nedercomende met hen heeft hy ghestaen in een veltachtighe plaetse, ende die scare van sijnen discipelen, ende een groote menichte des volcs van alle dlant van Iudeen ende Ierusalem, ende die aen die zee ligghen, ende van Tyro, ende Sidon

+ C

18

die ghecomen waren om dat sij hem hooren souden, ende ghenesen worden van haren ghebreken.

19

Ende die ghequelt waren van onsuyuer gheesten die worden ghenesen. Ende alle die scare begheerde hem te ghenaken, want daer ghinck een cracht van hem, ende die maectese alle ghesont.

20

Ende met opghehauen ooghen op sijn discipelen seyde hy, Salich sijt ghy arme, want uwe is het rijck Gods,

21

Salich sijdi die nu hongher hebt, want ghy sult versaet worden, Salich sijdi die nu weent, want ghy sult lachen,

22

Salich suldi wesen, als v die menschen sullen haten, ⁺ende als sij v sullen af sceyden, ende bescimpen, ende verworpen uwen naem als quaet, om den soen des menschen.

+ D

23

Verblijt v in dien dach ende verhuecht v, want siet uwen loon is groot in den hemel, want nae dese deden haer vaderen den propheten.

24

Maer nochtans Wee v ghy rijcke, want ghy hebt v vertroostinghe.

25

Wee v die versaedt sijt, want ghy sult hongher hebben. Wee v die nu lacht, want ghy sult droeuich sijn ende weenen.

26

Wee als v alle die menschen prijsen, want nae desen deden hen vaderen den valschen propheten.

27

Maer v lieden segghe ic diet hoort, Bemint v vianden, ende doet wel den ghenen die v haten.

28

Gebenedijtse die v vermaledijden, ende bidt voer die ghene die v belieghen.

[p. *798]

29

Ende die v slaet aen deen wanghe biedt dien ooc die andere. Ende den ghenen die v neemt v ouercleedt, en wilt hem niet beletten v ondercleedt ooc te nemen.

30

Ende alle den ghenen die iet van v begheert, gheeft. Ende soe wie v het uwe ontneemt, en eyscht dat niet wederom.

31

Ende nae dat ghy wilt dat die menschen v doen, alsoe doet hen desghelijcs ooc.

32

Ende eest dat ghy bemint die ghene die v beminnen, wat danck hebdi daer af? want die sondaers beminnen oock die ghene die hen beminnen.

33

⁺Ende eest dat ghy weldoet den ghenen die v weldoen, wat danck hebdi daer af? want die sondaers doen dat oock.

+ E

34

Ende eest dat ghy leent den ghenen daer ghy dat hoept weder af te ontfanghen, wat danck hebdi daer af? want die sondaren leenen den sondaren, dat sij desghelijcs wederom ontfanghen souden.

35

Maer bemint v vianden, doet wel ende leent, niet daer af hopende, ende uwen loon sal veel sijn, ende ghy sult kinderen des alderhoochsten sijn, want hy is goedertieren ouer die ondancbarighe ende quade.

36

Daer om weest bermhertich, ghelijck v vader bermhertich is.

37

En wilt niet ordeelen, ende ghi en sult niet gheordeelt worden, en wilt niet verordeelen, ende ghy en sult niet verordeelt worden. Vergheeft, ende v sal vergheuen worden.

38

Gheeft ende v sal ghegheuen worden. Een goede ende opghehoopte ende ghescudde ende ouerloopende mate sullen sij in uwen schoodt gheuen. Want metter seluer maten daer ghy mede ghemeten hebt, ⁺sal v wederom ghemeten worden.

+ F

39

Ende hy seyde hen een ghelijckenisse. Mach den eenen blenden den anderen blenden leyden? en vallen sij niet beyde in die grachte?

40

Gheen discipel en is bouen sijnen meester, ende een ieghelijck sal volmaect wesen, eest dat hy is ghelijck sijn meester.

41

Ende wat siedi een vese in ws broeders ooghe, maer den balck die in v ooghe is en aenmercti niet?

42

Oft hoe moechdi uwen broeder segghen, Broeder ghehengt dat ick mach die vese wt v ooghe worpen, daer ghy selue den balck in v ooghe niet en siet? Ghy hypocrijt, worpt ierstmael den balck wt v ooghe, ende dan suldi voert sien, dat ghy die vese moecht nemen wt ws broeders ooghe.

43

Want ten is gheenen goeden boom die quade vruchten voerts brengt, noch ghenen quaden boom die goede vruchten voerts brenghet.

44

Want elcken boom wort van sijn vrucht bekent. Want vanden dornen en vergadert men gheen vijghen, ⁺noch vanden braemen en snijdtmen gheen wijndruyuen.

+ G

45

Een goet mensch brengt voort wt den goeden scadt sijns herten goede dinghen, ende een quaet mensch brengt wt den quaden scadt quaet voerts. Want wt die ouervloedicheyt des herten, soe spreect den mont.

46

Ende waerom noemdi mi Heere Heere, ende en doet niet tghene dat ick v segghe?

47

Alle die tot my coemt ende mijn woerden hoort, ende doet die ick sal v toonen wien dat hy ghelijck is.

48

Hy is ghelijck eenen mensch die een huys timmert, die diep ghegrauen heeft, ende tfundament gheleydt heeft op een steenroetse. Ende alser eenen ouervloet ghesciedde, soe is de vloet aengheslaghen teghen dat huys, ende hy en heeft dat niet connen verroeren, want het was ghefundert opden steen.

49

Maer diese hoort ende niet en doet, die is ghelijk eenen mensch die sijn huys timmert op die eerde sonder fundament, op dwelc is den vloet gheslaghen, ende tes ter stont gheuallen, ende den val van dien huyse is groot gheworden.