Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde Iesus vol vanden heylighen gheest is wedercomen vander Iordanen, ende hy worde ghedreuen doer den gheest in die woestijne veertich daghen,

+ A

2

ende hy worde ghetemptert vanden duyuel. Ende hi en heeft niet gheten in dien daghen, ende doen die ouerleden waren, soe heeft hi hongher ghehadt.

3

Ende die duyuel heeft tot hem gheseyt, Eest dat ghy die sone Gods sijt soe segt desen steen dat hy broot worde.

4

Ende Iesus heeft tot hem gheantwoert. Daer is ghescreuen, dat die mensch alleen doert broot niet en leuet, maer doer alle woerde Gods.

5

Ende die duyuel heeft hem gheleydt op eenen hooghen berch ende heeft hem ghetoont alle die rijcken vanden omganc der eerden op eenen oghenblick tijts,

6

ende heeft hem gheseyt, ⁺V sal ic alle dese machticheyt gheuen ende die glorie van die, want sij sijn my ouergheleuert, ende wien ic wille dien gheue ic dese.

+ B

7

Daerom eest dat ghi aenbiddet voer my, soe sullen die al uwe sijn.

8

Ende Iesus antwoerdende heeft tot hem gheseyt. Daer is ghescreuen. Den Heere uwen Godt suldi aenbidden, ende hem alleen dienen.

9

Ende hy heeft hem gheleyt binnen Ierusalem, ende hem ghestelt, op die tinne des tempels, ende hi heeft tot hem geseyt, Eest dat ghi Gods sone sijt, soe worpt v van hier nederwaerts.

10

Want daer is ghescreuen dat hy sijnen enghelen van v beuolen heeft, dat sij v onderhouden souden,

11

ende dat sij v in hen handen draghen sullen, dat ghi by auontueren uwen voet niet en stoodt aen den steen.

12

⁺Ende Iesus antwoerdende heeft tot hem gheseyt, daer is gheseyt, Ghi en sult den Heere uwen Godt niet tempteren.

+ C

13

Ende als alle die temptacie voleynt was, soe is die duyuel van hem ghegaen tot een wijle tijts.

14

Ende Iesus is wederghecomen doer die cracht des gheests in Galileen, ende die fame is wtghegaen in alle dat lantscap van hem.

[p. *796]

15

Ende hy leerdese in hen Sinagogen, ende hy worde grootelijck ghepresen van hen allen.

16

Ende hy is ghecomen te Nazareth daer hy opgheuoedt was, ende hy is opden sabbothdach ghegaen nae sijn ghewoonte in die synagoge, ende hy is opghestaen om te lesen.

17

Ende hem is ghegheuen den boeck van Isaias den propheet. Ende als hy den boeck opgheslaghen hadde, soe heeft hy gheuonden die plaetse daer ghescreuen was.

18

Den gheest Gods is op my, daer om dat hy my ghesalft heeft, om den armen deuangelie te vercondighen heeft hy my ghesonden, te ghenesen die bedruct van herten sijn,

19

den gheuanghenen verlossinghe te preken, ende den blenden tghesichte, om die ghebrokene vrij te laten gaen tot verghiffenisse, te preken dat ghenaem iaer des Heeren, ende den dach der vergheldinghe.

20

⁺Ende als hy den boeck toe ghevouwen hadde, soe heeft hy dien den dienaer wederom ghegheuen, ende is gheseten. Ende die ooghen van alle die ghene die in die synagoge waren merckende op hem.

+ D

21

Ende hy heeft begonnen te segghen tot henlieden, Heden is dese scriftuere volbracht in uwe ooren.

22

Ende sij gauen hem allegader ghetuyghenis, ende sij verwonderden hen in die woerden der gratien, die wt sijnen mont quamen, ende seyden. En is dit niet Iosephs sone?

23

Ende hy seyde tot hen, Voerwaer ghy sult tot my segghen dese ghelijckenisse. Medecijn meester gheneest v seluen. Hoe veel dinghen hebben wy ghehoort die ghesciet sijn in Capharnaum, doet die ooc hier in v lant.

24

Ende hy seyde, Voerwaer ic segghe v, datter gheen propheet aenghenaem en is in sijn lant.

25

Inder waerheyt ic segghe v lieden datter vele weduwen waren in die daghen van Elias in Israel, ⁺doen den hemel ghesloten was drij Iaren ende ses maenden, doender eenen grooten hongher opghestaen was in alle dlant,

+ E

26

ende tot gheen van dien en is Elias ghesonden gheweest, dan in Sarepta van Sydonien, tot een weduwe,

27

Ende daer waren ooc veel melaetschen in Israel onder Eliseus den propheet, ende gheen van dien en is ghesuyuert dan Naaman die sirier.

28

Ende sij sijn allegader in die synagoge vol gramscappen gheworden dit hoorende.

29

Ende sij sijn opghestaen ende hebben hem wter stadt gheworpen, ende hebben hem gheleyt tot op dopperste vanden berch daer hen stadt opghetimmert was, dat sij hem van bouen nederwaerts worpen souden.

30

Ende hy passerende ginck doer dmidden van hen lieden.

31

Ende hy is nederwaerts ghegaen in Capharnaum een stadt van Galileen, ende aldair leerde hijse op die sabboth daghen.

32

Ende sij verwonderden hen seere in sijn leeringhe, want sijn woert was machtich.

33

⁺Ende in die synagoge was een mensch hebbende eenen onsuyueren duyuel, ende die heeft gheroepen met luyder stemmen

+ F

34

segghende, Laet ons gheworden, wat hebben wy met v te doene Iesu van Nazareth? Sijdi gecomen om ons te verderuen? Ic weet wel wie ghi sijt, die heyleghe Gods.

35

Ende Iesus heeft dien ghestraft segghende, Wert stom, ende gaet wt van hem. Ende als hem die duyuel int midden gheworpen hadde, soo is hi van hem wtghegaen, ende hy en heeft hem niet ghehindert.

36

Ende daer is een veruaertheyt in hen allen ghecomen ende sij spraken tot malcanderen segghende. Wat woert is dit, dat hi metter macht ende cracht ghebiedt den onsuyeren gheesten, ende sij gaen wt?

37

Ende die fame worde verbreyt van hem in alle die plaetse des lantscaps.

38

Ende Iesus opstaende van die synagoge is ghegaen in simons huys. ⁺Ende die moeder van simons huysvrouwe was beuanghen met groote cortsen ende sij hebben hem ghebeden voer haar.

+ G

39

Ende staende ouer haer heeft hi der cortsen beuolen, ende die heeft haer ghelaten. Ende ter stont opstaende diende sij henlieden.

40

Ende als die sonne onderghegaen was, alle die siecken hadden van menigherley siecten, leydden die tot hem. Ende hy ghenas die op elcken die handen legghende.

41

Ende daer ghinghen duyuelen wt veel menschen roepende ende segghende, Ghi sijt die sone Gods, ende hy die straffende en lietse niet spreken, want sij wisten dat hi Christus was.

42

Maer alst dach gheworden was wtghegaen sijnde ghinck hi in een woeste plaetse, ende die scaren sochten hem, ende sij sijn tot hem ghecomen ende sij hielden hem dat hi van hen niet wech gaen en soude.

43

Tot die welcke hi seyde, Ic moet ooc den anderen steden deuangelie preken van dat rijcke Gods, want daer om ben ic ghesonden.

44

Ende hy was prekende in die synagogen van Galileen