Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde tis ghesciet als die scaren hem ouerdronghen om te hooren het woert Gods, ende dat hi stont by dat water van Genesareth.

+ A

2

Ende hy heeft twee scepen ghesien staende neffens dat water. Maer die visschers waren nederwaerts ghegaen, ende wiesschen haer netten.

3

Ende opclimmende in een scip dwelck Simon toebehoerde, heeft hy ghebeden dat hijt vanden lande een luttelken soude af stieren. Ende sittende leerde hy wten sceepken die scaren.

4

Ende als hy opghehouden hadde van spreken, soe heeft hy tot Simon gheseyt, Vaert in die diepte, ende ontpluyct v netten om te vanghen.

5

Ende Simon antwoerdende heeft tot hem gheseyt, Meester wij alle den nacht arbeydende en hebben niet gheuanghen, Maer in v woert sal ic dat net ontpluycken.

6

Ende doen sij dat ghedaen hadden, soe hebben sij gheuanghen een groote menichte van visschen, ende hen net scoerde.

7

Ende sij hebben hen ghesellen die in dander scip waren ghewinct, dat sij souden comen ende hen helpen. Ende die sijn ghecomen ende hebben beyde die sceepkens ghevult, alsoe dat die diep int water soncken.

8

Dwelc als Simon Petrus sach, ⁺soe is hi gheuallen op sijn knien voer Iesus segghende, Ghaet wt van my Heere want ick ben een sondich mensch.

+ B

9

Want een verscrictheyt hadde hem beuanghen, ende alle die met hem waren int vanghen van die visschen die sij gheuanghen hadden.

10

Desghelijcs ooc Iacobum ende Iohannem Zebedeus sonen, die simons ghesellen waren. Ende Iesus seyde tot Simon. En wilt niet vreesen, want van nu voerts suldi menschen vanghen.

11

Ende als sij die scepen aent lant ghestiert hadden, achterlatende alle dinghen sijn sij hem gheuolcht.

12

Ende het is ghesciet als hy was in een van die steden, ende siet daer was een man vol melaetscheyt, ende die Iesum siende ende voor hem nederuallende op sijn aensicht heeft hem ghebeden segghende, Heere eest dat ghi wilt ghi moecht my suyueren.

13

Ende wtstekende sijn hant heeft hy hem ghenaect segghende, Ic wilt, Wert suyuer. Ende ter stont is die lazerie van hem ghegaen,

14

⁺ende hy heeft hem beuolen dat hijt niemanden segghen en souden. Maer gaet henen ende verthoont v den priestere, ende offert voer v suyueringhe ghelijck Moyses beuolen heeft, hen tot een ghetuyghenis.

+ C

15

Ende die sprake van hem ghinck lanck so meer voerts, ende daer vergaderden veel scaren om dat sij hooren souden, ende dat sij souden ghenesen worden van haren siecten.

16

Maer hy ghinck besijden wten weghe in die woestijne, ende badt.

17

Ende het is ghesciet op een van die daghen ende hy sadt leerende. Ende daer waren Phariseen sittende ende leeraers der wet, die ghecomen waren wt alle die casteelen van Galileen, ende Iudeen, ende Ierusalem, ende die

[p. *797]

cracht des Heeren wasser om hen te ghenesen.

18

Ende siet daer quamen mannen draghende in een bedde eenen mensch die ghichtich was, ende sij begheerden hem binnen te bringhen, ende te legghen voer hem.

19

Ende niet vindende doer wat sijde dat sij hem souden connen binnen ghebrenghen om der scaren wille, soe hebben sij gheclommen opt dack, ende doer die tichgelen hebben sij hem neder ghelaten metten bedde int midden voer Iesum.

20

Der welcker ghelooue als hy ghesien heeft soe seyde hy Mensch v sonden worden v vergheuen.

21

Ende die Phariseen ende Scriben begonsten te dencken segghende, Wie is dese die blasphemien spreect? wie mach die sonden vergheuen dan alleen Godt?

22

Als Iesus hen ghedachten ghekent heeft, soe heeft hy antwoerdende tot hen gheseyt, ⁺Wat denct ghy in uwe herten?

+ E

23

Wat is lichter te seggen, die sonden worden v vergheuen, oft te segghen, Staet op ende wandelt?

24

Maer op dat ghy weten moecht dat die sone des menschen macht heeft op die eerde die sonden te vergheuen (seyde hy totten ghichtighen) Ick segghe v staet op, neempt op v bedde, ende gaet in v huys.

25

Ende ter stont opstaende voer hen lieden heeft hy ghenomen daer hy op lach, ende hy is wech ghegaen in sijn huys, grootelijck Godt louende.

26

Ende een verscrictheyt heeftse alle beuanghen, ende sij loofden Godt grootelijck. Ende sij worden veruult met vreesen segghende, Wy hebben heden wonderlijcke dinghen ghesien.

27

Ende nae desen is hy wtghegaen ende heeft ghesien eenen publicaen ghenaemt Leui sittende aent tolhuys, ende hy heeft hem gheseyt, Volcht my.

28

Ende hy alle dinghen achterlatende is opstaende hem gheuolcht,

29

⁺ende Leui heeft hem eenen grooten maeltijt bereyt in sijn huys. Ende daer was een groote scare van publicanen ende van andere die met hen waren ter tafelen sittende.

+ F

30

Ende die phariseen ende hen Scriben murmureerden segghende tot sijnen discipelen. Waer om eeti ende drincti met die publicanen ende sondaren?

31

Ende Iesus antwoerdende heeft tot hen gheseyt, Sij en hebben gheenen medecijn meester van doen die ghesont sijn, maer die qualijck te passe sijn.

32

Ic en ben niet ghecomen om die rechtuerdighe te roepen, maer die sondaers tot penitencie.

33

Ende sij hebben tot hem gheseyt, Waerom vasten Iohannes discipelen dicmael, ende doen bedinghen, des ghelijcs ooc der Phariseen discipelen ende die uwe eten ende drincken?

34

Totten welcken hy gheseyt heeft. Moechdi des brudegoms kinderen als die brudegom met hen is, doen vasten?

35

Maer die daghen sullen comen, ende als die brudegom hen afghenomen sal wesen, ⁺dan sullen sij vasten in dien daghen.

+ G

36

Ende hy seyde een ghelijckenisse tot hen. Dat niemant en naeyet een stuck lakens van een nieu cleedt, aen een oudt cleedt, oft anders sal hy dat nieuwe cleedt schoeren, ende den ouden cleede en dient niet dat stuck vanden nieuwen cleede.

37

Ende niemant en ghiet nieuwen wijn in oude flesschen, oft anders soe sal den nieuwen wijn die flesschen schoeren, ende dien sal wtghestort worden, ende die flesschen sullen verdoruen worden,

38

maer nieuwen wijn moetmen ghieten in niewe flesschen/ ende soe worden die beyde behouden.

39

Ende niemant ouden wijn drinckende en wilt ter stont den nieuwen, want hy seyt den ouden is beter.